Miti Mumu Ŋic 9:4-15

⁴Â moc e mâreŋko ɋâricne jueŋgopieŋ jaŋere ŋondeŋko juha woworic‐ticne foekac jaha; qâto moc juocmuzi laioŋ hâmocnere sâc sirickeocmu.

⁵Ɋâricne jueŋgopieŋ jaŋe juku hâmonaŋmu i manaeŋgopieŋ, â hâmokicne jaŋe ine wiac moc mi manaeŋgopieŋ. Ehuc ʒuhuckerâ furi roro i mi eniŋmu, â ŋic moczi moc jaŋere mocwâc mi manasuniŋmu.

⁶Jaŋe hâmohapie maŋjauŋ‐jeŋic â aaric‐jeŋic â ʒoɋac‐jeŋic i mâmâc omae‐fâreocmu. Jaŋe mâreŋko wiac i me i fuaocmu ira ʒuhuckerâ gie moc mi baniŋmu.

⁷Ajoc, go nânâge nâhuc bubiaŋ manac, â waiŋ opâge nâhuc ʒeri ec, go iŋuc ecmurâ Anutuzi mârâc jaha biac mana‐gareme sâckewec.

⁸Irec go dameŋ sâc ʒeri bubiaŋ faio juzemec.

⁹Ŋokacgere egareekac ehec ʒeri bubiaŋ faio juzemec, Anutuzi mâreŋ ʒira juju fâri tâmiric garewec i fogareha iŋuc hâcne ezemec. Ehuc juju dameŋge fâri tâmiric sasawa irec ʒeri bubiaŋ manazemec, go mâreŋko ʒâic gie sâko bahuc juhaŋtec ʒeri bubiaŋ i sawa fua‐gareocmu hâcne.

¹⁰Go gie i me i ʒoɋachec bazemec, i wemocte? Hâmokicne jaŋere haeo racmu ira gie me mamana me mamana tara me maŋɋârâŋ moc mi fokacte iŋuc hâcne ezemec.

¹¹Erâ no mâreŋko wiac kecʒiŋuc wâc fuame honepo: Ŋic gasackeeŋgopieŋ jaŋe mao fisirâ furi mi roeeŋgopieŋ, â ŋic ʒoɋachec jaŋe ʒikao mi sanaŋkeeŋgopieŋ, â ŋic maŋɋârâŋhec jaŋe nânâ wiac boc mi bâfuaeŋgopieŋ, â mamana sâkohec jaŋe moneŋ mafa boc mi hureeŋgopieŋ, â ŋic mamana sarichec jaŋe gie fekicne boc mi rauckeeŋgopieŋ. Jaŋe sasawa wiac busâqocnehec fua‐jareekac hâcne.

¹²Ŋic nâŋâc dameŋ banârekicne i moc mi manaeŋgopeneŋ. Ine qowi jaŋe mi manahuc bitiŋko raʒipie kicjopaekac, â hâwec qowi jaŋe wâc mi manahuc wasaŋko jowaeŋgopieŋ irec sâc jaha ŋic nâŋâc mi manahuc juhapene dameŋ sâqocnezi ututuŋ jaha maic‐nâpoekac.

¹³No mâreŋko wiac kecʒiŋuc wâc fuame honerâ manape boc fefene ewec:

¹⁴Mâreŋ mocko hae piticne moc ŋewec, erâ ŋecjucfâc‐ticne jaŋe afecne sawa. Ehame ŋicwofuŋ tâpirihec moczi momorifâc‐ticne jaŋehec fisirâ hae i somâckembiŋ. Somâckerâ qânâsac âkeʒurâ haeo feniŋte ʒae wiac bambiŋ.

¹⁵Erâ hae irec maŋnao ŋic hapetac moczi maŋɋârâŋhec juwec. E maŋɋârâŋ dâŋticnezi hae i râsifâc‐ticne jaŋere meonec batarawec. Ehame ʒâhec ine ŋic ere mocwâc mi manasumbiŋ.