Miti Mânec 145:9-21

⁹Uruc jauŋ‐ticnezi mâmâc sâko rocjopaekac, â meqâreŋfâcne busâqoc mana‐jare‐fâreekac.

¹⁰Wofuŋ, go meqâreŋfâcge jaŋe ʒeŋgoma daŋge gazanʒepieŋ, â mitiŋicfâcge sasawa jaŋe muteŋgunʒepieŋ.

¹¹Guriŋ bapagere eri tatamac muafeckenʒepieŋ, â tâpirige musokanʒepieŋ.

¹²Eme gie tâpirihec baekic izi mâreŋŋic hazec‐jeŋicko huzejec, â guriŋ bapagere eri tatamacte kâuc mi banʒepieŋ.

¹³Gore uucmaŋ i uucmaŋ fofo sanaŋ, â guriŋ bapage i mimiŋzi ɋâric fohuc juocmu. Wofuŋ e dâŋticne siocmâc sasawa, â wiac bapa‐ticne sasawa i qâreŋ biaŋ.

¹⁴Wofuŋ e rândiŋkezo eeŋgopieŋ jaŋe dopec‐jopaekac, â badapec‐jopakicne jaŋe bafaharec‐jopaekac.

¹⁵Ʒeŋgoma gorao ʒâŋe fieŋgopieŋ, goki dameŋ mukicnao nânâ jarecmurâ.

¹⁶Go mege baratieekic, eme wiac jujune sasawa jaŋe nâ aŋac eku gapec‐jopaekac.

¹⁷Wofuŋ e tiŋne juhuc wiac‐ticne ebac efâreekac, e uruc jauŋhec juhuc gie‐ticne bafâreekac.

¹⁸Wofuŋ e mu wâwâsic ecneeŋgopieŋ, jaŋe sasawa fisi qâtec‐jopaekac, siocmâc mu wâwâsic ecneeŋgopieŋ jaŋe hâcne.

¹⁹Araŋ bacneeŋgopieŋ sasawa jaŋe wiac mueŋgopieŋ i jareekac, wiwira‐jeŋic manarâ bafic‐jopaekac.

²⁰Wofuŋ e maŋzi jauŋkeeŋgopieŋ jaŋe sasawa hone maiŋ ejareekac, ŋic sindaŋne jaŋe ine bâsirowec‐jopaekac.

²¹No micnanezi Wofuŋte ʒâŋe biŋe mutaniŋkezepac, â mâreŋŋic sasawa jaŋe tiri ʒâŋe‐ticne tatara tâmiric muteŋkehuc junʒepieŋ.