MII GUN MIINU MO 16:12-27

¹²Dhali ’peni mo c̱aan mo tani ntagi Pam P̱ilibbi jin ta bampa/ gi ’Kwani gi Pam Makiduniyya jin ta’da ’kaŋ’kup̱ pa e mo yan jin ta ’peŋkuman bampa/ gi ’Kwani gi Pa Ruumiya mo dhali aman ’kokina naskina/ ka cim ka hony/e mo.

¹³Dhali ka cim ma pesu/ mo tani aman iikina ka pije/ ki ’twaŋkala goŋ bampa/ mo e yana gap̱ mo e mo jin ṯoshkina aman ki mo jin ’thonu di’d mo. Dhali am ’kokina ’cesh mo dhali okina up̱ gun iiyini monṯal ’de/ mo.

¹⁴Dhala ’boma kamu/ jin yuḵu gway ka Lidiyya jin ta’da manyol burrinye/ jin gwaju mo ki tom buhe/ gi Pa Ṯẖiyatira jin luŋki’da Arumgimis mo tani a’di ciḵki am gwo mo haala adum piti ḵa’dkina a’di ki Tap̱a mo mmoc̱i is piti ki to kun okin ma Buulus mo be.

¹⁵Dhali a’di miikunu ki yi’de/ mo dhali ki kuŋ gu’b piti ilu/ mo tani a’di yuḵki am mo mmo/o gwo mo ki: Waḵki/ um nyiṯẖkin ki aha/ tana a’di jin ta isiŋ gana/ gom Tap̱a mo tani iiyu/ i gu’b pem mo ma dhali ’ko ise/ mo. Dhali a’di ṯu’cki am mo be.

¹⁶Dhali a’di warki’d ki mo jin ’kokina aman mmo/ii mo e mo jin ’thonu tani nyaraŋ kamu/ jin ta ga rum mmomish to ṯor gom mo jin midi yayu/ mo tani a’di gam aman ’kup̱ mo jin ḵalki’da ṯu’c kagahara gom itap̱am piti mmoṯora a’di gwo wakan mo.

¹⁷A’di yan mmobaṯẖkina a’diya Buulus mo dhali aman si’da/ mo tani a’di cuuki gwo kagahara mo mmo/o gwo mo ki: ’Kwani gwansan ta c̱iŋkina/ ma Arumgimis jin Cayaa/ e ki Ca mo kun c̱i um gwo gom bway ki mowoṯẖ mo.

¹⁸Dhali yan miikina a’di ka cim ka ris mo. Hila Buulus mmodiṯa bwa a’di mo tani ṯu’kki’d mo dhali owa rum gwo mo ki: Aha/ ḵana /e gwo ki gway ma Yesus Ḵrisṯẖos mo mmoyayu/ ka pije/ ’peni a’di mo. Dhali a’di piki’d ka pije/ mo ki mo yansan mo.

¹⁹Hili ki tap̱am piti mishkin ki to kun mina uni ’taki gam ’peni a’di p̱ikin mo tani uni bu’thkina Buulus mo dhala Sila mo dhali dir uni ki ’bi’th mo e mo ma suug mo ibwambori tap̱a mo.

²⁰Dhali ki uni suski uni e imandwall gwo mo tani uni o gwo mo ki: ’Kwani gwansan mmotana uni ’Kwani Yahuuda/ tani uni miiki mii kagahara mo mmoṯo’c ’kwani gi bampam bana bwa mo,

²¹dhali ṯor mii kun nona gwoŋḵan bam am bway mo mmobu’th mo walla mmoboṯki mii mo mmotana aman ’Kwani gi Pa Ruumiya mo.

²²Dhala waambuhany ’kwani gam gwo me’da p̱o/ uni imonṯal ’de/ mo dhali imandwall gwo dher burrinyem buni bwa mo ’peni is buni mo dhali ḵan gwo mmodor uni ki cwa mo.

²³Dhali ki uni dhuki mondoru ka risa p̱o/ uni mo tani uni ṯa’kki uni eya sijin mo mmoḵana manc̱ora sijin gwo mo ki: Dhuyi uni ki ’dantar mo.

²⁴Dhali mmobutha a’di gwoŋḵan gi wakan mo tani a’di ṯa’kki uni e bwaman ma sijin gana/ mo dhali rep̱ki uni sho’k ki cwa mo.

²⁵Hili ki mo wana e ki mombwam/e mon’thiny mo tani aBuulus dhala Sila uni ’kon mo mmo’tho mo dhali mmoyuḵ gway goma Arumgimis mo dhali ’kwani kun tana habuus ’kon si’da/ mmociḵ uni mo be.

²⁶Dhali ise/ adhan mony’cesh yiḵinki is kagahara mo tani a’di yiḵinkina mo jin ḵa’bu gu’ba sijin is mo. Dhali ise/ arisa campuri ’baar mo tani ḵa’dkunu mo dhala ris mondeḵ gi uni ’baar mo ka ’deṯe/ ’deṯe/ mo tani sulkunu mo be.

²⁷Dhala manc̱ora sijin mmomeru a’di e mo ’peni mo/ish e mo tani dhali mmop̱arkina a’di acampura sijin e mmo’ko ki ḵany mo tani a’di buḵki gandala turgam piti mo dhali murki’di ’taki ’kosh is piti jwa mo mmoṯoshkina a’di ki ’kwani habuus yekin mo be.