Miti Mânec 31:4-24

⁴Bitiŋ soŋsoŋko râe‐narembiŋkonec unucnuc, go hâcne dapeŋ‐nane jukomec.

⁵Megao maŋ qâqâtâc‐nane râekopac, goki furi‐nane bameŋ, o Wofuŋ, erâ‐eesanaŋ Anutu.

⁶Nemuɋâŋ jabane bajueŋgopieŋ jaŋere takicguekac, no ine Wofuŋ gorao qohotaekopac.

⁷No aki anonocgere aŋacnuha bubiaŋ manakopac, goki huacbuc‐nane ʒâŋitameŋte, â maŋʒârâ fua‐nareha hone jauŋ enaremeŋte.

⁸Erâ râsifâc‐nane jaŋere meo mi râecnuhuc, kike‐nane tomao râetec âte sanaŋkepo.

⁹O Wofuŋ, no bugâpâcko jukopacte aki anonoc enarec; ki busâqoc ekupe ʒâŋe‐nane kitutuckekac, erâ maŋ qâqâtâc â sahac‐nane betaŋkekac.

¹⁰Busâqocko juhape juju‐nane omaezo ekac, husehuc juhape jara‐nane tarazo ekac. Qarâ suriŋne jukuhape tâpiri‐nane wahakac, â me kike‐nane hâmo ɋaŋac ekac.

¹¹Kisâfâc‐nane sasawa nifepupu enareeŋgopieŋ, qomâfâc‐nane jaŋe bâec bacnueŋgopieŋ; manacnuŋgopieŋ jaŋe hâhâwic banareeŋgopieŋ, hae ʒoŋao honecnueŋgopieŋzi wise‐nareeŋgopieŋ.

¹²Hâmokicne jaŋere nikec‐jopaekac iŋuc nore ninikec fuakac, kuʒi qanʒaŋnekicne tinac ekopac.

¹³Bocjahazi saŋuc ʒiŋuc qapie manaekopac: “Wiac hâhâwicne.” Ehuc juju‐nane nowac roniŋte turerâ dâŋ nazaŋ gazaŋ eeŋgopieŋ.

¹⁴No ine Wofuŋ go manasiŋguhuc ʒiŋuc muekopac: “Go nore Anutu.”

¹⁵Dameŋ‐nane gore meo fokac; râsi enarehuc guriŋnueŋgopieŋ, jaŋere meonec bataracnuzemec.

¹⁶Ʒâŋe maigezi kiŋaŋŋicge no tamae‐narezejec; aki anonocgezi baficnuzemec.

¹⁷O Wofuŋ, go wâsicgukopacte, qurutuapemurâ moc mi mana‐narezemec. Ŋic sindaŋne jaŋe qurutuahuc, dâŋ fâsâe‐jareha hâmoc haeo hunʒepieŋ.

¹⁸Burecŋiczi penaroŋ â sahac fefe ehuc, ŋic tiŋne juekac e musoriŋkeeŋgopieŋ, jaŋe nâŋguŋ enʒepieŋ.

¹⁹Buurucge i araŋ bagareeŋgopieŋ jaŋe bâmocke‐jaremeŋ, erâ buuruc hâcne ŋicmaio gore dapeŋko soŋkeeŋgopieŋ jaŋe bâfua‐jaremeŋ, buuruc i mo iŋucne sâko!

²⁰Go ʒâŋe maigere sâsâoczi ŋic jaŋere ʒikadâŋte sabec‐jopaekic. Go bozegao soŋjopatec, râsidâŋzi mi sipiric‐jopaekac.

²¹No Wofuŋ mumbiaŋkepe! E hae sanaŋko juhape mâsi bahuc, aki anonoc‐ticne bâfua‐narewec.

²²No jâmbomac hâwicnume mupo, “Ʒâŋe maigaonec bârâriecnurâ taicko râecnukicne.” Eme baficnucmurâ kuku qagarepe, sifu ki owa‐nane manameŋ.

²³Mitiŋicfâc‐ticne sasawa, ŋoŋe Wofuŋ maŋzi jauŋkeniŋ! Ŋic siocmâc jaŋe Wofuŋzi hone kitaŋ ejareekac, maŋfefe jaŋe ine okacne bafehuc jareekac.

²⁴Wofuŋte woŋec juŋgopieŋ sasawa, ŋoŋe hâbi‐ŋeŋic ronʒepieŋ â maŋŋeŋic mi wahazejec.