MII GUN MIINU MO 4:9-17

⁹waḵki/ am ka cim yaase ṯirrishu ki gwo mo gom miim ’boro’d jin miikunu mo gom wathi/ jin dumpulki ya mo tani dhali ki mii ja ŋala/ wac̱u/ wathi/ yan mo tani

¹⁰dhalki a’di mishu mo ibwam umi ’baar mo dhala ris ’Kwani ma Israyiili ’baar si’da/ mo ki gway ma Yesus Ḵrisṯẖos gi Pa Naasira mo tani jin ’kosha um ki cwany’ciṯẖan dhul mo dhali jin ’de’kkin ma Arumgimis mo ’peni mowu mo tani e a’di yan tani wathi/ yan doshki’di mahan ibwambori um ki mowac̱ is mo be.

¹¹A’di ta wosh jin karkunu ki dhan wosh gi ’pena bi mo wosh yan jin ushkina um ki ’tash mo, um kun ta imannyaŋ gu’b mo.

¹²Dhali mowoṯẖ yisa di’da e wathiŋ kamu/ yisa haali/ gwaya kamu/ yisa di’da i’bame’d momis jin c̱inu ibwaŋ ’kwaniny’cesh ki ana minu mii woṯẖ mo e a’di mo be.

¹³Hili ki uni p̱arkina Buṯerus dhala Yohaan e mo ki uni ’koki ju/ ’kwani mo tani dhali gam gwo ki uni ’koki ta ’kwani kun ’kon mmohila warka/ mo dhali ki uni si’da/ ta ’kwani gun moli to tani uni merkin kagahara mo. Dhali uni nyiṯẖkin ki uni nyaḵki ’ko ka Yesus mo.

¹⁴Dhali mmomisha uni wathi/ jin wac̱u/ mo mmodosh nyaḵki uni mo tani uni moli gwoŋ kamu/ o ap̱o/ a’di mo.

¹⁵Hili ki uni ḵanki uni gwo mo mmo/ii ka pije/ ’peni montul is buni yan mo tani uni ki ṯora ṯor ka rem ’kup̱ mo

¹⁶mmo/o gwo mo ki: Ana mina miiya ta ki ’kwani gwansan sa/? Haali/ ka jiŋ gana/ a’di ṯoru eya tente/ ibwam uni ’baar kun ’kon e Pa Urushaliim mo ki miimer jin misha ’kwani ’baar mo miikunu mo e uni mo dhali ana mola a’di waṯ mo be.

¹⁷Hili jin mina a’di diki p̱ala ibwaŋ ’kwani naskina/ mo tani dhalki ana ḵana uni gwo ki ’bi’th mo ma, gom to kun mina ana ’taki mii ap̱o/ uni mo jin mina uni ’koki ṯor wathiŋ kamu/ ṯal ’de/ gwo mo e gway yan ’peni mo yan ki sule/ mo be.