MII GUN MIINU MO 5:11-41

¹¹Dhali moŋḵogu caaca yayi’da p̱o/ ḵaniisa ’baar mo dhali ap̱o/ uni ’baar mo kun ciḵ to gwansan mo be.

¹²Dhali ki me’d gi imandhunu ki she/ mo tani momer ka ris dhali dhan mii caaca si’da/ miikunu mo ibwaŋ ’kwani mo be, dhali uni ’baar mo ’kon ki bwan ṯal ’de/ eya lambalany ma Sulemaan mo.

¹³Hili ’peni uni gun ’ko ki she/ mo tani wathiŋ kamu/ yisa di’da jin eni uni mmo’dish mo is mo. Hili ’kwani maŋ uni kagahara mo be.

¹⁴Dhali imangam gwo is mo maru is ki nyanye/ e Tap̱a mo, awaambuhany ’kwani kun ta ’kwaniŋ gwas uni ki up̱i lu/ mo.

¹⁵To miikunu ki nyanye/ mo tani uni si’da/ ki ḵal kum ’bathan e bway mo dhali ’thi uni eya ci mo dhala birish si’da/ mo ka Buṯerus mmopena a’di uni mo tani aḵashiram piti midi ’taki wup̱a p̱o/ unin tiya ’peni bwam uni mo be.

¹⁶Dhala waambuhany ’kwani si’da/ iiyin mmonṯal ’de/ mo ’peni pa kun ’kon is ’ko’d ’peni Pa Urushaliim mo mmo’doyu/ ’kwani kun ’bathan mo dhali uni gun ṯoju bwa ka rum thus kun nyo/on mo dhali uni ’baar wac̱kunu ki ’beles mo be.

¹⁷Dhala gasiis jin ca’d doshki’d ki mis mo dhali uni ’baar mo kun nyaḵ ’ko ki a’di mo (uni kun ta c̱eŋ ’Kwani Sadukiyiin) dhali uni ’tu’du/ mo ki mondeeya du mo

¹⁸dhali uni ki bu’th imandhun ma Yesus ki she/ mo dhali dhu uni mo e mo jin jinu ’kwani mo.

¹⁹Hila man’doyu gwo gi Tap̱a mon’thiny mo tani a’di ḵa’dki’da sijin ’twaŋkal mo dhali sus uni ka pije/ mo dhali o gwo mo ki:

²⁰Iiyi um mo dhali doshi mo dhali ṯor ’kwani aris gwo ’baar mo gom mondiki/e yan e gu’b gi mondheleladhelel mo.

²¹Dhali ki uni ciḵ yan mo tani uni sekin e gu’b gi mondheleladhelel ki mo ḵali kush mo dhali uni ki ṯor gwo mo. Hili agasiis jin ca’d yayi’d mo dhali uni kun nyaḵ ’ko ki a’di mo dhali yuḵ uni mo imontul is buni yan imonṯal ’de/ mo dhali montul isa kamu/ ki ’kwani gwanyjaḵa/ gi ’Kwani ma Israyiil mo dhali uni ki hash gwo i gu’ba sijin ki uni minu susu mo be.

²²Hili iboliish kun iikin mo tani uni ’koki gam uni eya sijin mo dhali uni doḵkin mo dhali ṯor gwo mo

²³mmo/o gwo mo ki: Gu’ba sijin gamkina am ki mu’th ki ’dantar mo dhali imanhil mo mo mmodosh ishan’tamo/ mo. Hili ki am ḵa’dkina a’di mo tani am ’konaki gam wathiŋ kamu/ nycine/ mo.

²⁴Dhali ki tap̱a jin ca’d ki imanhil gu’b gi mondheleladhelel mo dhali igasiis kun can mo ciḵ gwo gwansan mo tani uni duŋkurkin ma du is mo gom uni mo mmomina to yan ita ata mo.

²⁵Dhali jin ṯal ’de/ yayi’d mo dhali ṯor uni gwo ki: Hili mo mo ma, ’kwaniŋ gwas kun dhukina um eya sijin mo tani uni ’kon e gu’b gi mondheleladhelel mo mmodosh mo dhali mmoṯor ’kwani gwo mo.

²⁶Ŋ’ko’d Tap̱a jin ca’d gi imanhil gu’b gi mondheleladhelel mo uni ki iboliish mo tani uni iikin mo dhali sus uni ki dar gi mondor mo haali/ uni ki ḵo/ ’kwani mo gom uni minu ’taki ’kosh ki wosh mo.

²⁷Dhali ki uni suski uni mo tani uni ki dhu uni ibwambor montul is buni yan mo. Dhala gasiis jin ca’d doṯki uni gwo mo

²⁸mmo/o gwo mo ki: Am ḵankina um gwo ki ’bi’th mo mmo’koki ṯor gwo ki gway yansan mo, dhali hili ma, um ’tu’di Pa Urushaliim ki gwonṯor bum mo dhali um o ki guya bas wathi/ yan mmokara p̱o/ am mo.

²⁹Hila Buṯerus dhali imandhun ma Yesus ki she/ mo uni thoḵ gwo mo dhali o gwo mo ki: Am mina mii mii gwo ma Arumgimis mo, yisa jiŋ ’kwaniny’cesh yisa.

³⁰Arumgimis gi ibabam bana ’de’kki’da Yesus jin ’kosha um jwa mo mmohankina um a’di imis cwa mo.

³¹A’di karkin ma Arumgimis ki ca ki me’da bim poros piti mo mmota Amanṯel Mondiki/e ’Pen mo dhali ka Manwoṯẖ mmoc̱i mo jin rijuwa du is ki ’Kwani ma Israyiil mo dhali moŋgwam gom miinthus mo.

³²Dhali am tana iman/o gwo gom to gwansan am ki Shi/in Dheleladhelel si’da/ jin c̱in ma Arumgimis gom uni kun ha gwom piti e mo mmomii mo be.

³³Hili ki uni ciḵ gwo yansan mo tani uni c̱ithirkin ma dum buni ka nyor mo dhali ’kona gwo bwa mo mmo’kosh uni jwa mo.

³⁴Hili jan ṯal ’de/ doshki’di bwam uni imontul is buni yan jin ta Wathim P̱arisi jin yuḵu ka Ghamala/iil jin ta’da manṯor gwo gom gwoŋḵan jin c̱inu mo dhali a’di jin taḵu ki momaŋ caaca ibwam ma ris ’kwani ’baar mo. Dhali a’di ḵanki gwo ki uni mini thoṯẖki imandhun ma Yesus ki she/ is ’ko’d naskina/ mo.

³⁵Dhali a’di ki o uni gwo mo ki: Um ’Kwani ma Israyiil, ’cunycuri is bum mo ma gom ’Kwani gwansan mo gom to kun mura umi mii mo.

³⁶Haali/ ka cim jin ṯwa/a/ gwansan mo tani Ṯẖudaas doshki’d mo mmoṯor is piti ki a’di ita jaŋ kamu/ jin ca’d mo. ’Kwaniŋ gwasa tiya wana e ki iss ’kwanimpa i/iss ’de/ mo gam is buni me’d ki a’di jin ’koshu jwa mo, dhali uni ’baar mo uni kun mii gwom piti mo tani uni c̱ekerkunu bwa mo dhali toŋ kamu/ yisa gamu ’peni a’diya.

³⁷’Ko’di wathi/ yan mo tani Yahuusa gi Pany Jaliil ka cim gi moŋ’kwaru ’kwani gway mo a’di doshki’d si’da/ mo dhali a’di ki sus ’kwanin tiya per mo mmobaṯẖ a’di mo. A’di si’da/ this e mo dhali uni ’baar mo, uni kun mii gwom piti mo tani uni si’da/ c̱ekerkunu bwa mo.

³⁸Dhali shwane/ aha/ ona um gwo mo ki: Ḵwa/i is bum bwa mo ’peni ’kwani gwansan mo dhali dhalki uni ’kon uni ’cena mo. Haali/ waḵki/ gwo jin onu yan walla mii yan ta jiŋ ’kwani mo tani a’di minu ’taki p̱i e mo be.

³⁹Hili waḵki/ a’di ta ji ma Arumgimis mo tani um mini mol p̱i uni e mo be waḵki/ um minu ’taki gam mo mmo’ko mmo/asa p̱o/ Arumgimis kan mo.

⁴⁰Dhali gwom piti gama uni me’d mo. Dhali ki uni yuḵki imandhun ma Yesus ki she/ i uni mo tani uni ki dor uni mo dhali ḵan uni gwo mo ki uni mini ’koki o gwo ki gway ma Yesus mo dhali uni ki dhal uni mo mmo/ii mo be.

⁴¹A’di iina uni mo ’peni bwambori montul is yan mo mmo’bora uni bwa mo ki uni dhunu ki montaḵ wakan mmo’kosha uni is ka nyor kan ki mon’the is mo gom gway yan mo be.