MII GUN MIINU MO 27:17-38

¹⁷Dhali ki uni yu’dki a’di ki mis mo tani uni miiki to woṯẖ mo mmohakam is ma ḵur mo ki ton deḵ mo dhali mmoḵo/ ka uni is mo ki uni minu ’taki biṯ ap̱o/ mo ma Sirṯis mo tani uni ’cuḵki burrinye/ ma ḵur jin bela ’tham mo dhali wakan uni ’kokunu mo mmobor mo be.

¹⁸Dhali ki aman ’kokina mo mmo’kosha ṯu’c ki mii ki nyanye/ gom dhan ’thama p̱unthar mo tani ka cim jiŋ ’ko’d uni ṯelki mii ’pen mo mmoḵal to kun ḵalu mmoṯa’k ka pije/ ’pena ḵur yi’de/ mo.

¹⁹Dhali ka cim kwara mo tani uni ki me’d buni uni ’cena iṯa’kki cwam burrinyen ’tham ma ḵur yi’de/ ka pije/ mo.

²⁰Dhali ki dar ga tente/ mo walla acul mo mmokusha p̱o/ aman ka cim ka ris mo dhali ki dhan ’thama p̱unthar jin wa’da iyayi’da p̱o/ aman mo dhali arisa ’teŋ kap̱em bam jin minu ’taki woṯẖ am mo tani thisu e ’baar ki ’bil ’bil mo.

²¹Dhali ki uni ’kokin ki rash rash ki dar gi tonṯe/ mo tani aBuulus doshki’d ki mis mo ’peni bwam uni mo dhali o gwo mo ki: Kana, um mini ’taki ha isi gwom pem e mo mmo’taki ’koki ’cuḵa ḵur yi’de/ jin bela ’tham ’peni Paŋ Kariiṯ mo dhali um mini ’taki ye mon tonthus yan mo dhali to gwansan kun thisu e si’da/ mo.

²²Dhali shwane/ aha/ malasa um ki gwo mo. Tayi gi bwam ’boro’d mo ma haali/ jamu/ ṯal ’de/ midi diki this mondiki/em piti e ’peni bwam um mo hili jasa ḵur yi’de/ ’te/ mo.

²³Haala man’doyu gwoŋ kamu/ ’peni Arumgimis doshki’d e aha/ mon’thiny yan mo aha/ jin tana jim piti mo, a’di jin miiga/ to si’da/ mo

²⁴mmo/o gwo mo ki: Dhalku/ is ki ḵo/ mo ma, Buulus. /E mini mii doshi bwambor ma Kaysar mo dhali hili, Arumgumis midi c̱i ki /eya ris uni gun nyaḵ ii ki /e eya ḵur yi’de/ jin bela ’tham mo.

²⁵Haali/ a’di gi wakan mo tani kana, tayi gi bwam ’boro’d mo ma haali/ aha/ gama Arumgimis gwo is ki a’di midi mii mii wakan me’d jin okunu aha/ gwo mo be.

²⁶Hili ana minu mii ṯaka p̱o/ moŋ kamu/ jin ta ara uḵa ’cesh mo be.

²⁷Hili ki mon’thiny jin ta’da ’kume’d i’ce’dka doŋon p̱u’dki’d mo tani aman ’kokunu mmobor ki yi’dem babaŋgal eya dhan yi’de/ ma Adriya ki mo murki’di ta mombwam/e mo tani imanmiiya ḵur yi’de/ ṯoshkin ki uni ’kokin mo mmo’dish bampaŋ kamu/ is mo be.

²⁸Dhali uni biṯki to mo mmopal ’kul gi dhan yi’de/ mo dhali uni gamki a’di mo mmota eŋgula/ iss ’kwanimpa ipe’de/ mo dhali ’ko’di ari mo jin thoṯẖa uni is mo tani uni biṯki to doḵ/e mo mmopal ’kul piti mo dhali uni gamki a’di mo mmota eŋgula/ iss ’kwanimpa idoŋon i’ce’dka ’kume’d mo be.

²⁹Dhali mmoḵo/kina aman is mo waḵki/ aman minu ’taki ṯa’k mo a’cesh ap̱o/ ’kuwosh ’kwaḵala/ mo tani uni ṯa’kkina ḵar ’kup̱ toŋḵuthu’d jin ṯelki’da ḵur yi’de/ mo idoŋon ’peni bum ’pen jiŋ ’ko’d mo dhali ’tho moŋkush ki a’di bala midi di kakasjayi.

³⁰Dhali ki imanmiiya ḵur ’kokin mo mmoŋap̱ki mo mo mmoso ka pije/ ’peni bwam ma ḵur yi’de/ mo dhali thulka ḵur yi’de/ eya dhan yi’de/ e mii jin diki ta jamas mii me’d jin mina uni ’taki beredha ḵar ’kup̱ toŋḵuthu’d jin ṯelki’da ḵur yi’de/ mo ’peni bum ’pen ma kamu/ jin ṯwa/a/ mo tani

³¹aBuulus oki gwo eya mancil ma askar iss ’kwanimpa imudhe’d mo dhali i/askar si’da/ mo ki: Isi ciki/ mmo’kokina gwansan ki ’koki ’ko eya ḵur yi’de/ mo tani um minu mol woṯẖ mo be.

³²Ŋ’ko’d i/askar ’ciṯẖkina shi/ ma ḵur yi’de/ ’pen mo dhali mmodhal a’di mmobiṯku mo be.

³³Dhali ki moŋkush ma tente/ di’d mmoyayu/ mo tani aBuulus ŋap̱ki uni ’baar mo mmoshwa tonṯen tiya mo mmo/o gwo mo ki: Atee yan ta’da cim ma ’kume’d i’ce’dka doŋon mo jin c̱ora um mo dhali ’kona um mmoga/ to mo dhali um ’koki bu’th toŋ kamu/ mo be.

³⁴Haali/ a’di gi wakan mo tani aha/ yuḵkina um mo mmobu’th tonṯen tiya mo haali/ a’di ta mo jin ta mom bum ki ’dantar mo. Haali/ ara mur’kup̱ ṯal ’deŋ kamu/ midi diki ’ce’d sho’k ’peni ’kup̱ bum ki jin ’deŋ kamu/.

³⁵Dhali ki a’di oki gwo yan kan tan mo tani dhali a’di bu’thki maaŋḵuthu’d mo dhali a’di ’borki’da Arumgimis bwa i is e buŋ’kusi uni ’baar mo. Dhali a’di ’ce’dki a’di mo dhali ṯel a’di ’pen mo mmoshwa mo be.

³⁶Dhali mmo’borkina uni bwa mo tani uni ki is buni si’da/ bu’thki tonṯe/ mo be.

³⁷Dhali aman ’baar mo kun ’kona eya ḵur yi’de/ mo tani aman ’kwanimpa tana iss ’kwanimpa i’kume’d i’ce’dka kwara ap̱o/ i’ce’dka ḵarpa’c i’ce’di ’de/ mo be.

³⁸Dhali ki uni shwakini kap̱ mo tani uni pashkina ḵur yi’de/ to is mo mmoṯagku ka pije/ mo pos bunyan eya dhan yi’de/ mo.