MII GUN MIINU MO 13:40-44

⁴⁰Haali/ a’di gi wakan mo tani hili mo mo ma gom a’di midi ’taki p̱u’du/ ap̱o/ um jin ona imanc̱i gwo ma Arumgimis kadhamo/ mo ki:

⁴¹Hili mo mo ma, um kun ta imanṯẖuny ’twa/ mo tani meri mo ma dhali thisi e mo. Haali/ aha/ miina mii ka cim bum mo, mii jin mina umi ush ki ’tash mo mmogam is mo waḵki/ jan ṯal ’de/ midi ’taki ṯor a’di um mo be.

⁴²Dhali ki uni iikin ka pije/ mo tani uni doṯki gwo mo ki gwo gwansan minu ’taki o gom uni ka cim ma pesuŋ kamu/ jiŋ ’ko’d mo.

⁴³Dhali ki montul is ’koshu jwa mo tani uni ka ris ’peni ’Kwani Yahuuda/ dhali ’peni uni kun tana gayiin kun ta ’kwani kun ’koki ta ’Kwani Yahuuda/ kun bu’th gwo ma Arumgimis mo tani uni baṯẖkina Buulus mo dhala Barnaaba mo kun o uni gwo mo mmomalas uni mo mmo’ko ki sule/ eya ’the ma Arumgimis mo.

⁴⁴Dhali ka cim ma pesuŋ kamu/ jiŋ ’ko’d mo tani ’kwani murkini ’taki ta ’kwani gi bampa/ ’baar mo kun iiyin mmotul is imonṯal ’de/ mo mmociḵ gwo ma Arumgimis mo.