MII GUN MIINU MO 15:2-21

²Dhali ki iBuulus dhala Barnaaba uni walkina wal jin gwa’da’d yisa tani uni ṯirrishki uni ki gwo kagahara mo dhali awaḵ buni ki dhu iBuulus mo dhala Barnaaba mo dhali kun tiya si’da/ ’peni bwam uni ki uni mini ’taki ii ka gagamis e Pa Urushaliim mo e imandhunu ki she/ mo dhali ’kwaniŋ gwanyjaḵa/ si’da/ mo gom gwo yansan jin doṯu/ mo.

³Wakan mmosuskina ’kwaniŋ ḵaniisa uni ibway mo tani uni ’ciṯẖkin ki tur mo e Pam P̱iniikiya mo dhali e Pan Saamira mo mmoṯor gwo eya tente/ gom mo gi ṯuka ’kwani kun ’koki ta ’Kwani Yahuuda/ adu is mo dhali a’di pina dhan bwam ’boro’d eya waḵ buni ’baar mo.

⁴Dhali ki uni p̱u’dkin e Pa Urushaliim mo tani uni butha ’kwaniŋ ḵaniisa mo dhali imandhunu ki she/ mo ki ’kwaniŋ gwanyjaḵa/ ilu/ mo dhali gwo lolop̱kina uni uni mo goma ris to ’baar mo kun miikin ma Arumgimis e uni mo.

⁵Hili ’kwanin tiya ’pena waḵa kamu/ ’peni bwaŋ ’Kwanim P̱arisiyiin kun gam gwo is mo tani doshkin ’peni bwam uni mo mmo/o gwo mo ki: A’di minu mii mii mo mmo’ciṯẖ uni amunyjal yis buni mo dhali mmoḵan uni gwo mo ki uni mini ha gwoŋḵan ma Musa jin c̱inu e mo.

⁶Dhali imandhunu ki she/ mo dhali ’kwaniŋ gwanyjaḵa/ nyaḵki is tul mo imonṯal ’de/ mo mmoṯora ṯor gom gwo yan mo be.

⁷’Ko’di gwo kun sugu ki rash rash mo tani aBuṯerus cuki mis mo dhali o uni gwo mo ki: Iwaḵ pema, um mishkin ka Arumgimis kwanyki’d ’peni um kagush ki ’twam pem mo tani ’kwani kun ’koki ta ’Kwani Yahuuda/ mini ciḵ gwom ’borga/ yan mo dhali gam gwo is mo.

⁸Dhala Arumgimis jin mishki’da du mo tani a’di ṯorki gwonṯor gom uni mmoc̱i uni Shi/in Dheleladhelel mo me’d jin c̱ikina a’di ana mo.

⁹Dhali a’di diki mii mii ka gwar ’de/ gom ana mo dhali gom uni si’da/ kun ’koki ta ’Kwani Yahuuda/ mo haali/ a’di ki lam uni adum buni ki dhelel dhelel ki moŋgam gwo is mo be.

¹⁰Haali/ a’di wakan mo tani ata pala uma Arumgimis kan mo ki um mini ’taki dhu dhaŋḵa’b tom’ba/, i’ba/i imanciḵ gwo kun molkina ibabam bana ḵal mo dhali ana si’da/ mo.

¹¹Hili ana gama gwo is ki ana minu woṯẖ mo ka ’the gi Tap̱a Yesus mo me’d mii jin mina uni mii kan si’da/ mo be.

¹²Dhali arisa waambuhany ’kwani ’baar mo ’kon ki shwam mo, dhali uni ciḵki gwo ma Barnaaba mo dhala Buulus mo mmololop̱a uni gwo mo gom momer mo dhala dhan mii kun caaca kun miikin ma Arumgimis i bwaŋ ’kwani kun ’koki ta ’Kwani Yahuuda/ e uni mo be.

¹³Dhali ’ko’di uni ’kokin ki shwam mo tani aYakuub thoḵ uni gwo mo mmo/o gwo mo ki: Iwaḵ pema kana, ciḵi gwom pem mo ma.

¹⁴Simaan lolop̱ki gwo gom monthip̱ jin thip̱kin ma Arumgimis ’kwani kun ’koki ta ’Kwani Yahuuda/ mo mmobuḵ ’kwani ka pije/ ’peni bwam uni gom gway piti mo.

¹⁵Dhali gwo yan gama imanc̱i gwo ma Arumgimis is kadhamo/ mo me’d jin ’kwarkunu mo ki:

¹⁶’Ko’di to gwansan mo tani aha/ mina doḵu/ mo dhali aha/ mina doḵ/e nyaŋ gu’ba burrinye/ ma Dawuu’d jin ’tuḵu/ mo. Dhali aha/ mina doḵ/e nyaŋ gu’b jin shi/u mo mo, dhali aha/ mina thum a’di ki mis mo,

¹⁷ki ’kwani kun ta nyenthe/ mo tani mini mish ŋap̱ Tap̱a Arumgimis mo dhali aris ’kwani kun ’koki ta ’Kwani Yahuuda/ kun ’tho gway ma Arumgimis mo.

¹⁸A’di ona Tap̱a jin ṯorki to gwansan eya tente/ ’peni kadhamo/ mo.

¹⁹Haali/ a’di wakan mo tani gwo e bwam pem wa cikise/ mo be ki ana mina ’koki ṯo’c uni gwansan bwa mo, uni kun ’koki ta ’Kwani Yahuuda/ kun ṯu’kkin mo ka Arumgimis mo.

²⁰Hili ana mina ’kwar uni gwo mo ki uni mini dhal mii ’pen mo kun miina uni mo mmoluŋ tomp̱inycon mo dhali ’peni mo kun miinu miinyc̱al si’da/ mo dhali ’peni to gun minyciru ’kus dhali ’peni miin to ma bas si’da/ mo.

²¹Haali/ ’peni yil kadhamo/ mo tani aMusa ta gi uni eya ris bampa/ ’baar mo kun c̱i gwom piti mmodeŋ a’di e e gu’b gi montul is ka risa cim ma pesu/i ’baar mo ki ’beles mo.