Miti Mumu Ŋic 7:4-27

⁴Ŋic mutuc matacne e dameŋ sâc jujuhâmore sawa manasuekac, â ŋic maŋɋârâŋhec eki ine hâmocte mâmâc manasuekac.

⁵Ŋic maŋɋârâŋheczi mu tutuc enâreme manapene fefene ezejec, â ŋic mutuc matacne jaŋe mumbiaŋ‐nâpopie manapene wawahane ezejec.

⁶Ŋic mutucne moczi gâwieme qiŋambu ʒârâ ʒocko râepene ʒahuc parac heekac irec sâc eekac, erâ izi wiac fâri tâmiric jaha ekac wâc.

⁷Ŋic maŋɋârâŋhec moczi ŋic moc eatuckeocmu e ŋic mutucnere sâc bâfuaocmu, â moc e bâbâmiriŋ moneŋ roocmuzi maŋ mamanasu‐ticne sipirickeocmu.

⁸Gie fuŋkehuc mâcne, baku batararâ manapene biaŋkezejec. Sahac fefe juju i wiac wawahane â bumâteŋ faio juju izi ine wiac fefene.

⁹Go kimbeŋ aaric biac mi bâfuazemec, aaric i ŋic mutucne jaŋere maŋko fic hae eekac.

¹⁰Go ʒiŋuc mu wioc moc mi ezemec: “Dameŋ raŋɋanao wemocte wiac sasawa biaŋne fofârewec?” Wiwio iŋucne i maŋɋârâŋ dâŋ aricne.

¹¹Mâreŋko ŋic jueŋgopeneŋ sasawa nâŋâc maŋɋârâŋhec efârenʒepeneŋ; maŋɋârâŋhec juju i merâfâc wiac babaju irec sâc jaha ekac.

¹²Moneŋzi ŋezic‐nâpoekac irec sâc jaha maŋɋârâŋzi ŋezic‐nâpoocmu; maŋɋârâŋte fuŋne manaeŋgopieŋ ŋic i jaŋere juju i maŋɋârâŋzi basanaŋkeekac hâcne.

¹³Go Anutuzi wiac ebac ewec irec manasuhuc juzemec; eki wiac i me i moc bame sâqorewecko ine ŋic moczi moc sâcne bâtiŋneocmu me?

¹⁴Go gie wiacge batec hatacke‐hâmome ʒeri bubiaŋ faio juzemec, me sâqore‐gareme ine ʒiŋuc manazemec: Anutu e jujuhâmo â ʒârâ ʒâpânehec juju i mâmâc mume fua‐nâreekac, irec nâŋâc wemo ʒuhuckerâ maic‐nâpoocmu i mi manaeŋgopeneŋ.

¹⁵Juju‐nane i fâri tâmiric ewec, ehame sifu wiac ʒiŋuc fuaekac i hone‐fârepo: Ŋic tiŋne jaŋe tiŋne jaha juhuc hâmo sipiric eeŋgopieŋ, â ŋic sindaŋne jaŋe ine sindaŋne jaha juhuc dameŋ ʒora jufeeŋgopieŋ.

¹⁶Irec go jujuge biac sipirickezicte tiŋne â maŋɋârâŋhec boc mi juzemec.

¹⁷Erâ ŋifec ine dameŋge mi taraha biac hâmozicte sindaŋ â mutuc matacne wâc boc mi juzemec.

¹⁸Go wiac ŋifecne ehuc ŋifecne wâc mi behezemec. Erâ Anutu araŋ bacnehuc wiac iŋuc me iŋuc ebac etec biaŋkeocmu.

¹⁹Maŋɋârâŋzi ŋic bafic‐nâpoekac i guriŋ bapa ŋic 10 jaŋe hae moc bafickeeŋgopieŋ irec sâc jâurukac.

²⁰Ŋic moczi dameŋ sâc tiŋne juhuc bahac moc mi bâfuaocmu i mâreŋko moc mi fokac.

²¹Kiŋaŋ qaqagezi sâwecgukac, go dâŋ iŋuc moc manazicte ŋic jaŋe dâŋ mueŋgopieŋ sasawa irec hazec mi râezemec.

²²Erâ go dameŋ gâcnao ŋic sâwec‐jopameŋ i go gahac manaekic wâc.

²³No maŋɋârâŋhec juhuc wiac sasaware fuŋne bataniŋkepemurâ manasupo, ehuc kecʒiŋuc mupo: No maŋɋârâŋ fârine bâfua‐hâmozepac, iŋuc muhuc boc eipiepo.

²⁴Jujure fuŋne weniŋuc fokac i mozi mana taraocmu? Jujure fuŋne i qame hukicne, irec mana taranaŋte eipieŋgopeneŋ.

²⁵Erâ no sifu mana tarapemurâ giene ʒoɋachec bapo, ehuc maŋɋârâŋ â wiwio‐nanere fârine bâfuapemurâ fotac qatariepo. Erâ ine ʒiŋuc sawa mana tarapo: Sindaŋne juju i wiac mutuc matacne â mutuc matacne juju i wiac gâgâpâcne.

²⁶No iŋuc hone tarahuc ŋokacte fuŋne ʒiŋuc mana tarapo wâc: Ŋokac e hâmocte sâc jâuruhuc wiac hâtâ qiŋqiŋne iŋucne ekac. E âgo egareha izi bitiŋ iŋucne erâ kicguocmu, â hâpocgume kâpâcwâruzi basanaŋgukac tinac eocmu. Ŋic moc e Anutuzi manacneme biaŋkeekaczi ŋokac sâcne wisecneocmu, â ŋic hehesicne e ine ŋokaczi eatuckeme erao qohotaocmu.

²⁷Miti Mumu Ŋiczi dâŋ ʒiŋuc mukac: No wiwio‐nanere fârine bâfuapemurâ giene barâ ba ewarehuc iŋuc hâcne mana tarapo.