MII GUN MIINU MO 13:43-50

⁴³Dhali ki montul is ’koshu jwa mo tani uni ka ris ’peni ’Kwani Yahuuda/ dhali ’peni uni kun tana gayiin kun ta ’kwani kun ’koki ta ’Kwani Yahuuda/ kun bu’th gwo ma Arumgimis mo tani uni baṯẖkina Buulus mo dhala Barnaaba mo kun o uni gwo mo mmomalas uni mo mmo’ko ki sule/ eya ’the ma Arumgimis mo.

⁴⁴Dhali ka cim ma pesuŋ kamu/ jiŋ ’ko’d mo tani ’kwani murkini ’taki ta ’kwani gi bampa/ ’baar mo kun iiyin mmotul is imonṯal ’de/ mo mmociḵ gwo ma Arumgimis mo.

⁴⁵Hili ki ’Kwani Yahuuda/ mishkina waambuhany ’kwani mo tani uni ’tu’du/ ki mondeeya du mo dhali uni dhaŋki to kun on ma Buulus mo dhali wal gwo sor si’da/ mo be.

⁴⁶Dhala Buulus dhala Barnaaba o gwo eya tente/ mmo’koki ju/ mo dhali o gwo mo ki: A’di minu mii mii mo ki gwo ma Arumgimis minu mii o i/um nṯwa/a/ mo be. Haali/ um bel a’di ’peni um mo dhali um ’cunycurki is bum mmo/o ki um ’koki ’bor mmota gi moŋ’koki/e ki sule/ ya ye ’ba/ mo tani hili ma, aman ṯuka mo ki ’kwani kun ’koki ta ’Kwani Yahuuda/ mo.

⁴⁷Haali/ wakan si’da/ Tap̱a ḵanki am gwo mo mmo/o gwo mo ki: Aha/ karkina /e mo mmota moŋkush gi ’kwani kun ’koki ta ’Kwani Yahuuda/ mo, ki /e mini ’taki di gom mowoṯẖ mo ntagi mo e mony’cesh jin di’d isa dhana/ nnii mo.

⁴⁸Dhali me’dyin ciḵa ’kwani kun ’koki ta ’Kwani Yahuuda/ gwo yan mo tani uni ’borkina bwa mo dhali kar gwo ma Arumgimis ki ca eya tente/ mo. Dhala ris uni gun dhunu mo mmota gi moŋ’koki/e ki sule/ ya ye ’ba/ mo tani uni gamki gwo is mo be.

⁴⁹Dhali gwo gi Tap̱a ḵalu ki lala’th isi bampa/ yani ’baar mo ki ’beles mo.

⁵⁰Hili ’Kwani Yahuuda/ lali up̱a gayiin kun maŋu sho’k mo dhali ’kwani kun tana ’kaŋ’kup̱ pa sho’k mo dhali uni cuuna p̱o/ uni mmoṯoca Buulus dhala Barnaaba bwa mo dhali ṯa’k uni ka pije/ ’peni bwaman mompam buni mo be.