Miti Mânec 50:1-22

¹Qac momori, Wofuŋ Anutu, e dâŋehuc mâreŋ wiracnekac, wiwira‐ticne ʒoaŋ wewefuonec raku huhunao fisikac.

²Zioŋ, hawari biaŋte fâri wâmbuŋ, irecnec Anutuzi tamaehuc fua tâcnekac.

³Anutu‐nâŋec e fisikac, erâ dâŋemâc mi jukac, ʒocbâruŋzi ʒa ʒâtâc ehuc bâniecnekac, mâŋâŋ ɋicwânʒâŋneheczi râreckehuc bâjâpekac.

⁴E wirame faic sambâŋko fekac â mâreŋko wahakac, ŋicfâcne dâŋjeŋic mutaraocte:

⁵“Fuŋfuŋfâc‐nane hetumaŋ‐jopa‐nareniŋ, taha banarehuc nohec ʒâʒâfic embiŋ jaŋe hâcne.”

⁶Eme sambâŋzi mumutiŋ‐ticnere fuŋne bataniŋkekac, Anutu e jahac mumutara gie bakacte hâcne.

⁷“Kikefuŋ‐nane go manahaŋ noni dâŋ gazape, o Israe, noni mutaniŋgupe, no hâcne Anutu, gore Anutu.

⁸No taha bapagere erâ mi hanecgukopac, â bâzi ririkege i honehuc jukopac.

⁹No fic haegaonec bulimakao ŋicne, me sapagaonec noniŋ ŋicne moc mi ropemu.

¹⁰Kâteo qowi juŋgopieŋ i nore sasawa, â tiki sâc wiac jujune jurakac i iŋuc jaha.

¹¹No sawao wipe juŋgopieŋ i manac‐jopa‐fârekopac, â sopâcko wiac qiriŋ qahuc fokac i nore jaha.

¹²“No nânâre hâmorâ muzac go mi gazazapo, mâreŋ sâko mâreŋ â irec faio wiac fokac i rucke‐fârekopac i!

¹³No bulimakao biucne moc nâekopac? Me noniŋ socne moc nâekopac?

¹⁴Go Anutu daŋge âzâcnetec izi taha bâzige ezejec, ehuc Femicne sâko dâŋ mupaŋkecnemeŋ irec fârine bâfuazemec.

¹⁵Erâ ʒârâ hâriŋ dameŋko wâsicnuzemec, eme bataracgupe muafecnuzemec.”

¹⁶Â ŋic sindaŋne e ine Anutuzi ʒiŋuc âzâcnekac: “Go mozi mana‐gareha sâcmutâc dâŋnane woseekic, me micgezi ʒâʒâfic‐nanere dâŋ bâuaekic?

¹⁷Go bâbâtiŋ qaisockeekomec i! Â dâŋnane râpeckeekic i!

¹⁸Go fiuc roro ŋic moc honerâ âgo baekic, â boe sau ŋic jaŋehec ŋec domac eekic.

¹⁹“Go micbipicgezi gie repicne baocte manacneekic, â nameŋgezi eeatuc gie baekac.

²⁰Go qomâge musoriŋkeekic, â hahac ɋafâcge micko âkec ejareekic.

²¹Go wiac iŋucne ehuc jutec no dâŋemâc jupo; eme nore mumeŋ, e nore sâc jaha jukac. Miŋecgac ine hanecguhuc tutuc qagarekopac.

²²“Anuture ninikec jueŋgopieŋ ŋoŋe dâŋ ʒi mana‐hâmonʒepieŋ. Noni hesuec‐ŋopape ŋeŋezic basanʒipiŋ ine!