Mithali 19:4-21

⁴Utajiri huongeza marafiki wengi, bali mtu masikini hutengwa na rafiki zake.

⁵Shahidi wa uongo hatakosa adhabu na mwenye kupumua uongo hataokoka.

⁶Wengi wataomba fadhila kutoka kwa mtu mkarimu na kila mtu ni rafiki wa yule anayetoa zawadi.

⁷Mtu masikini huchukiwa na ndugu zake wote; je marafiki wengi kiasi gani hujitenga kutoka kwake! Anawaita, lakini wameondoka.

⁸Anayepata hekima huyapenda maisha yake mwenyewe; yeye atunzaye ufahamu atapata kilicho chema.

⁹Shahidi wa uongo hatakosa kuadhibiwa, bali mwenye kupumua uongo ataangamia.

¹⁰Haifai kwa mpumbavu kuishi kwa anasa- wala kwa mtumwa kutawala juu ya wafalme.

¹¹Busara humfanya mtu achelewe kukasirika na utukufu wake ni kusamehe kosa.

¹²Ghadhabu ya mfalme ni kama muungurumo wa simba kijana, bali fadhila yake ni kama umande kwenye majani.

¹³Mwana mpumbavu ni uharibifu kwa baba yake na mke mgomvi ni maji yanayochuruzika daima.

¹⁴Nyumba na utajiri ni urithi kutoka kwa wazazi, bali mke mwenye busara hutoka kwa Yehova.

¹⁵Uvivu unamtupa mtu kwenye usingizi mzito, bali asiyetamani kufanya kazi atakwenda njaa.

¹⁶Yeye anayetii amri huyaongoza maisha yake, bali mtu asiyefikiri juu ya njia zake atakufa.

¹⁷Mwenye ukarimu kwa masikini humkopesha Yehova na atalipwa kwa kile alichofanya.

¹⁸Mrudi mwanao wakati kuna matumaini na usiwe na shauku ya kumweka katika mauti.

¹⁹Mtu mwenye hasira kali lazima alipe adhabu; kama ukimwokoa, utafanya hivyo mara mbili.

²⁰Sikiliza ushauri na ukubali maelekezo, ili uweze kuwa na hekima mwishoni mwa maisha yako.

²¹Moyoni mwa mtu kuna mipango mingi, bali kusudi la Yehova ndilo litakalo simama.