MII GUN MIINU MO 13:5-18

⁵Dhali ki uni ’kon e Pan Salamiis mo tani uni c̱i gwo ma Arumgimis e gu’b montul is gi ’Kwani Yahuuda/ mo. Dhali uni tan ga Yohaan si’da/ jin woṯẖi uni mo.

⁶Dhali ki uni ’ciṯẖkin isi bwaman ma ’cesha kunn is ki tur mo ntagi Pam Pap̱uus mo tani uni gam wathiŋ kamu/ jin ta gi e ma rum jin shi/ashi/ mo dhali jin ta’da manc̱i gwonthus mo dhali jin ta Wathi/ Yahuuda/ si’da/ jin yuḵu gway ka Baryashuu mo

⁷jin nyaḵ c̱a’b ka waḵiila Sarjiyuus Buulus jin ta’da mishiŋ gwo wathi/ mo. A’di yan yuḵki’d iBarnaaba dhala Shawuul i a’di mo dhali ŋap̱ gwo ma Arumgimis mmociḵ mo.

⁸Hila Aliim (haali/ gway piti yuḵu kan ki ’twaŋ kamu/ mo) jin ta gi e ma rum jin shi/ashi/ mo tani a’di roc̱ki uni mo mmoŋap̱a waḵiil yan mmoṯu’k mo ’peni moŋgam gwo is yan mo be.

⁹Hila Shawuul jin yuḵu ka Buulus si’da/ mmo’tu’du/ a’di mo ki Shi/in Dheleladhelel mo tani a’di ki hil a’di ka ’thime/ mo

¹⁰dhali o gwo mo ki: Ayy /e jin ’tu’du/ mo ka maḵi ’baar mo dhali /e jin ta ṯẖuthu/ ki ṯẖuthu/ mo dhali /e jin ta ya/ ma Ibliis mo dhali /e jin ta ’kup̱ ki a’di jin ta mo ma ḵar/e ’baar mo tani mina /e diki daḵ mo mmosusa sus jin ta jim per mo ’taa ’peni miiŋ gana/ gi Tap̱a mowa?

¹¹Dhali shwane/ hili mo mo ma, me’d gi Tap̱a midi di ap̱o/ /e mo dhali /e mini ta ja’da/ mo mmomola tente/ p̱ar e ki ari mo mo mmodiki c̱a’b c̱a’b ’pempa naskina/ mo. Dhali ise/ monduḵu’d biṯki’da p̱o/ a’di mo dhali mondhurumi’d si’da/ mo dhali a’di yuthurki’d mo mmoŋap̱ ’kwani mo mmosus a’di me’da bi mo be.

¹²Dhali ŋ’ko’d mo tani awaḵiil ki a’di p̱arki to e jin miikunu mo tani a’di gamki gwo is mo mmomera a’di mo gom gwon Tap̱a jin ṯoru mo be.

¹³Dhala Buulus uni ki imannyaḵ iim piti mo tani uni ’cuḵkina ḵur yi’de/ jin bela ’tham mo mmo/ii ’peni Pam Pap̱uus mo dhali uni p̱u’dkin mo e Pam Parja gi Bampa/ gi Pam Pamp̱iliyya mo dhala Yohaan ya’d mo ’peni uni mo mmodoḵ ka nyaŋ’ko’d e Pa Urushaliim mo.

¹⁴Hili uni mmo’ciṯẖkina uni ’peni Pam Parja mo tani uni p̱u’dkin mo e Pa Anthaakiya gi Bampa/ gi Pam Pisidiyya mo dhali uni iikini gu’b gi montul is ka cim ma pesu/ mmo’kowa ’cesh mo.

¹⁵Dhali ’ko’di gwoŋḵan jin c̱inu deŋu e mo dhali gwo gi imanc̱i gwo ma Arumgimis kadhamo/ si’da/ tani Tap̱a gi gu’b montul is hashki uni gwo mo mmo/o gwo mo ki: Ikam bamaa, waḵki/ um tan gi gwon tiya mo mmomalas ’kwani mo tani oyi mo ma.

¹⁶Dhala Buulus doshki’d ki mis mo dhali mmowuḵkina a’di uni ki me’d mo tani a’di o gwo mo ki: Um ’Kwani ma Israyiil mo dhali um kun ḵo/kina Arumgimis mo tani kana:

¹⁷Arumgimis gi ’Kwani ma Israyiil gwan kwanyki ibabam bana mo dhali dhu ’kwani ki ca ki uni ’kon ki ’kus e Bampa/ Masir mo tani dhali ka bin tur mo tani a’di ki sus uni ka pije/ ’peni a’di mo be.

¹⁸Dhali ki mo embul jin wana e ki yil issu/ mo tani a’di thip̱ki’da thip̱ gom uni mo e mombwaasho mo.