MII GUN MIINU MO 14:19-26

¹⁹Dhali ’Kwani Yahuudan tiya iiyini uni i mo yan mo ’peni Pa Anthaakiya mo dhali Pa Ikuuniya mo dhali mmolala uni awaambuhany ’kwani sho’k ki gwo mo tani uni ’koshkina Buulus ki wosh mo dhali dirki a’di ka pije/ ’peni bampa/ mo mmoṯoshḵina uni ki a’di wuki’d mo be.

²⁰Hili ki imanciḵ gwo doshkin ki jiŋ ’kam a’di mo tani a’di cu mis mo dhali cic̱ki’d e bampa/ mo dhali ka cim jiŋ ’ko’d mo tani a’di yaki’d mo nyaḵka Barnaaba mo e Pan Darba mo be.

²¹Dhali ki uni ṯorki gwom ’borga/ e bampa/ c̱aan mo dhali imanciḵ gwo ka ris ’kokin mo tani uni doḵkin ka nyaŋ’ko’d mo e Pan Lisṯra mo dhali e Pa Ikuuniya mo dhali e Pa Anthaakiya mo

²²mmoṯel bwa gi imanciḵ gwo sho’k mo mmomalas uni ki gwo mo ki uni mini ’ko ki sule/ e moŋgam gwo is mo dhali ki monṯo’c bwa kun mini mii ta aris mo tani ana mina se Bampa/ ma Arumgimis mo be.

²³Dhali ki uni dhuki uni ki ’kwaniŋ gwanyjaḵa/ eya risa ḵaniisa ’baar ki ’beles mo dhali ’tho ki moŋga/ to mo tani uni dhuki uni e me’d gi Tap̱a jin gamkina uni gwo is mo be.

²⁴Dhali uni ’ciṯẖkin ki tur mo e Pam Pisidiyya mo dhali p̱u’dkin mo e Pam Pamp̱iliyya mo be.

²⁵Dhali ki uni oki gwo e Pam Parja mo tani uni iikin ka luŋgu’b e Pa Aṯṯaaliya mo be.

²⁶Dhali ’peni mo c̱aan mo tani uni ki ii mo ka ḵur yi’de/ jin bela ’tham mo ntagi Pa Anthaakiya mo ’peni mo jin dhukunu uni eya ’the ma Arumgimis mo goma ṯu’c jin ’baarkina uni mo mmomii mo be.