MII GUN MIINU MO 19:6-16

⁶Dhali ka Buulus dhuki me’d piti ap̱o/ uni mo tani Shi/in Dheleladhelel yayi’di uni mo dhali uni wal ’twan tiya mo dhali c̱i gwo is mo be.

⁷Dhali uni ’baar kun ’kon mo tani uni wana e ki ’kwani kun tana ’kume’d i’ce’dka su/ mo be.

⁸Dhali a’di seki’d e gu’b gi montul is mo dhali c̱i gwo ki dar gi monyju/ mo ka ppe ’kup̱i kwara mo mmoṯora ṯor ka ḵarambuye/ mo dhali mmomalasa malas ki gwo mo gom to gi Bampa/ ma Arumgimis mo.

⁹Hili ki kun tiya ’bi’thkunuwa du is mo dhali ushki gwo gam is mo dhali mmo/okina uni gwon thus gom gwo gi Bway yan ibwambor ma waambuhany ’kwani mo tani a’dim Buulus yaki’d ’peni uni mo dhali a’di ḵwa/ki imanciḵ gwo mo mmodhu uni ki she/ mo mmoṯora ṯor ka ḵarambuye/ ka yempa/ e mombuṯ e Pan Ṯiraannus mo be.

¹⁰Dhali mii yan miikunu ki sule/ ki sule/ mo jin ta yil su/ mo be. Gom a’di ki mii yan kan mo tani a’di ciḵkin ma ris uni kun ’koni Pa Asiyya gwon Tap̱a mo dhali kun ta ’Kwani Yahuuda/ mo dhali ’Kwaniŋ Griḵi si’da/ mo be.

¹¹Dhali Arumgimis miiki miimer jin ta ji mum ki me’d ma Buulus mo.

¹²Gom a’di ki mii yan kan mo tani a’di ’dona uni burrinyeny jiṯi/ mo walla burrinyen ṯu’c ’peni is piti e uni kun ’bathan mo dhali mom’ba’th iikin mo ’peni uni mo dhala rum thus kun nyo/on iikin ka pije/ mo be.

¹³Hili si’da/ kun tiya ’peni ’Kwani Yahuuda/ kun tani pa mo kun ta imandwaḵa rum thus mo tani uni palki mii mo mmoyer gway gi Tap̱a Yesus ap̱o/ uni gun takin ga rum thus mo mmo/o gwo mo ki: Aha/ ḵana um gwo mo ki gway ma Yesus yan jin c̱in ma Buulus gwo mo.

¹⁴Dhali a’din ’deŋ kamu/ jin ’kona iya/i pesu/ jin yuḵu gway ka Sakaawa jin ta Wathi/ Yahuuda/ mo dhali jin ta’da gasiis jin ca’d si’da/ kun miiki mii yan mo.

¹⁵Dhala rum thus thoḵki ’twa/ mo dhali o uni gwo mo ki: Yesus yan nyiṯẖka/ mo dhala Buulus yan mishga/ mo. Hili um ta ija sa/?

¹⁶Dhali wathi/ yan jin din ma rum thus icine/ mo tani a’di p̱e’da p̱o/ uni mo dhali p̱i uni ’baar mo e ki mii mo dhali bol uni ’kup̱ ki mom’bi’th ap̱o/ uni mo. Gom a’di ki mii yan kan mo tani uni son ka pije/ mmoye mo ’peni gu’b c̱aan ki ushi burrinye/ kun ’koni bwamani is ’te/ mo dhali ki jama/ i is si’da/ mo.