MUKÉTÍMÙ 14:8-35

⁸Ti Yiɛ̀ nKuyie nti kómmúmu kɛ yóó ti tɑnnɛ́ dɛ kó kɛtenkɛ̀ mɛnɑɑmiɛ̀ nnɛ̀ mɛcekùɔ̀ ndɛ̀ pũɔ̃̀ nkɛ̀, kɛ́ kɛ̀ nti duɔ́.

⁹Ti bɑ́ɑ́ tuutɛnɛ̀ Kuyie, ti bɑ́ɑ́ yɔtɛ dɛ kó kɛtenkɛ̀ kɔbɛ. Ti yóó bɛ̀ ɑutɛ́mu dimɔ̀nnì dìmɑ́ɑ̀ miɛkɛ. Bɛ bɔkɛ̀ cokɛ́mu! Ti Yiɛ̀ nKuyie nti bonɛ̀mu, di bɑ́ mbɛ̀ dé.

¹⁰Mɛm̀mɛ kɛ̀ Isidɑyɛɛribɛ bɛmɔu tĩ̀nnì nnɑ́ɑ́ nkɛ́tú, bɛ̀ bo búɔ́tí Mɔyiisi nɛ̀ Anɔɔ yɛtɑ̃́rɛ̀ kɛ́kuɔ. Bɛ̀ kpɑɑ́ mɛ nnɑ́ɑ́ nkɛ̀ ti Yiɛ̀ nKuyie nkó tikpetìi cútɛ́ní mɛtɑummɛ̀ tou ĩ́nkɛ̀ Isidɑyɛɛribɛ bɛmɔu nuɔ mmiɛkɛ.

¹¹Kɛ̀ ti Yiɛ̀ nKuyie mbɛ́inɛ̀ Mɔyiisi kɛ dɔ̀: Dɛ̀ yó nkɑ̃́ɑ̃́kɛ́ dɛ kɛ̀ bɛ nnìtìbɛ̀ yóu bɛ̀ bo nni nsenkumɛ̀? Dɛ̀ yó nkɑ̃́ɑ̃́kɛ́ dɛ kɛ̀ bɛ̀ɛ yie n kpɛti? M mɛ ndɔ̀ɔ̀mu tidiɛtì bɛ cuokɛ̀.

¹²N yóó bɛ̀ bɔntɛ́ mutenkṹṹ mmu kɛ̀ bɛ̀ɛ kú kɛ́deè pɑ́í pɑ́í kɛ̀ n duɔ́ nkɑ̀ɑ botíi sṹṹ nkɛ́ bɛ̀ pɛ̃ɛ̃tɛ́, kɛ́kpenkɛ kɛ́ bɛ̀ pɛ̃ɛ̃tɛ́.

¹³Kɛ̀ Mɔyiisii nɑ́kɛ́ ti Yiɛ̀ nKuyie nkɛ dɔ̀: Esibiti kɔbɛ kèèmu fɔ̃́ɔ̃̀ dènnɛmɛ̀ ɑ nìtìbɛ̀ bɛ ɛì miɛkɛ nɛ̀ ɑ kó muwɛ̃rímú.

¹⁴Dihɛì diì nkɔbɛ kèèmu fɔ̃́ ti Yiɛ̀ nKuyie nhɑ bɛ̀ bonɛ̀mɛ̀ kɛ bɛ̀ bɛnkú ɑmɑ́ɑ̀, kɑ̀ɑ wɛtirì ɔ̃ mbɛ̀ dìɛ́kɛ́ kuyie nkɛ́ mbɛ̀ mí kɛyènkɛ̀.

¹⁵Kɑ̀ɑ bɛ̀ kùɔ́ dimɔ̀nnì dìmɑ́ɑ̀ miɛkɛ, bɛ̀ɛ̀ do kèè bɛ̀ nɑ̀ɑ́mmɛ̀ ɑ kpɛ́í mbɛ̀ bo yĩ́,

¹⁶fɔ̃́ nti Yiɛ̀ nKuyie nhɑ yĩɛ̃kɛ ɑ bo bɛ̀ tɑnnɛ́mɛ̀ mmɛ kɛtenkɛ̀ ɑ do yɛ̃ nhɑ yóó bɛ̀ duɔ́ nkɛ̀, dɛɛ̀ te kɑ̀ɑ bɛ̀ kùɔ dikpɑ́ɑ̀ miɛkɛ.

¹⁷N Yiɛ̀ nKuyie n dɑ bɑ́ɑ́mmu, bɛnkɛ ɑ wɛ̃rímú ɑ bɛ́i nkɛ yɛ̃ ndɛ̀ ndòmmɛ̀.

¹⁸A bɛ́immu kɛ tú fɔ̃́ nti Yiɛ̀ nKuyie nhɑ miɛkɛ boo, kɑ̀ɑ sɑ̀ɑ̀ ndɛu, kɛ̀ bɛnìtìbɛ̀ ɔ̃ ndɑ cɑɑ̀ri kɛ yetírí ɑ kpɛti, kɑ̀ɑ mmi ɑ mɛ nhɔ̃ í nwúónko oyɛiwe kɛ ɔ̃ɔ̃ kpetínnɛ́ ibí i yɛmbɛ̀ yɛi nkpɛ́í nnɛ̀ bɛ yɑɑ̀bí kó iyɑɑ̀bío.

¹⁹Ti Yiɛ̀ nKuyie nhɑ sémmɛ̀ dɛumu, cĩ́ɛ̃́ mbɛ kɛ́ndònnɛ̀ ɑ bɛ̀ cĩ̀ɛ̃́nkomɛ̀ nɛ̀ bɛ̀ yɛ̀mɛ̀ Esibiti kɛ tùɔ̀kɛnní yíe.

²⁰Kɛ̀ ti Yiɛ̀ nKuyie ndɔ̀: A mɛ̀ nni mbɑ́ntɛ̀mɛ̀ m bɛ̀ cĩ̀ɛ̃́mmu.

²¹Mí ndi Yiɛ̀ nKuyie m bomu! Kɛ̀ n kpetì pìɛ́kɛ́ kutenkù kumɔu dɛ̀ bɑ́ɑ́ pɑ̃.

²²Bɛ̀ɛ̀ kó dimɑ̀ɑ̀ yɑ̀ n kpetì nɛ̀ n dɔ̀ɔ̀ tìì diɛtì Esibiti nɛ̀ dikpɑ́ɑ̀ miɛkɛ, nɛ̀ mɛmmɛ kɛ cĩ́ɛ̃́kɛ́ kɛ n yɑ́ú kɛ tùɔ̀kɛ kucɛ tɛpíítɛ̀ bɑ́ bɛ̀ í yie n kpɛti.

²³M pɑrìkɛ̀mu bɛ kóò mɔù bɑ́ɑ́ yɑ̀ dihɛì n do yɛ̃ n yóó duɔ́ ndì bɛ yɛmbɛ̀, bɛ̀ɛ̀ n sènkɛ̀rì, bɛ kóò mɔù bɑ́ɑ́ dì yɑ̀.

²⁴N kóo tɔ̃ntì Kɑdɛbu yie kó mɛyɛ̀mmɛ̀ mɛ ncɑ̃̀ɑ̃́mmɛ̀, kòò yié n kpɛti timɔu, n yóo ò tɑnnɛ́mu dɛ kó dihɛì ò kɔ̀tɛ kɛ yɑ̀ dì, kòo yɑɑ̀bí di tiekɛ.

²⁵Amɑdesiibɛ nɛ̀ Kɑnnɑhɑ̃ɑ̃ kɔbɛ mɛ̀ mbomɛ̀ kubiriku bíɛ́kɛ̀ kó yɛhɛkɛ̀, di nɑɑ kɔ́ntɛ́ kɛ́yɛ̀ dikpɑ́ɑ̀ kɛ́tũnnɛ kucɛ kùù yìɛ̀nɛ̀ tipèntì kóo dɑ̀mɛ́ɛ̀rì.

²⁶Kɛ̀ ti Yiɛ̀ nKuyie mbɛ́inɛ̀ Mɔyiisi nɛ̀ Anɔɔ kɛ dɔ̀:

²⁷Dɛ̀ yó nkɑ̃́ɑ̃́kɛ́ dɛ kɛ̀ kubotí yɛiku kuù nyóu kù bo nni nkpɑ̀nnɛ̀mɛ̀ kɛ yetírí n kpɛti? N kèèmu bɛ̀ tùùtɛ kɛ nɑ́ɑ́ ntì.

²⁸Nɑ́kɛ́ bɛ kɛ dɔ̀ n tú: Mí ndi Yiɛ̀ nKuyie m bomu kɛ̀ míì bɛ́i, n yóó di dɔɔ̀ di nɑ̀kɛ́ tìnti.

²⁹Di yóó kú dikpɑ́ɑ̀ miɛkɛ nkɛ díndi bɛ̀ kɑ̀ɑ mbɛ̀ kó dimɑ̀ɑ̀ kɛ́túótɛ́ bɛ̀ɛ̀ mɔ̀kɛ yɛbie nsipísìdɛ́ kɛ́ndeètìnko. Díndi bɛ̀ɛ̀ kó dimɑ̀ɑ̀ tùùtɛ,

³⁰di í tɑti kɛtenkɛ̀ n do bɛ́i nkɛ́pɑrìkɛ̀ kɛ dɔ̀ n yóó di duɔ́ nkɛ̀, kɛ̀ dɛ̀ í tú Yefundee birɛ Kɑdɛbu nɛ̀ Nunni birɛ Sosuwee.

³¹Di yɑɑ̀bí di do yɛ̃ mbɛ̀ yóó di kuɔ kɛ́hɛí ì, n yóó i ntɑnnɛ́ kɛtenkɛ̀ di sènkɛ̀rì kɛ̀, kɛ̀ ìi kɛ̀ tiekɛ.

³²Kɛ̀ díndi biɛ di yóó kú dikpɑ́ɑ̀ miɛkɛ nkɛ.

³³Di n yetɛ mɛ̀ɛ̀ kpɛ́í nte kɛ̀ di bí yó nhɑ̃́ɑ̃́ ndikpɑ́ɑ̀ miɛkɛ kɛ dɔ̀ yɛbie nsipísìnɑ̀ɑ̀ kɛ fɛ̃́ũ̀rì kɛ bɑɑnɛ̀ di bo kúmɛ̀ dimɔu kɛ́deè.

³⁴Yɛwe sipísìnɑ̀ɑ̀ di do dɔ̀ɔ̀ yɛ̀ di kɔ̀tɛ dìì mɔ̀nnì kɛ bo pɑɑtɛ́ kɛtenkɛ̀, yɛ̀ bo nɑɑ́ nyɛbie nsipísìnɑ̀ɑ̀. Dibenni dìmɑ́ɑ̀ diyiè dìmɑ́ɑ̀ kpɛ́í, di bo yɑ̀ di yɛi nkó tiyeti kɛ́bɑntɛ́ di bo yetɛmɛ̀ n kpɛti dɛ̀ mɔ̀kɛ mùù cɔ̃́ntimu.

³⁵Mí ndi Yiɛ̀ nKuyie mmíì bɛ́i nkɛ yóó tì dɔ̀ɔ̀, kubotí yɛiku kuù nkɔbɛ bɛ̀ɛ̀ wɛ̃nnɛ́ kɛ yetɛ n kpɛti, bɛ̀ yóó kú dikpɑ́ɑ̀ dii mmiɛkɛ nkɛ, bɑ́ òmɔù bɑ́ɑ́ súɔ́.