Miti Mumu Ŋic 2:8-26

⁸Erâ no mâreŋ sâc ŋicwofuŋ soŋaŋ‐jopahuc jupo jaŋere kânoŋkonec siliwa â gol ro qâzuc epo. Ehuc gae hehe ŋic ŋokac rocjopape gae henarehuc jumbiŋ; ehame hone aŋac ejarepemurâ ŋokacfâc‐nane bocjaha junarembiŋ wâc.

⁹No iŋuc ehuc ʒâŋe biŋehec erâ juwicnao Jerusalem haeo jumbiŋ jaŋe siric‐jopa‐fârerâ maŋɋârâŋ‐nanehec jaha jupo.

¹⁰No wiac i me i rorâ bajuzo enareme rorâ bajupo, ehuc wiac bubiaŋnehec moc mi bâsuepo. No gie sasawa bafârepo izi bubiaŋ bâfua‐narewec, erâ bubiaŋ izi gie furi‐nane ewec.

¹¹Eme ʒâhec ine wiac ebac efârepo â gie sâko bahuc jupo irec manasurâ ʒiŋuc mana tarapo: I wiac fâri tâmiric sasawa, erâ mezi mâŋâŋ rorâ basanaŋkezo eipieeŋgopeneŋ irec sâc; erâ wâc ʒiŋuc mana tarapo: Mâreŋko juhuc wiac fârine moc bâbâfuane mi fokac.

¹²Ine hâcne, ŋicwofuŋ moc e wiac furune moc mi ehuc, ere juwicnao ŋicwofuŋ juwefumbiŋ jaŋe wiac ebac embiŋ i sawa sâcne ebac eocmu. No iŋuc mana tararâ maŋɋârâŋhec juju â mamana tâmiric mutuc matacne juju irec fuŋne manapemurâ mamanasu gie bapo:

¹³Baku ʒiŋuc mana tarapo: Tatamaczi dapâc sirickerâ fefene eekac iŋuc jaha maŋɋârâŋzi mutuc matacne sirickerâ fefene eekac.

¹⁴Ŋic maŋɋârâŋhec jaŋe hata‐jeŋic hone tarahuc raeŋgopieŋ, â ŋic mutucne jaŋe ine dapâcko qiŋquŋkehuc jueŋgopieŋ. Ŋifec ine ʒiŋuc wâc mana tarapo: Maŋɋârâŋhec me mutuc matacne jueŋgopeneŋ nâŋâc wiac hâhâwicne sâc ijaha fua‐nâreocmu.

¹⁵No iŋuc mana tararâ ʒiŋuc mupo: “Ŋic mutucne wiac fua‐jareocmu ijaha no fua‐nareme ʒiŋuc mupemu: No wemocte maŋɋârâŋhec jupo?” Iŋuc murâ mupo: “Maŋɋârâŋhec juju‐nane i wiac fâri tâmiric jaha.”

¹⁶Juku ŋic moczi moc maŋɋârâŋhec jumbiŋ jaŋe moc mi manasuc‐jopaocmu, â ŋic mutuc matacne jumbiŋ jaŋe wâc iŋuc jaha mi manasuc‐jopaocmu. Ŋic jaŋe juku nâŋâcne nikec‐jopa‐fâreocmu hâcne. Ŋic maŋɋârâŋhec mecne â ŋic mutuc matacne mecne nâŋâc mâmâc sasawa hâmo‐fârenaŋmu.

¹⁷No iŋuc mana tarahuc juwefuhape wiac biaŋnezi mâcne, ʒârâ hâriŋzi sawa fua‐narewecte juju‐nane qaisockepo. Wiac ebac epo i fâri tâmiric efârewec, nâŋâc mezi mâŋâŋ rorâ basanaŋkezo eipieeŋgopeneŋ irec sâc ewec hâcne.

¹⁸No gie sâko bahuc wiac sasawa hure hemârec efârepo i kecʒiŋuc muhuc manape fâri tâmiric ewec: Âkehocnuocmuzi raucke‐fâreocmu.

¹⁹E maŋɋârâŋhec juocmu me mutuc matacne juocmu i mozi manakac? Ehame no mâreŋko maŋɋârâŋhec juhuc gie barâ wiac bâfuapo i sifu ro rauc efâreocmu. Irec wiac bâfua‐fârepo i manape fâri tâmiric jaha ekac.

²⁰No iŋuc murâ, gie ʒocne fârone bahuc jupo irec busâqoc manapo.

²¹Ʒiŋuc honeeŋgopeneŋ: Nâŋâc mamana â maŋɋârâŋ bâfuarâ mamana sarichec juhuc gie bapene fârine fuaekac i ŋic moczi giene mi bapa mâc juku ro rauc eekac. I wâc iŋuc jaha fâri tâmiric eekac â mi sâckeekac.

²²Nâŋâc mâreŋko gie ʒocne fârone bahuc jueŋgopeneŋ, eme irec fârine wemo wiac moc fua‐nâreekac?

²³Nâŋâc wiac ebac eeŋgopeneŋ izi dameŋ sâc busâqoc â aaric bâfua‐nâreekac, ehame ŋafeo wâc guŋ sâcne mi foeŋgopeneŋ. Irec i fâri tâmiric jaha eekac.

²⁴Fuŋne iŋuc fokacte ŋic nâŋâc wiac hure hemârec eeŋgopeneŋ irec aŋac manarâ nânâ opâ nâhuc juhapene biaŋkeocmu mecne. No iŋuc manahuc ŋifec ʒiŋuc mana tarapo wâc: I Anuturaonec jaha ware‐nâreekac.

²⁵Iŋuc mi fome muzac ine wemocko nânâ opâ nâhuc wiac gâcnere bubiaŋ wâc mananʒapeŋ.

²⁶Anutu e mana‐jareme biaŋkeekac ŋic i jaŋe hâcne maŋɋârâŋ â mamana tara â ʒeri bubiaŋ tahac‐jopaekac. Ŋifec ine ŋic hehesicne jaŋe gie bapie fârine fuame ro qâzuc eniŋte mujareekac; i ŋic gâcne mana‐jareme boc biaŋkeekac jaŋe jareocte iŋuc eekac. Erâ sifu irec wâc mâmâc manape fâri tâmiric eekac, ine mezi mâŋâŋ rorâ basanaŋkezo eipieeŋgopeneŋ irec sâc.