1O Anutu, go nore Anutu, no honecguzo fifisacne fikopac, maŋ qâqâtâc‐nanezi gore hâmokac. Sahac biuc‐nanezi wâc gore hâhâŋkekac, i mâreŋ opâ tâmiric, kereŋke hahaŋ ekicne iŋucne.
2Irec tiri ufuŋko gore ʒâŋe fipo, tâpiri â eri tatamacge honepemurâ.
3Gore aki anonoczi furi sâko ehuc juju sirickekacte, micbipic‐nanezi mumbiaŋguzepac.
4Eme jufepemu sâc muteŋguhuc juzepac; menane bafaharehuc ʒâŋege wâsickezepac.
5Maŋ qâqâtâc‐nane gumeqiŋnetec manape, siec ɋârâc â wokemaŋ nâ gapec ekopac eekac. Micbipic‐nanezi ʒeri ehuc mumbiaŋguekopac.
6Ine ŋafeo fofo‐naneo dameŋ ʒora gore manasuhuc fope iŋuc fua‐nareekac.
7Goki hâcne hone bafic enarehuc juekicte, fakec rurumaŋgao ʒeri gae hehuc foekopac.
8Maŋ qâqâtâc‐nanezi go hariŋguekac, â mefâregezi dope hutuŋ enareekic.
9Â juju‐nane sipirickeniŋte ʒoɋac eeŋgopieŋ, jaŋe ine mâreŋ hofâhâŋnao ʒâziŋkeniŋmu.
10Jaŋe ʒikare micko râec‐jopazo, â kâte qâto jaŋere nânâ eniŋmu.
11Ŋicwofuŋ e ine Anuture bubiaŋ manaocmu. Â Anuture ʒâŋeo ɋetickehuc mumupaŋ dâŋ muniŋmu, jaŋere ʒâŋe biŋe fahareocmu; â burecŋic ine micjeŋic fitec qazo.
Miti Mânec 63
Miti Mânec 63:1-11