Miti Mânec 42:2-9

²Maŋnanezi Anutu jujune gore boc hâmokac: Mo dameŋko fisirâ Anutu ʒâŋe maige honepemu?

³Ŋafe ʒoaŋ sâc ʒâŋeuc‐nanezi nânâ‐nane eekac, ʒoaŋ ʒora ʒiŋuc nazahuc juŋgopieŋte: “Anutuge wena?”

⁴No ʒâic manahuc wiac manasukopac i mufuape maŋnane urueoc: Ŋic guru dindiŋ biri ʒora jaŋere ŋondeŋko, Anuture ufuŋko rajumbeneŋ; ehuc hombaŋte ʒeri gae bafehuc hepene irec micʒonʒoŋzi baafec‐nâpowec.

⁵Maŋnane go wemocte boc gâpârekic? Â wemocte boc hâhâŋkekic? Anuture woŋec juc! E ʒâŋe mai‐nanere babafic â Anutu‐nane jukacte daŋge âzâcnepemu.

⁶No Jordaŋ â Herimoŋ mâreŋko â Miʒa tikio juhuc, maŋnane wahakacte Anuture manasukopac.

⁷Opâ sâro‐ticnezi rucneme ʒâkâŋzi ʒâkâŋ wiracnekac; jei, siri sâkogezi qâurucnu‐fârekac.

⁸Ʒoaŋ sâc wiraekopac, “Wofuŋ aki anonoc‐ticne fuaoc!” Ŋafe sâc gae‐ticnezi micnaneo foekac, â juju‐nanere Anutu e numucneekopac.

⁹Anutu qânâ‐nane âzâcneekopac, “Nore wemocte nikecguwec? No râsizi bâuruŋnume wemocte maku ehuc jukopac?”