MII GUN MIINU MO 19:22-34

²²Dhali mmohashkina a’di uni su/ ibway gi Pam Makiduniyya uni kun mii a’di to mo kun ta iṮimuṯẖawuus mo dhala Arasthuus tani a’di ki is piti c̱a’bki’d mo e Pa Asiyya naskina/ mo be.

²³Dhali ka cim c̱aan mo tani mii piki’d mo, mii jin miinu ka serec̱ yisa gom gwo gi Bway yan mo.

²⁴Haali/ wathiŋ kamu/ jin yuḵu gway ka Dimiṯriyuus jin ta’da mantor ’dolkon kush mo dhali jin ta’da man/uḵ ushi to ’peni ’dolkon kush kun wana e ki dhan gu’b jin ca’d jin luŋuwa Arthamiis nycine/ mo dhali a’di ḵalki’da ṯu’c jin ’ka’da mii yisa gom itap̱a kun ta gi ’kwaniŋ gwocon mo.

²⁵Uni tulkina uni is mo imonṯal ’de/ mo nyaḵki uni kun miina ṯu’c ka ḵwam bwa ki ji nyaḵ mo dhali o gwo mo ki: Kana ba/. Um mishkin ki tom bana kun tana ana mo tani ’pena ṯu’c yan mo.

²⁶Dhali um mishkin mo dhali um ciḵki gwo ka Buulus yan malaski ’kwani ki gwo mo dhali ṯu’k uni ka ris mo, yisa jasi e Pan Ep̱asus a’di ’de/ yisa hili si’da/ mo muru/ ’baar mo be isi bwaman gi Pa Asiyya ’baar mo mmo/o gwo mo ki: To gun uḵu ki me’d mo tani yisa ta to kun luŋu mo yisa

²⁷dhali yisa jasi mo di’d e mo jin ṯagu wu mo jin min ma ṯu’c bana yan ta ṯẖuthu/ ki ṯẖuthu/ mo a’di ’de/ yisa, hili si’da/ gu’b gi luŋuwa dhan tony caaga/ yan jin yuḵu gway ka Arthamiis si’da/ minu ’taki war ka ha’th’ko’d mo dhali ki a’di si’da/ minu ’taki gac̱ ’peni mo/eḵ piti mo jin luŋa ’Kwani gi Pa Asiyya ’baar mo dhali ku ji mony’ceshi ’baar mo si’da/.

²⁸Dhali ki uni ciḵki gwo yan mo tani uni ’tu’du/ ka nyor mo dhali cuukin kagahara mmo/o gwo mo ki: A’di jin ta jin eḵa/ eḵ tani a’di ita’da Arthamiis gi Pan Ep̱asus mo.

²⁹Dhali kum bampa/ yansan ’tu’du/ ki mo ma c̱ulma’th mo dhali uni ṯẖa’thkin ki bwan ṯal ’de/ e dhan mo jin ta montul is jin biruwa bir mo mmobu’thkina uniya Ghayuus mo dhala Aristarḵus kun ta ’Kwani gi Pam Makiduniyya kun ta imannyaḵ ii ka Buulus mo.

³⁰Dhali ka Buulus dina gwo ibwa mmose i bwaŋ ’kwani mo tani imanciḵ gwo nonki a’di ’kup̱ mo be.

³¹Dhali kun tiya si’da/ ’peni ’kwani kun tana ’kaŋ’kup̱ ki mo gi Pa Asiyya mo tani mmotana uni imugum piti tani uni hashki a’di gwo mo dhali malas a’di mo jin mina a’di diki c̱i is piti ki ya mo e mo jin ta montul is yan jin biruwa bir mo.

³²Dhali kun tiya si’da/ cuuni ton ’de/ mo dhali kun tiya si’da/ i tiyan tiya mo. Haali/ montul is yan ta’da c̱ulma’th mo be dhali uni ’kon ka ris kun molki to jin tulkina uni is kan mo be.

³³Dhali uni suskina Iskandar ka pije/ ’pena waambuhany ’kwani mo mmokarkina ’Kwani Yahuuda/ a’di eya tente/ ki ṯẖorony mo. Dhala Iskandar wuḵki uni ki me’d mo dhali midi ’taki woṯẖ gwo is gom ’kwani mo.

³⁴Hili ki uni nyiṯẖkin ki a’di ta Wathi/ Yahuuda/ mo tani uni ’baar cuukin ki ’twan ṯal ’de/ mo ki mo jin wana e ka tente/ su/ mo ki: A’di jin ta jin eḵa/ eḵ mo tani a’di ita’da Arthamiis gi Pan Ep̱asus mo.