Miti Mânec 25:1-18

¹No maŋ qâqâtâc‐nane Wofuŋ gorao sâsepe hefakac.

²O Anutu‐nane, go manasiŋgukopac, irec manahaŋ mi qurutuazepac, kisâfâc‐nane jaŋe nifepupu mi enarenʒepieŋ.

³Jâmbomac, gore mamanac juŋgopieŋzi mi qurutuanʒepieŋ, otec ɋeticne jaŋe ine bawahac‐jopatec mimienʒepieŋ.

⁴Eebapage nowatutec hone manac ezepac, Wofuŋ; hatage forakac i qazu‐narezemec.

⁵Dâŋfârige maŋnao jowacnuhuc qazu‐narezemec, go hâcne bâbâpiaŋ Anutu‐nane, ʒoaŋ ʒora gore mamanac juekopac.

⁶Wofuŋ, buuruc â aki anonocgere manasuzemec, i hâcne fufuŋke tâmiric fowarehuc juwec.

⁷Socɋâri juhuc sindaŋ â qaqatara epo i mi manasuzemec, aki anonocgere sâcko ine manasu‐narezemec, i gahacne biaŋte erâ ezemec, Wofuŋ.

⁸Wofuŋ e maŋuruc â tiŋne rune, irec ŋic sindaŋne tiŋne hata jowatuekac.

⁹Maŋhuhuŋ jueŋgopieŋ jaŋe eebapa tiŋnao jowac‐jopaekac, ehuc jahacne hata qazu‐jareekac.

¹⁰Wofuŋte hata sasawa i aki anonoc â erâ‐eesanaŋ, ʒâʒâfic â sâcmutâc‐ticne basanaŋkeeŋgopieŋ, jaŋe ira jowac‐jopaekac.

¹¹O Wofuŋ, ʒâŋe biŋegere erâ kiŋnane behezemec, kiŋnane i ŋemâcne.

¹²Ŋic wenizi Wofuŋ araŋ bacneekac, e hâcne hata âteocte mucnekicne i jâutuocmu.

¹³Eme e jahacne sâcne juhâmoocmu, â ɋiefâcne jaŋe mâreŋ rauckeniŋmu.

¹⁴Araŋ bacneeŋgopieŋ jaŋe Wofuŋzi âgo ejareekac, erâ ʒâʒâfic‐ticne mutaniŋke‐jareekac.

¹⁵No Wofuŋtaopec jaha ʒâŋe fihuc juekopac, eki kike‐nane wiwitickonec qâunuckeocmu.

¹⁶Wofuŋ, goki maicnurâ âgo enarec me, no bebekâne juhuc huacbuc ekopac.

¹⁷Buʒâiczi ɋârâŋkehuc maŋnane kidapekac, irec ʒârâ hâriŋkonec bataracnuc.

¹⁸Qarâ suriŋne â buʒâichec jukopac i honec me, ehuc sâqocne bâtâmire‐nare‐fârec.