19E maŋɋârâŋhec juocmu me mutuc matacne juocmu i mozi manakac? Ehame no mâreŋko maŋɋârâŋhec juhuc gie barâ wiac bâfuapo i sifu ro rauc efâreocmu. Irec wiac bâfua‐fârepo i manape fâri tâmiric jaha ekac.
20No iŋuc murâ, gie ʒocne fârone bahuc jupo irec busâqoc manapo.
21Ʒiŋuc honeeŋgopeneŋ: Nâŋâc mamana â maŋɋârâŋ bâfuarâ mamana sarichec juhuc gie bapene fârine fuaekac i ŋic moczi giene mi bapa mâc juku ro rauc eekac. I wâc iŋuc jaha fâri tâmiric eekac â mi sâckeekac.
22Nâŋâc mâreŋko gie ʒocne fârone bahuc jueŋgopeneŋ, eme irec fârine wemo wiac moc fua‐nâreekac?
23Nâŋâc wiac ebac eeŋgopeneŋ izi dameŋ sâc busâqoc â aaric bâfua‐nâreekac, ehame ŋafeo wâc guŋ sâcne mi foeŋgopeneŋ. Irec i fâri tâmiric jaha eekac.
24Fuŋne iŋuc fokacte ŋic nâŋâc wiac hure hemârec eeŋgopeneŋ irec aŋac manarâ nânâ opâ nâhuc juhapene biaŋkeocmu mecne. No iŋuc manahuc ŋifec ʒiŋuc mana tarapo wâc: I Anuturaonec jaha ware‐nâreekac.
25Iŋuc mi fome muzac ine wemocko nânâ opâ nâhuc wiac gâcnere bubiaŋ wâc mananʒapeŋ.
26Anutu e mana‐jareme biaŋkeekac ŋic i jaŋe hâcne maŋɋârâŋ â mamana tara â ʒeri bubiaŋ tahac‐jopaekac. Ŋifec ine ŋic hehesicne jaŋe gie bapie fârine fuame ro qâzuc eniŋte mujareekac; i ŋic gâcne mana‐jareme boc biaŋkeekac jaŋe jareocte iŋuc eekac. Erâ sifu irec wâc mâmâc manape fâri tâmiric eekac, ine mezi mâŋâŋ rorâ basanaŋkezo eipieeŋgopeneŋ irec sâc.