MII GUN MIINU MO 21:17-38

¹⁷Dhali ki am merkina e Pa Urushaliim mo tani awaḵ bu’thki am mo ki bwaŋ ’kunyga/ mo.

¹⁸Dhali ka cim ki jim baṯẖ mo tani aBuulus ya’di bwam am eya Yakuub mo dhala ris ’kwaniŋ gwanyjaḵa/ ’kon mo.

¹⁹Dhali ki a’di theki uni me’d mo tani a’di ṯorki uni gwo mo ka ’deṯe/ ’deṯe/ gom to kun miikin ma Arumgimis ibwaŋ ’kwani kun ’koki ta ’Kwani Yahuuda/ eya ṯu’c piti mo be.

²⁰Dhali ki uni ciḵki a’di mo tani uni karkina Arumgimis ki ca mo dhali uni oki a’di gwo mo ki: Misha /eya mudhu, ’kwani wakina risa e bwaŋ ’Kwani Yahuuda/ ’peni uni gun gamki gwo is mo dhali uni ’baar mo shwana nyor mo gom gwoŋḵan jin c̱inu mo.

²¹Dhali uni ṯorkunu gwo mo gom /e ki /e din mo mmoṯora ris ’Kwani Yahuuda/ gwo kun ’kon ibwaŋ ’kwani kun ’koki ta ’Kwani Yahuuda/ mo mmodhal gwo ma Musa ’pen mo mmo/o uni ki uni mini dhalku/ uc̱im buni ki ’ciṯẖa/ munyjal yis buni mo dhali mmodhalku/ ki c̱iya hirdhe/ si’da/ ki mii kun onu mmomii mo.

²²Ata mina ana mii mo sa/ gom a’di mo? Uni mini ciḵ gwo ka jiŋ gana/ ki /e p̱u’dkin mo.

²³Haali/ a’di gi wakan mo tani miiyi a’di jin mina amani ’taki o /e mo. Aman tana gi ’kwaniŋ gwasi doŋon kun ’kona to i’bam buni mo be.

²⁴Budhi gwan mo ma dhali thosoni is pini ki dhelel dhelel nyaḵki uni mo dhali c̱a’bi /e mo ma gom to gun minu doṯ mo gom uni ki uni mini mish ’kup̱ buni ’thi mo be. Dhala ris ’kwani ’baar mo mini mish ki a’di diki ta gwoŋ gana/ gom to kun ṯorkunu uni gom /e mo hili /e ki is pini si’da/ iyan mo mmodiki tor ci ’twa/ mo mmodhu gwoŋḵan jin c̱inu mo.

²⁵Hili gom ’kwani kun ’koki ta ’Kwani Yahuuda/ kun gamki gwo is mo tani am ’kwarkina gwo mo mmoc̱i gwo jin gamkunu me’d mo ki uni mini non is buni mo ’peni to gun ’ciṯẖu/ mo mmomiiya basa ’cesh mmoluŋ tomp̱inycon mo dhali ’peni miin to ma bas mo dhali ’peni to gun minyciru ’kus mo dhali ’peni mo jin miinu miinyc̱al si’da/ mo.

²⁶Dhali ŋ’ko’d mo tani aBuulus ki bu’th ’kwani mo dhali ka cim jiŋ ’ko’d mo tani mmothosonkina a’di is piti ki dhelel dhelel nyaḵki uni mo tani a’di yaki’d e gu’b gi mondheleladhelel mo mmoc̱i gwo mmo’baara cim gi mo jin thosonkunu is ki dhelel dhelel mo ntagi to minu c̱i mo a’di jin c̱ikunu eya tente/ mo gom uni gwansani ’baar ka ’deṯe/ ’deṯe/ mo.

²⁷Dhali ka cim ma pesu/ ’dishki’di ’baar mo tani ’Kwani Yahuuda/ ’peni Pa Asiyya ki uni p̱arki a’di e e gu’b gi mondheleladhelel mo tani uni c̱i’thkina waambuhany ’kwani is ki mii mo dhali uni ṯẖa’thki a’di me’di is mo be

²⁸mmocuu gwo mo ki: ’Kwani ma Israyiil, woṯẖi/ aman mo ma. Wathi/ yansan ta a’di jin ṯorki’da ris ’kwani ’baar mo gwo mo e mo ’baar mo ap̱o/ ’kwani dhali ap̱o/ gwoŋḵan jin c̱inu mo dhali ap̱o/ mo yansan mo. Dhali a’di si’da/ suski ’Kwaniŋ Griḵi si’da/ e gu’b gi mondheleladhelel mo dhali mo yan jin ḵogu mo karkina a’di mo me’d mo jin dinuki ḵo/ mo be.

²⁹Haali/ uni nṯwa/a/ mishki a’di e bampa/ nyaḵka Ṯurup̱iimus jin ta Wathi/ gi Pan Ep̱asus jin ṯoshkina uni ka Buulus nsuski a’di e gu’b gi mondheleladhelel mo.

³⁰Dhala ris ’kwanim bampa/ cuki mis mo dhali ’kwani sokin mo imonṯal ’de/ mo dhali uni ki budha Buulus mo dhali dir a’di ka pije/ ’peni gu’b gi mondheleladhelel mo dhali ki jahanne/ acampur mu’thkunu mo be.

³¹Dhali ki uni ’kon mmoŋap̱ a’di mo mmo’kosh mo tani gwo p̱u’dki’d e mis eya mancil ma askar alip̱ ki mo jin jin ma askara ji ka ris mo e Pa Urushaliimi ’baar mo ’kokin mo ka c̱ulma’th mo be.

³²Dhali ki jahanne/ a’di bu’thki i/askar mo dhali imancil ma askar iss ’kwanim pa imudhe’d mo dhali thulkin mo ka ŋwac̱a/ a’cesha p̱o/ uni mo dhali uni, ki uni mishki imancil ma askar alip̱ mo dhali mishki i/askar mo tani uni daḵana Buulus ’kosh mo.

³³Dhali yan’ko’d mo amancil ma askar alip̱ p̱u’dki’d mo ki ’dishe/ mo dhali bu’th a’di mo dhali ḵan gwo mo ki a’di minu deḵ mo ka jindhiiri su/ mo. Dhali a’di doṯki gwo mo ki a’di ta’da ja sa/ mo dhala ta miikina a’di mo.

³⁴Dhali kun tiya cuun mo nton ’de/ mo dhali kun tiyan tiya ibwaman ma waambuhany ’kwani mo dhali ki a’di moli gwoŋ ḵa’b yan jin ḵa’bu mo ka c̱ulma’th mo tani a’di ḵanki gwo mo ki a’di minu sus mo e gu’b gi i/askar mo.

³⁵Dhali ki a’di p̱u’dki’d ap̱o/ mo jin senu mis mo tani a’di warki’d ki mo jin ḵalkin ma askar a’di ime’d mo gom mii yan jin ḵal ma waambuhany ’kwani mo be.

³⁶Haala waambuhany ’kwani baṯẖani baṯẖi ’ko’d mmocuu gwo mo ki: Guyi a’di mo ma.

³⁷Dhali ka Buulus muru susu gu’b gi i/askar mo tani a’di oki’da mancil ma askar alip̱ gwo mo ki: Miga/ o gwoŋ kamu/ e /e mo ’taa? Dhali a’di o gwo mo ki: ’Twaŋ Griḵi wala /e ’taa?

³⁸/E diki ta Wathi/ gi Pam Masir yan si’da/ jin dhuki ’kwani alaap̱i doŋon kun ta iman’kosh tiya jwa mo mmo/eḵ mii kagahara mo dhali jin suski uni ka pije/ mombwaasho ka cim kagush yin mo ’taa?