Miti Mânec 72:2-15

²E ŋic ŋokac gurufâcge dâŋjeŋic mutiŋnehuc muzejec, â hapetacfâcge sâcmutâc dâŋte sâcko ejarezejec.

³Tiki jaŋe mâreŋ rune mâriri bâfua‐jarenʒepieŋ, â mâreŋ facne jaŋe iŋuc jaha.

⁴E ine hapetac ŋezic‐jopahuc dâŋjeŋic muzejec, qarâ suriŋne kime dopec ejarezejec, â fejareeŋgopieŋ ine bâuruŋ‐jopazejec.

⁵Juju dameŋ‐ticne i ʒoaŋ qahuc juocmu irec sâc juzejec, erâ wâc mosa ŋehuc juocmu sâc, dameŋne dameŋne.

⁶Hoezi qinʒiŋ qakicnao heekac, e irec sâc ezejec, â mâreŋ kereŋne bâgunuckeekac iŋucne.

⁷Juju dameŋ‐ticnao ŋic tiŋnezi jusarickenʒepieŋ, â wama fohuc jaha juha mosa hâmozejec.

⁸Hae mâreŋ ruckeocmu i ŋifec hâwecko fisizejec, â ŋifec hâweckoa ratarazejec, erâ Eufrata opâ sâkoonec domarâ raku mâreŋ qaŋeŋnao mickezejec.

⁹Râsifâcne jaŋe maŋfuŋnao fodapenʒepieŋ, kisâfâcne rufe muduckenʒepieŋ.

¹⁰Tarasisionec â nucne nucne irec ŋicwofuŋ jaŋe taha bacne fisinʒepieŋ; Arabia â Etiopia mâreŋkonec micne bapa jaŋe sahac taha râcnenʒepieŋ.

¹¹Ŋicwofuŋ sasawa jaŋe dieŋzi hecnenʒepieŋ, ŋicguru ʒeŋgoma kiŋaŋ qacnenʒepieŋ.

¹²E ŋic hapetaczi kuku qacneme hone kitaŋ ecneocmu, â qarâ suriŋne me hone bafic tâmiric e iŋuc jaha ecneocmu.

¹³Ŋic bebetaŋne â hapetac ere bune sâqoreocmu, â tac qararacne juju‐jeŋic sabeckeocmu.

¹⁴Fific guguriŋ â bâbâʒâic maic‐jopaha batarac‐jopaocmu, â socjeŋicte maname furi sâko ekac.

¹⁵E dameŋ ʒora juzejec, â Saba mâreŋkonec gol tahackenʒepieŋ. Ere erâ ʒuʒuhuc numuhuc junʒepieŋ, ehame Anuture jambuŋzi erao wahahuc juzejec.