Mitiyegec 38:1-9

¹Dawidingo sese fai faiac nunumuyegec yofi heiec. O KEBU, ge ngaba amma yoac ngabasiric mi anenna nga herega buu kopocsicac amma numeting mi anenna.

²Ge tebegango wedecnunec nga marigango witinau faima ferandzinunec.

³Ge neac modzoga tikecdeac sebina sasawa manganeu hafei ande nga kopocsicnaac amma sicna yeni sasawango hafeinginagoc andae.

⁴Ni kopocsic meficgekecba imocngo feracnuma semenukecde. Nga finactoa ebirango ngicngac yiniande isoc niu imoc naric mi tofohobade.

⁵Ni kopocsicnagoc kecma kapafaka angkecduaeac amma kubecna sasawa hoaema homuna fiu

⁶patickema ngonducnema asoacnac kemma marai ubahodungtoa negengkecduae.

⁷Sebina gerea nohou hafeingo sokodaru gombunga mong mi ande.

⁸Amma ni kucna kpac andaru manganema pereckema panggeduae. Amma herenau negengyohocgoc kpeborongtoa amma asoringa anenu kpacma arohoduae.

⁹Kebu, ni wiac sasawaac anende, imoc negendacnec. Nga ni asoringa anenu imocngo gearu mi sufuude.