Text copied!
CopyCompare
Kâte Bible - Miti Mumu Ŋic - Miti Mumu Ŋic 7

Miti Mumu Ŋic 7:10-29

Help us?
Click on verse(s) to share them!
10Go ʒiŋuc mu wioc moc mi ezemec: “Dameŋ raŋɋanao wemocte wiac sasawa biaŋne fofârewec?” Wiwio iŋucne i maŋɋârâŋ dâŋ aricne.
11Mâreŋko ŋic jueŋgopeneŋ sasawa nâŋâc maŋɋârâŋhec efârenʒepeneŋ; maŋɋârâŋhec juju i merâfâc wiac babaju irec sâc jaha ekac.
12Moneŋzi ŋezic‐nâpoekac irec sâc jaha maŋɋârâŋzi ŋezic‐nâpoocmu; maŋɋârâŋte fuŋne manaeŋgopieŋ ŋic i jaŋere juju i maŋɋârâŋzi basanaŋkeekac hâcne.
13Go Anutuzi wiac ebac ewec irec manasuhuc juzemec; eki wiac i me i moc bame sâqorewecko ine ŋic moczi moc sâcne bâtiŋneocmu me?
14Go gie wiacge batec hatacke‐hâmome ʒeri bubiaŋ faio juzemec, me sâqore‐gareme ine ʒiŋuc manazemec: Anutu e jujuhâmo â ʒârâ ʒâpânehec juju i mâmâc mume fua‐nâreekac, irec nâŋâc wemo ʒuhuckerâ maic‐nâpoocmu i mi manaeŋgopeneŋ.
15Juju‐nane i fâri tâmiric ewec, ehame sifu wiac ʒiŋuc fuaekac i hone‐fârepo: Ŋic tiŋne jaŋe tiŋne jaha juhuc hâmo sipiric eeŋgopieŋ, â ŋic sindaŋne jaŋe ine sindaŋne jaha juhuc dameŋ ʒora jufeeŋgopieŋ.
16Irec go jujuge biac sipirickezicte tiŋne â maŋɋârâŋhec boc mi juzemec.
17Erâ ŋifec ine dameŋge mi taraha biac hâmozicte sindaŋ â mutuc matacne wâc boc mi juzemec.
18Go wiac ŋifecne ehuc ŋifecne wâc mi behezemec. Erâ Anutu araŋ bacnehuc wiac iŋuc me iŋuc ebac etec biaŋkeocmu.
19Maŋɋârâŋzi ŋic bafic‐nâpoekac i guriŋ bapa ŋic 10 jaŋe hae moc bafickeeŋgopieŋ irec sâc jâurukac.
20Ŋic moczi dameŋ sâc tiŋne juhuc bahac moc mi bâfuaocmu i mâreŋko moc mi fokac.
21Kiŋaŋ qaqagezi sâwecgukac, go dâŋ iŋuc moc manazicte ŋic jaŋe dâŋ mueŋgopieŋ sasawa irec hazec mi râezemec.
22Erâ go dameŋ gâcnao ŋic sâwec‐jopameŋ i go gahac manaekic wâc.
23No maŋɋârâŋhec juhuc wiac sasaware fuŋne bataniŋkepemurâ manasupo, ehuc kecʒiŋuc mupo: No maŋɋârâŋ fârine bâfua‐hâmozepac, iŋuc muhuc boc eipiepo.
24Jujure fuŋne weniŋuc fokac i mozi mana taraocmu? Jujure fuŋne i qame hukicne, irec mana taranaŋte eipieŋgopeneŋ.
25Erâ no sifu mana tarapemurâ giene ʒoɋachec bapo, ehuc maŋɋârâŋ â wiwio‐nanere fârine bâfuapemurâ fotac qatariepo. Erâ ine ʒiŋuc sawa mana tarapo: Sindaŋne juju i wiac mutuc matacne â mutuc matacne juju i wiac gâgâpâcne.
26No iŋuc hone tarahuc ŋokacte fuŋne ʒiŋuc mana tarapo wâc: Ŋokac e hâmocte sâc jâuruhuc wiac hâtâ qiŋqiŋne iŋucne ekac. E âgo egareha izi bitiŋ iŋucne erâ kicguocmu, â hâpocgume kâpâcwâruzi basanaŋgukac tinac eocmu. Ŋic moc e Anutuzi manacneme biaŋkeekaczi ŋokac sâcne wisecneocmu, â ŋic hehesicne e ine ŋokaczi eatuckeme erao qohotaocmu.
27Miti Mumu Ŋiczi dâŋ ʒiŋuc mukac: No wiwio‐nanere fârine bâfuapemurâ giene barâ ba ewarehuc iŋuc hâcne mana tarapo.
28Erâ wiwio‐nanere okacne gâcne wâc bâfuapemurâ giene bape arictac ewec. No iŋuc ehuc ŋic 1 tauseŋ jaŋere ŋondeŋko ŋic mocjaha sawa bâfuarâ manacnepe fefene ewec, â ŋokac biaŋne ine moc mi bâfuapo.
29Manaŋgopieŋ, no wiac kecʒiŋuc sawa hone tarapo: Anutu e ŋic tiŋne â biaŋne bâfuac‐nâpowec, ehame ŋic nâŋâc ine mamana biri hatane fuŋne fuŋne bâfuaeŋgopeneŋ.

Read Miti Mumu Ŋic 7Miti Mumu Ŋic 7
Compare Miti Mumu Ŋic 7:10-29Miti Mumu Ŋic 7:10-29