Text copied!
CopyCompare
Kâte Bible - Miti Mânec - Miti Mânec 78

Miti Mânec 78:4-63

Help us?
Click on verse(s) to share them!
4i hâcne ɋâricfâc‐nâŋec mi hesoŋke‐jarehuc, jufeniŋmu jaŋe mufua‐jarezo: Wofuŋzi gie sâko bawec, â tâpiri‐ticne, â mâsi bawec irec binaŋne hâcne.
5Dâŋsanaŋ Jakobo erao âkendâŋnewec, Israe guru sâcmutâc biricke‐jarewec, i wâc ɋiefâc‐jeŋic jazahuc juniŋte, Wofuŋzi apafâc‐nâŋec mupaŋke‐jarewec.
6Ʒâhec‐guru hazec‐jeŋicko huocte muwec, ɋâricfâc‐jeŋic, mi fuakicne hâcne.
7Eme jaŋe wâc fahare ɋiefâc‐jeŋic binaŋ bajarepie, maŋjeŋic Anuturao siŋkerâ foha, eki wiac ewec irec mi nikec‐jopazejec, â mumupaŋ‐ticne reŋkehuc junʒepieŋ.
8Mimiŋnefâc‐jeŋic jaŋere sâc mi junʒepieŋ, jaŋe ŋic maŋrâŋgeŋ â qaqaharicne jumbiŋ; maŋjeŋic biric borocne fohuc juwec, mâro‐jeŋic Anuturao mi qohotawec.
9Eferaimte ɋâricfâc, tepe babaju, jaŋe ʒika dameŋko hâwic‐jopame wisembiŋ.
10Jaŋe Anuture ʒâʒâfic mi soŋaŋkembiŋ, â sâcmutâc bâjâpezo takic‐jopawec.
11Eki juwicnao gie sâko bawec, â mâsi jowatuwec, irec nikec‐jopawec.
12Mimiŋne jaŋere maio wiac bipinehec ewec, Aigita mâreŋko, Zoaŋ wâneŋko.
13E hâwec bâfâucke‐jareme fotâcnembiŋ, ŋifec â ŋifec tufa iŋucne domawec.
14Ʒoaŋ domaha karoracko bânie‐jarewec, â ŋafeo ʒoczi batamae‐jarewec.
15E mâreŋ tuhuo qânâ hefâucke‐jareme opâ ɋârâŋnea, ʒâkâŋkonec tinac nâmbiŋ.
16Qânâonec opâ fifisine wahawec, erâ fusi‐ticnehec rahuc domawec.
17Eme sifu ʒuhuckerâ sâqocne bahuc Anutu bunao bambiŋ, Femicne sâko tuhuo pepecne ecnembiŋ.
18Anutu maŋjeŋiczi esâickehuc andac‐jeŋicte sâcko nânâre mumbiŋ.
19Anutu pepec ecnehuc mumbiŋ, “Tuhuo nânâ sâcne bâmocke‐nâreocmu me?
20E qânâ i jâmbomac qâfâuckeme opâ ɋârâŋne wahahuc domawec; eme nânâ wâc sâcne tahac‐nâpoocmu, â ŋicfâcne qowi bâfua‐jareocmu me?”
21Wofuŋ e dâŋ i manarâ maŋne faharewec; maŋʒoc‐ticnezi Jakobo bâruŋkecnewec, kimbeŋ‐ticnezi Israe fahac fisicnewec,
22jaŋe Anutu mi manasiŋkembiŋte, â bafic‐ticnere mamanac mi jumbiŋte.
23Ehame sifu karorac wira‐jareme sambâŋ motâcne motâcne aŋkewec.
24Eme manazi hoe iŋucne wahawec, nânâ i sambâŋkonec jareme nâmbiŋ.
25Aŋelo nânâ i mâreŋŋiczi nâmbiŋ, ehuc hata nâsiŋ‐jeŋic mi basambiŋ.
26Eme ʒoaŋ wewefunaonec mâŋâŋ soreme rawec, ra juwic mâreŋkonec mâŋâŋ jâpeme wefuwec.
27Ehuc qowi beheme hoe tinac wahawec, sawa wipe ɋârâŋne, hâwec moŋgeŋ iŋucne.
28Hae toma‐jeŋicko behec‐jopame boze sâc rârec rârec waharâ fombiŋ.
29Andac‐jeŋicte jarewecte afecne mi nâmbiŋ, nâku nâku gapec‐jopawec.
30Eme aŋac‐jeŋic mi taraha, â qowi micjeŋicko foha,
31Anuture kimbeŋzi fahare‐jarerâ, ŋicfâc‐jeŋic tâpiri wânʒâŋ qâhâmoc‐jopawec, Israe ŋicʒeŋoŋ ɋiɋicne qâfiec‐jopawec.
32Eme jaŋe sifu ʒuhuckerâ sâqocne bambiŋ, mâsi‐ticne mana suahuc e mi manasiŋkembiŋ.
33Irec mume ʒoaŋ‐jeŋic nokafe iŋucne hesackewec, â jara‐jeŋic ʒâic fâro maŋko bazumbiŋ.
34Jopame sâc e wâsickembiŋ, ehuc maŋ bârisierâ Anutu wira basac ecnembiŋ.
35Jaŋe Anutuzi qânâ sanaŋ‐jeŋic domawec, â Femicne sâko Anutuzi fifirue‐jeŋic juwec, irec mocwâc manasumbiŋ.
36Erâ micbipic‐jeŋiczi âkeac ecnehuc nameŋ‐jeŋiczi burecdâŋ âzâcnembiŋ.
37Maŋjeŋiczi ine erao sanaŋne mi qohotawec, â ʒâʒâfic‐ticne mi basanaŋkembiŋ.
38Eki ine busâqoc mana‐jarehuc kiŋjeŋic behewec, ehuc mi bâsirowec‐jopawec. E dameŋ sâc kimbeŋ‐ticne bâuruŋkewec, â aaric‐ticne manacneme mi ʒâseŋ‐jopawec.
39Jaŋe mâreŋŋic sawa jumbiŋ irec manasuwec, nokafe iŋucne, rarâ mi ririsiene.
40Opopo, jaŋe dameŋne dameŋne mâreŋ sawao pepecne ecnembiŋ, â mâreŋ tuhuo buʒâic bâfuacnembiŋ.
41Jaŋe e esâickerâ esâicke ecnehuc jumbiŋ, ehuc Israere Tiri juju maŋbâiŋ ecnembiŋ.
42Jaŋe tâpiri sanaŋ‐ticnere mi manasuhuc jumbiŋ, â râsiraonec batarac‐jopawec irec nikec‐jopawec.
43E Aigita mâreŋko fuŋne‐ticne bataniŋkewec, â Zoaŋ wâneŋko mâsi‐ticne bâfuawec.
44E opâne opâne bâtikie‐jareme soc ewec, eme nâniŋte quŋke sâqorembiŋ.
45E nusuc neŋgec râe‐jareme kicjopambiŋ, â qaqec bâfua‐jareme imac‐jopambiŋ.
46E mâriri‐jeŋic qokic biŋe qajarewec, â gie‐jeŋicte fârine ɋirikiŋ qikiŋne‐jarewec.
47E waiŋ gie‐jeŋic hoe sanaŋzi qanʒaŋnewec, â jâchândâŋ‐jeŋic aisizi sipirickewec.
48E lama bulimakao gurufâc‐jeŋic huc repicne bâfua‐jareme hâmo miziec embiŋ.
49E kimbeŋ‐ticnere ʒocbâruŋ tuŋke‐jarewec, aaric, mamana sâqoc, â bâbâʒâic, â sisipiricte aŋelo guruhec.
50E ima qaqa‐ticne aka mi hecnehuc, â juju‐jeŋic hâmoc mi sakarecnehuc huc sâqocnere micko râec‐jopawec.
51E Aigita ŋic mârâc ŋokâ‐jeŋic, Hamte ɋâricfâc tâpiri‐jeŋicte hozine, i hae sâc qâhâmoc‐jopa‐fârewec.
52Erâ ŋicfâcne bânie‐jareme faharembiŋ, eme tuhuo lama guru iŋucne jowac‐jopawec.
53Aimuŋ hone maiŋ ejareme hâwicmâc jumbiŋ, râsifâc‐jeŋic ine hâweczi qâuruc‐jopawec.
54Izi tiri mâreŋ‐ticnao bacjopa fisiwec, mefâre‐ticnezi tiki ruckewec ira hâcne.
55Erâ mai‐jeŋicko qâpuc guru jâpec‐joparâ mâreŋ‐jeŋic kâdoc qahuctecne ŋeŋetac‐jeŋicko Israe guru râec‐jopawec.
56Jaŋe ine sifu Anutu Femicne sâko esâickehuc pepec ecnembiŋ, â mumutaniŋ dâŋticne mi bâjâpembiŋ.
57Jaŋe mimiŋnefâc‐jeŋic jaŋere hata âtehuc Anutu râpeckerâ bunao bambiŋ, ehuc tepe neŋgocne hehesicne iŋucne embiŋ.
58Jaŋe tiki sâc alata bahuc maŋbâiŋ ecnembiŋ, â nemuɋâŋ bajupie bune heâriŋkewec.
59Anutu e i manarâ maŋnao aaric fusucmame Israe guru behec‐jopa sanaŋkewec.
60E Silo haeo ŋeŋe juju‐ticne râpeckewec, ŋicŋondeŋko qoruc boze fârecnekicne i behewec.
61E tâpiri‐ticnere ma â eri‐ticne i qikiŋneme râsi jaŋe rombiŋ.
62Ŋicfâcne ʒikare micko râec‐jopawec, â fuŋfuŋfâcne kimbeŋ qajarewec.
63Eme ŋicmotecfâc‐jeŋic ʒoczi ʒacjopawec, â naru ŋokacfâc‐jeŋic ŋic tâmiric jumbiŋ.

Read Miti Mânec 78Miti Mânec 78
Compare Miti Mânec 78:4-63Miti Mânec 78:4-63