Miti Mânec 69:22-35

²²Jaŋacne tebozi wiwitic ejarezejec, â tiwâ bâzi‐jeŋiczi bitiŋ ejarezejec.

²³Go ʒâŋe‐jeŋic bâhâpotec tiŋtuŋ qanʒepieŋ, hoqaŋeŋ‐jeŋiczi qiric qârâc qahuc juzejec.

²⁴Aaricge hoŋketec fai‐jeŋicko fezejec, kimbeŋgere ʒocbâruŋzi qâhâsâc‐jopazejec.

²⁵Hae‐jeŋic tuhu fuazejec, ficjeŋicko ŋic moc mi juzejec.

²⁶Go ŋic qa bâtiŋ ejaremeŋ jaŋe fific guguriŋ ejareŋgopieŋ, â ŋic ʒâpâ jopameŋ jaŋe ʒâic bâsoka‐jareŋgopieŋ.

²⁷Go kiŋzi kiŋ ʒuhucke‐jarezemec, moc mi jowac rotec maigao bahac fâsâc enʒepieŋ.

²⁸Juju sanaŋte papiao ʒâŋe‐jeŋic hetâmirezemec, tiŋne jaŋere birio mi râec‐jopazemec.

²⁹No ine qarâ suriŋne â ʒâic hati jukopac; Anutu goki baficnurâ sabecnuzemec.

³⁰No Anutu gae hecnehuc muteŋkepemu, no daŋge âzâcnehuc muafeckepemu.

³¹Wofuŋ e irec mana biaŋkeocmu, bulimakao ʒuŋenehec â sârânehec bâzi rikecnepe muzac ine maname wawahane ezac.

³²Ro waha âte ejarekicne jaŋe i honerâ ʒeri enʒepieŋ; Anutu wira basac ecneeŋgopieŋ ŋoŋe maŋŋeŋic firiezejec.

³³Wofuŋ e tac qararacne jaŋere dâŋ manaekac, e fuŋfuŋfâcne niŋgiŋko foeŋgopieŋ jaŋe mi suŋgiŋ‐jopaekac.

³⁴Sambâŋ â mâreŋ jahe e mumbiaŋkezepirec, hâwec â maŋnao wiac qiriŋ qaŋgopieŋ sasawa jaŋe mâmâc.

³⁵Anutu e Zioŋ sisipirickonec bataraocmu, â Juda mâreŋko hae sesuc heɋâreocmu; eme kiŋaŋŋicfâcne jaŋe irec rune erâ junʒepieŋ.