MII GUN MIINU MO 16:26-36

²⁶Dhali ise/ adhan mony’cesh yiḵinki is kagahara mo tani a’di yiḵinkina mo jin ḵa’bu gu’ba sijin is mo. Dhali ise/ arisa campuri ’baar mo tani ḵa’dkunu mo dhala ris mondeḵ gi uni ’baar mo ka ’deṯe/ ’deṯe/ mo tani sulkunu mo be.

²⁷Dhala manc̱ora sijin mmomeru a’di e mo ’peni mo/ish e mo tani dhali mmop̱arkina a’di acampura sijin e mmo’ko ki ḵany mo tani a’di buḵki gandala turgam piti mo dhali murki’di ’taki ’kosh is piti jwa mo mmoṯoshkina a’di ki ’kwani habuus yekin mo be.

²⁸Hila Buulus cuuki’d ki dhan ’twa/ mmo/o gwo mo ki: Dhalku/ to shiyi’da kamu/ ki mii gom is pini mo ma. Haali/ aman ’baar mo ’kona imahan mo.

²⁹Dhali a’di yuḵki’da yuḵ gom o’d mo dhali p̱e’di bwaman mo dhali mmodeena a’di is mo gom moŋḵo/ is mo tani a’di biṯki’da ’cesh ibwambor ma Buulus mo dhala Sila mo

³⁰dhali a’di suski uni ka pije/ mo dhali o gwo mo ki: Kana, aha/ mina miiya ta mmowoṯẖ is pem mo?

³¹Dhali uni oki a’di gwo mo ki: Gami Tap̱a Yesus is mo ma dhali /e minu woṯẖ mo dhali ki kuŋ gu’b pini ilu/ mo.

³²Dhali uni oki gwon Tap̱a e a’di ki uni ’baar mo kun ’kon e gu’b piti ilu/ mo.

³³Dhali a’di bu’thki uni ki mo yansan jin ta mon’thiny mo dhali up̱ki uni mondorum buni mo dhali ise/ a’di miikunu ki yi’de/ mo, a’di dhala ris unim piti ’baar mo be.

³⁴Dhali a’di suski uni ki mis e gu’b piti mo dhali dhuki tonṯe/ ibwambori uni mo dhali uni ’borkina bwa kagahara mo inyaḵki kuŋ gu’b piti mo mmogamkina uniya Arumgimis gwo is mo be.

³⁵Hili ki mo ḵali kush mo tani imandwall gwo hashki iman’doyi to kun doruwa dor mo mmo/o gwo mo ki: Dhalki ’kwani gwansan iin mo ma.

³⁶Dhala manc̱ora sijin guki’da Buulus gwo mo mmo/o gwo mo ki: Imandwall gwo hashki um gwo mo mmodhal um bway mo mmo/ii mo ti. Haali/ a’di wakan mo tani a’di mina uni iiyu/ mo shwanetan mo dhali iiyi ki moŋḵu’th is mo.