Miti Mânec 7:2-14

²Râsi e laioŋ iŋucne kisucnuzackohec, ehuc moczi mi ŋezicnuha omaecnuzackohec.

³Wofuŋ Anutu‐nane, no keci jâmbomac epoo, eebapa repicne menaneo bohotakacko,

⁴no âgo moc wamane juha wiac gâgâpâcne ecnepoo, me moczi râsi enareme nânâ mafa jâoc ropoo,

⁵ine râsi e manacnehaŋ jâpecnuku bâfuacnuzejec, erâ âtefacnume mâreŋko qarâ fozepac, ehame ʒâŋe biŋe‐nane rufemaŋko duckezejec.

⁶O Wofuŋ, go kimbeŋgehec faharec, go râsifâc‐nane ʒonʒoŋ maickehuc fejarec, go okac babazure dâŋ mumeŋzi nore erâ mana ɋâɋârec!

⁷Ŋicne ŋicne jaŋe tumaŋnehuc rârecgunʒepieŋ, eme jowaru‐fârerâ faic ocna ŋeŋegao ŋezemec.

⁸Wofuŋ go ŋicne ŋicne dâŋ mutara‐jareekic. No tiŋne‐nanere sâcko mutara‐narec, Wofuŋ; norao maŋtaniŋ fokac, irec sâcko hâcne.

⁹Ŋic sindaŋne jaŋere sâqocne omaeoc me! Ŋic tiŋne ine goki kime dopec ecnezemec, maŋ â mamanasu ba esâic ecneekiczi, Anutu tiŋne rune go hâcne.

¹⁰Anutuzi maro‐nane jukac, eki hâcne ŋic maŋhumuc ŋezic‐jopaekac.

¹¹Anutu e mumutara tiŋne, erâ e ʒoaŋne ʒoaŋne bune gâpâreekac.

¹²Ŋic moc e maŋne mi bârisieme, Anutuzi sâqe‐ticne ʒâmuekac. Tepe‐ticnao gurutuc âteme hujec.

¹³Ʒikare wiac hâmoc bâbâfuanehec bâmockewec, tepe qâtâcneme ʒocbâruŋnehec ra kicjopaekac.

¹⁴Manakic, ŋic moc e maŋticnao sâqocne râe qâzuc eekac, eme sindaŋ kiweckehuc juku gibioc roekac.