MII GUN MIINU MO 18:12-20

¹²Hili ka Ghaliyuun ta’da mudhiir gi Pa Aḵaa/iya mo tani ’Kwani Yahuuda/ ki bwan ṯal ’de/ mo tani uni ṯẖa’thkin mowa p̱o/ Buulus mo dhali sus a’di ibwambor ma ḵursi jin dwallu gwo mo

¹³mmo/o gwo mo ki: Wathi/ yansan lalki ’kwani sho’k ki gwo mmoluŋa Arumgimis ki mii kun ta kuny c̱a’ckon ap̱o/ gwoŋḵan jin c̱inu mo.

¹⁴Hili ka Buulus murki’di c̱ee ’twam piti mo tani aGhaliyuun ki o ’Kwani Yahuuda/ gwo mo ki: Waḵki/ ka jiŋ gana/ a’di midi ’taki ta mii shi/i’d mo walla mii jin ta jin thus mo dhali jin ta ji ma maḵa/ gany mo tani ayy um ’Kwani Yahuuda/ mo, adu midi ’taki ṯucaa/ mmo’taki gu is ’peni um mo.

¹⁵Hili waḵki/ um ta gi gwondoṯ gom gwon tiya mo dhali gwaya tiya mo dhali gom gwoŋḵan bum jin c̱inu mo tani hili gwo gom a’di um ki is bum mo ma. Aha/ dinaki ta gi bwa mmota amandwall gwo gom gwo gwansan mo be.

¹⁶Dhali a’di urki uni ’pena ḵursi jin dwallu gwo mo.

¹⁷Dhali uni ’baar mo ’ce’dkina Susṯaniis me’di is mo a’di jin ta tap̱a gom gu’b gi montul is mo dhali uni ki dor a’di mo dhali sus a’di e bwambor ma ḵursi jin dwallu gwo mo. Dhala Ghaliyuun dina gwo ki di ibwa gom ton ṯal ’deŋ kamu/ gwansan mo be.

¹⁸Dhala Buulus mmoc̱a’bkina a’di ka cim ka ris naskina/ mo tani a’di bu’thki moyam piti ’pena waḵ yan mo dhali yaki’d eya ḵur yi’de/ jin bela ’tham mo ki bway gi Pan Suriyya mo dhala Piriskilla dhala Akiila nyaḵ ii ki a’di mo mmo’ciṯẖa/ a’di amur’kup̱ piti e Paŋ Kanḵariya mo haali/ a’di ta gi gwo jin okina a’di is mo be.

¹⁹Dhali ki uni p̱u’dkin e Pan Ep̱asus mo tani a’di ki dhal uni imun mo. Hili a’di a’di ki is piti seki’d e gu’b gi montul is mo dhali ṯorki’da ṯor ka ḵarambuye/ ki ’Kwani Yahuuda/ mo be.

²⁰Dhali ki uni doṯki a’di mo mmoc̱a’bi uni naskina/ mo tani a’di ha gwo e yisa.