Miti Mânec 40:6-16

⁶Taha bâzi fuŋne fuŋnere mi egareekac, hazeczi dâŋ mamana ine bâfua‐naremeŋ; qowi hâcbuc ririke me sâqocnere taha bapa, i fua‐gareocte mi muekic.

⁷Eme mupo, “Manakic, no fisikopac, miti papiao nore dâŋ qâreŋkekicne fokac:

⁸Anutu‐nane, no micge reŋkepere aŋacnukac, â sâcmutâc dâŋge maŋnaneo fokac.”

⁹Bâbâpiaŋte biŋedâŋ tutumaŋ sâkoo mufuapo, no micbipic‐nane aka mi hecnepo, i Wofuŋ, go gahac manakic.

¹⁰No bâbâpiaŋ giegere dâŋ i maŋnaneo mi hefackepo, erâ‐eesanaŋgere â aki anonocgere biŋe mupo; no tutumaŋ sâkore maio buurucge â dâŋfârige mi hesoŋkepo.

¹¹O Wofuŋ, go buurucge mi sakare‐narec, aki anonoc â jauŋfârige izi ʒimicnu basanaŋ ezejec.

¹²Ʒâic fâro fuŋne fuŋnezi bârârâŋnuŋgopieŋ, hehesic‐nane mi wowose‐fârenezi qâurucnuŋgopieŋ; jaŋe qizec susuc‐nanere ʒare jâuruŋgopieŋ, eme maŋnane wahakac.

¹³O Wofuŋ, manatec sâckeha bataracnuzemec, o Wofuŋ, fâro barâ ware baficnuc.

¹⁴Juju‐nane hetâcnezo muŋgopieŋ, jaŋe mâmâc sasawa qurutuarâ mimienʒepieŋ; no sisipiric fua‐nareocte ejarekac, jaŋe gorao qâwiwickerâ mamakucne enʒepieŋ.

¹⁵No “sowine, sowine” munareeŋgopieŋ, jaŋe mimi‐jeŋic manarâ sahac‐jeŋic gâgâmârâzejec.

¹⁶Â go wira basac egareeŋgopieŋ, jaŋe ine ʒeri ehuc bubiaŋ mana‐garenʒepieŋ; gore bâbâpiaŋte ejareekac, jaŋe dameŋ sâc munʒepieŋ, “Wofuŋ e kâcɋene.”