Miti Mânec 35:2-23

²Maruku maŋne sahacne hetec hume fahare ŋezicnuc!

³Sându ʒika rorâ, jâpecnuŋgopieŋ jaŋe maic‐jopac! Maŋ qâqâtâc‐nane âzâcnec: “No gore ŋeŋezic.”

⁴Juju‐nane omaeocte muŋgopieŋ, ŋic i jaŋe mimi busâqoc bâfua‐jarec! Sipiricnuniŋte manasuŋgopieŋ, jaŋe emâmâŋkerâ weaŋkenʒepieŋ.

⁵Wofuŋte aŋelozi hetapaic‐jopame, padi jawa iŋucne tâtienʒepieŋ.

⁶Wofuŋte aŋelozi jâpec‐jopa rame, dapâcko âte sowarierâ jopazejec.

⁷Jaŋe fuŋne tâmiricko bitiŋ râe‐narembiŋ, fuŋne tâmiricko omaepemurâ nombâŋ ronarembiŋ.

⁸Sisipiric acmâc jaha fisi‐jarezejec, bitiŋ râe‐narembiŋ izi jaŋacne kicjopazejec, nombâŋ‐jeŋicko hurâ omaenʒepieŋ.

⁹Eme Wofuŋ bubiaŋ manacnepemu, e baficnukacte kiwac qawac epemu.

¹⁰Me kikefâc‐nane muniŋmu, “O Wofuŋ, mozi gore sâc jukac? Go qarâ suriŋne e ŋic qac momorihec ere meonec bataraekic, â hapetac huacbucne e fiuc rorore meonec bataraekic.”

¹¹Burec micko âkec ŋiczi maicnueŋgopieŋ, erâ wiac kâuc bakopac irec wio‐nareeŋgopieŋ.

¹²Jaŋe wiac biaŋnere okacne sâqocne bâtikie‐nareeŋgopieŋ, enarekupie bekâ mâsiŋ iŋucne jukopac.

¹³No ine huc bacjopame busâqoc ŋaqi rojupo, sowa juhuc sahac‐nane qapo, qizeczi dunduŋ hurâ numuhuc jupo.

¹⁴Âgo qomâ moc hâmome eeŋgopieŋ irec sâc epo, me neŋgoc‐nane hâmome ezapo, irec sâc dunduŋ dadape rac warec jupo.

¹⁵No dâŋzi fâfâcnume ine aŋac‐jopaha tureŋgopieŋ, no wiac enareniŋte manasuhuc tumaŋneŋgopieŋ; ŋic pâpârâcne, ʒâŋe furu‐nane, iŋucnezi musoriŋnuhuc domaŋgopieŋ.

¹⁶Jaŋe sâke kiki dâŋ muhuc muhuc, noraopec mic kikiaric kiŋgopieŋ.

¹⁷Wofuŋ, go hone qâoma eku mo dameŋko behecmu? Ʒika‐jeŋickonec bataracnuc, juju‐nane laioŋ mickonec batarac.

¹⁸Eme no tutumaŋ sâkoo daŋge gazapemu, ŋic guru dindiŋko mumbiaŋgupemu.

¹⁹Maŋgâŋ râsi enareeŋgopieŋ jaŋe mana‐jaretec, sowine wiac fuacnekac muhuc mi aŋac‐jopazejec; â fuŋne tâmiric qaisocnueŋgopieŋ jaŋe ʒâŋe bazuc mi enarenʒepieŋ.

²⁰Jaŋe wamadâŋ mi mueŋgopieŋ; erâ ŋic wamane juraŋgopieŋ jaŋe ine eatuc‐jopaniŋte mamanasu gie baeŋgopieŋ.

²¹Jaŋe noraopec mâretec aŋkehuc ʒiŋuc muŋgopieŋ: “Jei, ʒâŋe fâri‐nâŋeczi qame honembeneŋ i!”

²²Wofuŋ, go i honemec i! Irec dâŋemâc mi juc! O Wofuŋ, behecnurâ taicko mi juc!

²³O Anutu, Wofuŋ‐nane, qiriŋ qarâ ɋârec, erâ dâŋnane dopeckehuc mutiŋnec.