Miti Mânec 132:6-16

⁶Oc, nâŋe Efarata haeo, qorac tapa katapare biŋe manambeŋ, erâ Jara wâneŋko fârine bâfuambeŋ.

⁷Ajoc, warepie ficticnao raʒinaŋ, kike‐ticnere ââtesiŋko dunduŋ hunaŋ.

⁸O Wofuŋ, go fahare ŋeŋemana haegao rac, go â tâpiri qorac tapa katapage.

⁹Taha bapafâcge jaŋe tiŋne juju hepie huzejec, â mitiŋicfâcge jaŋe ʒeri bari enʒepieŋ.

¹⁰Kiŋaŋŋicge Dawidire erâ, wokemaŋ ruacnemeŋ e mi suŋgiŋkezemec.

¹¹Wofuŋzi Dawidi dâŋ moc mujomirecnewec, dâŋ fârine, moc mi bebehene: “Gore bifuŋkonec fuaniŋmu jaŋeraonec moc eri ŋeŋegao hepe ŋeocmu.

¹²Ŋokâfâcge jaŋe ʒâʒâfic â sâcmutâc dâŋnane qazu‐jarepemu i baju sanaŋkeniŋmuo ine ŋokâfâc‐jeŋic jaŋe iŋuc jaha, eri ŋeŋegao tatara tâmiric ŋehuc junʒepieŋ.”

¹³Jâmbomac Wofuŋzi Zioŋ rowosâewec, ehuc ira ŋeŋe juju eocte ʒiŋuc muhuc sakarewec:

¹⁴“Ŋeŋemana hae sanaŋ‐nane ʒine hâcne, irec enarekacte ʒira ŋec juc epemu.

¹⁵No nânâ rowaŋ‐ticne fehuc jambuŋkepemu, hapetacfâcne gumec‐jopape nâ gapec eniŋmu.

¹⁶Taha bapafâcne tiŋne juju hejarepe huocmu, â mitiŋicfâc‐ticne jaŋe ʒeri bari eniŋmu.