Miti Mânec 46:1-11

¹Anutu e dapeŋ sâko‐nâŋec â tâpiri‐nâŋec, ʒârâ ʒâpâo mi hetiric‐nâpohuc bafic‐nâpoekac.

²Irec mâreŋ e hetikieme bipic tatara mi enaŋmu, tiki jaŋe hâwecmaŋko huzo murâ huniŋ.

³Siri jaŋe fânâŋ ehuc wânʒâŋnehec qaniŋ, tiki mâreŋkopec hewiwickekupie qiriŋ qaoc.

⁴Rowaŋkonec opâ ʒâŋene ʒâŋene fisihuc Anuture haeo aŋac ʒeri bâfuaŋgopieŋ; hae i Femicne sâkore ŋeŋe hae hâcne.

⁵Anutu e maŋnao jukacte qiriŋ mi qaocmu, Anutu e furic uupictea ŋezickeocmu.

⁶Ŋic gurune gurune jaŋe iima sâko eŋgopieŋ, ŋicwofuŋ ŋeŋe ɋiɋitecke rakac, Anuture marac fânâŋte mâreŋ tâpirine goroŋkekac:

⁷Anutu Tâpiri Ɋuŋɋasaŋ Wofuŋzi nâŋâcnehec jukac, Jakobore Anutuzi huec sanaŋ‐nâŋec ekac.

⁸Wofuŋzi gie baekac i moc ware honeniŋ, mâreŋko ima sâko bâfuaekac hâcne.

⁹Mâreŋ qaŋeŋnao ʒikane ʒikane bâniniŋkeekac, tepe bazuekac, damu âte ʒuekac, â ʒikare keretac ʒoczi rikeekac.

¹⁰“Niniŋkerâ, no Anutu jukopac i mana taraniŋ, ŋicne ŋicne jaŋe sâsecnupie fekopac, mâreŋte faio sâsecnupie fekopac hâcne.”

¹¹Anutu Tâpiri Ɋuŋɋasaŋ Wofuŋzi nâŋâcnehec jukac, Jakobore Anutuzi huec sanaŋ‐nâŋec ekac.