Miti Mânec 18:3-44

³No Wofuŋ, mumuteŋte hozi, e wira wâwâsic ecneekopac, eme râsifâc‐nane jaŋeraonec bataracnuekac.

⁴Hâmocte repazi hariŋnuwec, sisipiricte rumizi bârârâŋnuwec;

⁵hâmoc haere niŋgiŋ qâfisecnuwec, hâmocte bitiŋ bâmbeŋkepo.

⁶Bipic tara‐nareme Wofuŋ wâsickepo, Anutu‐nanezi baficnuocte ki owa epo. Ufuŋ‐ticnao marac fânâŋ‐nane manawec, ki owa‐nanezi hazec‐ticnao qaqazuwec.

⁷Eme mâreŋzi ɋiɋiteckerâ suriŋkewec; tikire hobeteŋne wâc ɋarac ɋarac qawec; i ere kimbeŋte iŋuc fuawec.

⁸Sâke hawec‐ticnaonec hosâc wahawec, micticnaonec ʒocbâruŋ wefuwec, ʒoc kine iiŋnerâ râwiŋnewec.

⁹E sambâŋ bârâriehuc tara wahawec, kike rurumaŋ‐ticnao duŋdapâc fowec;

¹⁰kerubim fainao ŋehuc sawao warewec, mâŋâŋte faio acmâc jaha wahawec.

¹¹Dapâczi foŋkehuc ŋaqi ecnewec, karorac opâneheczi orâŋkehuc ficboze ecnewec.

¹²Mai‐ticnao tatamac fowec irecnec hoe sanaŋ hândâŋne â ʒoc uucne, karorac‐ticne hemârâŋkerâ wahawec.

¹³Wofuŋzi wâc sambâŋko ɋuŋ hewec, Femicne Sâkozi dâŋfânâŋ ewec, hoe sanaŋ hândâŋne â ʒoc uucnehec.

¹⁴E tepe‐ticne qâtâcneme râwiŋnerâ rame tâtiembiŋ, bâbâric‐ticne wicke‐jareme hâwic‐jopame wisembiŋ.

¹⁵Eme hâwec ʒâkâŋ fâhâŋne tâtâc fuawec, â mâreŋte hobeteŋzi fua taniŋkewec. O Wofuŋ, hahanec dâŋgere iŋuc ewec, kimbeŋgere micrombâŋ hâcne.

¹⁶E faic juhuc meticne sicnerâ rocnuwec, ʒâkâŋ sâkoonec fârecnume wefupo.

¹⁷Râsi wânʒâŋ‐nanere meonec bataracnuwec, â qaisocnumbiŋ jaŋere tâpirizi siricnuha sifu mejeŋickonec bâhocnuwec.

¹⁸Dameŋ gâgâpâcne maicnume quruŋ herâ fisi‐narembiŋ, ehame Wofuŋzi ine sacfozic enarewec.

¹⁹E unucnurâ toma sâkoo râecnuwec, nore aŋackewecte bataracnuwec.

²⁰Wofuŋ e tiŋne jupo irec furine narewec, menane ɋaɋacne honehuc okacne bazu‐narewec.

²¹No Wofuŋte hata paŋʒâic bâjâpepo, â sindaŋ ehuc Anutu‐nane mi râpeckepo.

²²Tiŋne juju‐ticnere dâŋ i dameŋ sâc hone dendeŋneekopac, â dâŋsanaŋ‐ticne moc mi bâsuepe raekac.

²³No ere maio bahacmâc jupo, â kiŋhec ezipore bâec bahuc jupo.

²⁴Irec Wofuŋzi tiŋne juju‐nanere sâcko okacne narewec, menane ɋaɋacne fome ʒâŋenezi honewec irec sâcko.

²⁵Ŋic maŋuruchec e maŋuruc hawari fuacneekic, ŋic siocmâc e siocmâc hawari fuacneekic.

²⁶Ŋic maŋɋaɋac e maŋɋaɋac hawari fuacneekic, ŋic bâbâŋoricne e bâbâŋoricne hawari fuacneekic.

²⁷Ine hâcne, ŋic waha qaqane bafic‐jopaekic, â maŋfefe ʒâŋe fieŋgopieŋ jaŋe ine bawahac‐jopaekic.

²⁸Jâmbomac, goki lambe qaze‐nareekic, go Wofuŋ Anutu‐nanezi dapâc‐nane batamaeekic.

²⁹Jâmbomac, gohec râsi guru sâcne qâtâtiec‐jopapemu, no Anutu‐nane gohec qânâsac sâcne qambaraŋkepemu.

³⁰Anuture hata i qarâ biaŋ, Wofuŋte dâŋ i fâri fideteŋ, ere dapeŋko soŋkeeŋgopieŋ jaŋe ʒeŋgoma sabec‐jopaekac.

³¹Wiac Wofuŋtao ʒuhuckehuc mo Anutu mo jukac? Me Anutu‐nâŋectao ʒuhuckehuc mo qânâ sanaŋ mo domakac?

³²Anutu eki hâcne tâpiri joma‐narewec, erâ wâc hata‐naneo ʒârâ ʒâpâ bârâriewec.

³³Kike râe‐narewec i kâte bulimakao jaŋere kike iŋucne, erâ tikitoŋko âkendâŋnuwec.

³⁴E menane ʒika gie qazucnewec, eme aeŋ tepe neŋgoc sâcne fârehuc juekopac.

³⁵Goki sâsâoc maro biaŋge tahacnumeŋ, â mefâregezi âkesiŋnumeŋ, erâ hone maiŋ enarehaŋ sokapo.

³⁶Go âte sanaŋkepemurâ mâreŋ sawane bâfua‐naremeŋ, eme kike‐nanezi biric borocne mi ewec.

³⁷No râsifâc‐nane jâpec‐jopa raku siric‐jopapo, erâ omaec‐jopaku jaha risiepo.

³⁸Henʒaŋ‐jopakupe fahareniŋte eipiembiŋ, kike‐nanere rurumaŋko rândiŋkerâ fombiŋ.

³⁹Ʒika qaqare tâpiri joma‐naremeŋ, ehuc râsifâc‐nane bârokawec‐jopatec docke‐narembiŋ.

⁴⁰Go râsifâc‐nane ejarekutec râpecnurâ wisembiŋ, eme qaisocnumbiŋ jaŋe imac‐jopapo.

⁴¹Jaŋe kio wâwâsic embiŋ, eme ŋeŋezic moc mi fuawec; i Wofuŋtao embiŋ, eme dâŋ okacne mi risiewec.

⁴²Henʒaŋ‐jopakupe mâŋâŋzi rufe ficne sueekac iŋucne embiŋ, hae ʒoŋaonec jawa sânʒâŋ beheeŋgopeneŋ irec sâc behec‐jopapo.

⁴³Ŋicne ŋicne jaŋehec ʒika qawefuhape baficnumeŋ, qâpuc guru jaŋere micne râecnumeŋ, ŋicguru kâuc bacjopapo jaŋe kiŋaŋ qanarembiŋ.

⁴⁴Biŋe‐nane manarâ izia micnane reŋkembiŋ, ŋic furunezi fisirâ dape‐narembiŋ.