Miti Mânec 37:3-28

³Wofuŋtao roweckehuc eehâmo gie bazemec, eme mâreŋgao juhuc nânâ mi basacmu.

⁴Wofuŋte aŋac manahuc juzemec, eme maŋgezi wiac muocmu i tahacguocmu.

⁵Jujuge Wofuŋte meo râezemec, erao rowecketec guriŋ bagareocmu.

⁶Eme e bibiaŋge tatamac iŋucne bararuŋkeocmu, â tiŋne jujuge ʒoaŋ gereŋ gereŋ iŋucne.

⁷Wofuŋte maio niniŋkerâ woŋec‐ticne juzemec; moc e gie repicne manasu biric eku baocmu, eme gie‐ticne fârine fuame buge mi faharezejec.

⁸Aaric geŋkezemec, kimbeŋ bâec bacnezemec! Maŋge mi fârorockezejec, izi sâqocne bâfuacmu.

⁹Sâqocne bapa jaŋe hâcne juju‐jeŋic hetâcnezo, Wofuŋte woŋec juniŋmu jaŋe ine mâreŋ rauckeniŋmu.

¹⁰Sindaŋŋic e piticne sawa juferâ omaeocmu, go ŋeŋe hae‐ticnao fisi ʒâŋe firâ e basacmu.

¹¹Ʒâic mana‐bipiehuc jueŋgopieŋ jaŋe ine mâreŋ rauckeniŋmu, ehuc mazuc mâriri bâfuarâ aŋac faio juniŋmu.

¹²Ŋic repicnezi ŋic tiŋne dâŋ qacneekac, ehuc mic kikiaric kicneekac;

¹³Wofuŋzi ine ŋic repicne gâwiecneekac, dameŋ‐ticne bembeŋkeme honeekacte.

¹⁴Sindaŋŋic jaŋe sâqe unuckeeŋgopieŋ â tepe âpâreeŋgopieŋ, ŋic hapetac â qarâ suriŋne jopaniŋte, â tiŋne juju sipiric‐jopaniŋte;

¹⁵sâqe‐jeŋiczi jaŋacne bu âke mârâŋkeocmu, â tepe‐jeŋic bazuzo.

¹⁶Ŋic tiŋne juekac e wiac afecne rauckeocmu izi fekac, â sindaŋŋic bocjaha mazuc mâriri fojareocmu izi wahakac.

¹⁷Wemocte? Sindaŋŋic e mene qazuzo; â ŋic tiŋne juekac e ine Wofuŋzi dope hutuŋ ecneocmu.

¹⁸Wofuŋ e bahacmâc jaŋere dameŋ mana‐fârekac, â wiac rauckembiŋ i fosanaŋkerâ foocmu.

¹⁹Jaŋe dameŋ sâqocnao mimi qaqa mi fua‐jareocmu, â roroc dameŋko sifu nâ gapec ehuc juniŋmu.

²⁰Sindaŋŋic jaŋe ine sipirickeniŋmu; Wofuŋte râsifâc jaŋe ʒariŋ âri biaŋ iŋucne omaeniŋmu, hosâc iŋucne qaʒueniŋmu hâcne.

²¹Sindaŋŋic e wiac jaba roku okacne sâcne mi bâtikieekac, ŋic tiŋne e ine bokifac ehuc ŋic wiac tahac‐jopaekac.

²²Wemocte? Wofuŋte jambuŋ rokicnezi mâreŋ rauckeniŋmu, â sâwec‐jopawec jaŋe ine arictac eniŋmu.

²³Ŋiczi hata âte sanaŋkerâ juju i Wofuŋtaonec fuaekac, ine ŋic moc eebapa‐ticnere mana biaŋkerâ iŋuc ecneekac.

²⁴Iŋucnezi rândiŋkehuc sifu mâreŋko mi qaekac, i Wofuŋzi menao rorâ basanaŋkeekacte.

²⁵No socɋâri jupozi juku ŋicqizec ekopac, ehuc honehape ŋic tiŋnezi qarâ suriŋne moc mi ewec, â ɋiefâcne jaŋe nânâre mu huacbuc ee i wâc arictac.

²⁶E dameŋ sâc bokifac juekac â wiac buafec beheekac, â ɋâricfâcne jaŋe mâririre rowaŋ wâc eeŋgopieŋ.

²⁷Go sâqocne geŋkecnehuc eehâmo gie bazemec, iŋuc erâ sâcne juraʒihuc jucmu.

²⁸Wofuŋ e tiŋne jujure mana aŋac eekac, e mitiŋicfâc‐ticne mi behec‐jopaekac. Tiŋne jaŋe hone maiŋ ejareme juraʒihuc juniŋmu, sindaŋne jaŋere ɋâricfâc ine bâsirowec‐jopaocmu.