Text copied!
CopyCompare
Gwo Ma Arumgimis - MII GUN MIINU MO - MII GUN MIINU MO 13

MII GUN MIINU MO 13:16-50

Help us?
Click on verse(s) to share them!
16Dhala Buulus doshki’d ki mis mo dhali mmowuḵkina a’di uni ki me’d mo tani a’di o gwo mo ki: Um ’Kwani ma Israyiil mo dhali um kun ḵo/kina Arumgimis mo tani kana:
17Arumgimis gi ’Kwani ma Israyiil gwan kwanyki ibabam bana mo dhali dhu ’kwani ki ca ki uni ’kon ki ’kus e Bampa/ Masir mo tani dhali ka bin tur mo tani a’di ki sus uni ka pije/ ’peni a’di mo be.
18Dhali ki mo embul jin wana e ki yil issu/ mo tani a’di thip̱ki’da thip̱ gom uni mo e mombwaasho mo.
19Dhali ki a’di ’ce’dki kal gi ’kwani kun ’kon ma p̱o/i pesu/ sho’k kun ’kon e Paŋ Kanaan mo tani a’di ki c̱i uni bampam buni ki mal ki mo embul yan jin wana e ki yil iss ’kwanimpa i/iss ’de/ i’ce’dki iss ’kwanimpa su/ i’ce’dka ’kume’d ap̱o/ mo.
20Dhali ŋ’ko’di to gwansan mo tani a’di ki c̱i uni imandwall gwo gwo ntaga Samu/iil jin ta’da manc̱i gwo mo.
21Dhali ka nyaŋ’ko’d doḵ/e mo tani uni doṯkina maliḵ mo dhala Arumgimis ki c̱i uni aShawuul jin ta ya/ ma Kish jin ta wathi/ gi ’kwani ma waḵ ma Benyamiin ki mo embul ki yil issu/ mo.
22Dhali ki a’di ḵwa/ki a’di mo tani a’di piki’da Dawuu’d mmota amaliḵ buni mo. Gom a’di si’da/ a’di ki ṯe gwo mo dhali o gwo mo ki: Aha/ gamkina Dawuu’d jin ta ya/ ma Yassa jin ta wathi/ jin gam ma du ki aha/ jin midi mii bwam pemi ’baar mo.
23’Peni emen gi wathi/ yan mo tani Arumgimis me’d jin onu gwo is mo tani guyi’da Manwoṯẖ gom ’Kwani ma Israyiil mo jin ta’da Yesus mo
24me’dyin ṯor ma Yohaan gwo nṯwa/a/ mo mmodina a’di ki yayu/ naskina/ mo tani gwo mmomiiya mii ki yi’de/ gom mo jin minu rica du is goma ris ’Kwani ma Israyiili ’baar mo.
25Dhali ka Yohaan di’d mmo’baar bway piti mo tani a’di o gwo mo ki: Um ṯosh ki aha/ tana aja mo? Aha/ dina ki ta a’di mo. Hili mo mo ma, jamu/ midi yayu/ i’ko’di aha/ mo, ap̱p̱a/ sho’k piti mo tani aha/ dinaki ’bor jin miga/ ’cuḵ a’di mo.
26Ikam pema um kun ta uc̱i ma Ibrahiim kun iiyin ’pena tora ’de/ mo dhali um gwan ibwaman um kun ḵo/kina Arumgimis mo tani gwo gom mowoṯẖ yan hashkunu mo gom ana mo be.
27Haali/ uni kun ’koni Pa Urushaliim mo dhali tap̱am buni si’da/, haali/ uni ’koki mish a’di mo dhali ’koki mish gwo gi ’twa/ gi imanc̱i gwo kun deŋu e mo ka cim ma pesu/ isa yempa/ mo tani uni miikina uni ’baar mo mmowaḵkina uni a’di mo be.
28Dhali uni bala gamana ta i a’di mo mmoc̱i a’di mmowu mo hili uni doṯkina Bilaaṯus gwo mo ki a’di minu mii ’kosh mo be.
29Dhali ki uni ’baarkina ris to ’baar mo mmomii kun ’kwarkunu mo gom a’di mo tani uni bu’thki a’di ka ’cesh ’peni cwa mo dhali ’thi a’di e moŋ’kup̱aje mo be.
30Hili Arumgimis ’de’k a’di ’peni mowu mo.
31Dhali a’di mishu ka cim ka ris mo ’peni uni kun nyaḵ ii ki a’di ’peni Pany Jaliil ’kup̱ ki Pa Urushaliim mo tani uni shwane/ ita iman/o gwo gom a’di ibwaŋ ’kwani mo be.
32Dhali am guyina um gwom ’borga/ ’peni jin onu is me’d jin ṯoru ibaba mo
33ka Arumgimis ’baarki mii yansan e ana gom uc̱im bana mmo’de’kkina a’di aYesus mo be. Me’d jin ’kwarkunu mo si’da/ ka Masmuuri su/ mo ki: /E ta Ya/m pem mo. Ka cim yansan jin karka/ /e mmodi e aha/ mmotaya/ Ya/um mo.
34Dhali mmotana a’di gi wakan mo tani a’di ’de’kkina a’di a’di ’peni mowu shwane/ mo ki a’di midi diki ṯu’k ki sule/ mo e momp̱u/ mo, dhali a’di oki gwo cikise/ mo be ki: Aha/ mina c̱i um mom’bor mii ma Dawuu’d kun ta kuŋ ḵogu mo dhali kun ta ku isiŋ gana/ si’da/ mo.
35Haali/ a’di si’da/ o’d kan eya masmuura kamu/ ki: /E mini diki c̱i amanḵogum pini mmomish momp̱u/ mo.
36Haala Dawuu’d, ’ko’di a’di mii to gom ’kwani kun tana anyaḵum yil ki a’di ki bwa ma Arumgimis mo tani a’di ish e mo dhali ’thinu mo e mo gi icom mo dhali mishki momp̱u/ mo be.
37Hili a’di jin ’de’kkin ma Arumgimis mo tani a’di mol momp̱u/ mo.
38Haali/ a’di wakan mo tani dhalki a’di mishu mo ibwam um mo, ikam pem, ki wathi/ yan mo tani gwo gom miinthus mmogwam mo tani a’di c̱inu um mo be.
39Dhali ’pena ris to ’baar mo ’peni kun mola gwoŋḵan ma Musa jin c̱inu mo um dhu ki mo ma ḵar/e mo tani e a’di mo tani aris uni ’baar mo ki ’beles kun gam gwo is mo tani uni dhunu ki mo ma ḵar/e mo be.
40Haali/ a’di gi wakan mo tani hili mo mo ma gom a’di midi ’taki p̱u’du/ ap̱o/ um jin ona imanc̱i gwo ma Arumgimis kadhamo/ mo ki:
41Hili mo mo ma, um kun ta imanṯẖuny ’twa/ mo tani meri mo ma dhali thisi e mo. Haali/ aha/ miina mii ka cim bum mo, mii jin mina umi ush ki ’tash mo mmogam is mo waḵki/ jan ṯal ’de/ midi ’taki ṯor a’di um mo be.
42Dhali ki uni iikin ka pije/ mo tani uni doṯki gwo mo ki gwo gwansan minu ’taki o gom uni ka cim ma pesuŋ kamu/ jiŋ ’ko’d mo.
43Dhali ki montul is ’koshu jwa mo tani uni ka ris ’peni ’Kwani Yahuuda/ dhali ’peni uni kun tana gayiin kun ta ’kwani kun ’koki ta ’Kwani Yahuuda/ kun bu’th gwo ma Arumgimis mo tani uni baṯẖkina Buulus mo dhala Barnaaba mo kun o uni gwo mo mmomalas uni mo mmo’ko ki sule/ eya ’the ma Arumgimis mo.
44Dhali ka cim ma pesuŋ kamu/ jiŋ ’ko’d mo tani ’kwani murkini ’taki ta ’kwani gi bampa/ ’baar mo kun iiyin mmotul is imonṯal ’de/ mo mmociḵ gwo ma Arumgimis mo.
45Hili ki ’Kwani Yahuuda/ mishkina waambuhany ’kwani mo tani uni ’tu’du/ ki mondeeya du mo dhali uni dhaŋki to kun on ma Buulus mo dhali wal gwo sor si’da/ mo be.
46Dhala Buulus dhala Barnaaba o gwo eya tente/ mmo’koki ju/ mo dhali o gwo mo ki: A’di minu mii mii mo ki gwo ma Arumgimis minu mii o i/um nṯwa/a/ mo be. Haali/ um bel a’di ’peni um mo dhali um ’cunycurki is bum mmo/o ki um ’koki ’bor mmota gi moŋ’koki/e ki sule/ ya ye ’ba/ mo tani hili ma, aman ṯuka mo ki ’kwani kun ’koki ta ’Kwani Yahuuda/ mo.
47Haali/ wakan si’da/ Tap̱a ḵanki am gwo mo mmo/o gwo mo ki: Aha/ karkina /e mo mmota moŋkush gi ’kwani kun ’koki ta ’Kwani Yahuuda/ mo, ki /e mini ’taki di gom mowoṯẖ mo ntagi mo e mony’cesh jin di’d isa dhana/ nnii mo.
48Dhali me’dyin ciḵa ’kwani kun ’koki ta ’Kwani Yahuuda/ gwo yan mo tani uni ’borkina bwa mo dhali kar gwo ma Arumgimis ki ca eya tente/ mo. Dhala ris uni gun dhunu mo mmota gi moŋ’koki/e ki sule/ ya ye ’ba/ mo tani uni gamki gwo is mo be.
49Dhali gwo gi Tap̱a ḵalu ki lala’th isi bampa/ yani ’baar mo ki ’beles mo.
50Hili ’Kwani Yahuuda/ lali up̱a gayiin kun maŋu sho’k mo dhali ’kwani kun tana ’kaŋ’kup̱ pa sho’k mo dhali uni cuuna p̱o/ uni mmoṯoca Buulus dhala Barnaaba bwa mo dhali ṯa’k uni ka pije/ ’peni bwaman mompam buni mo be.

Read MII GUN MIINU MO 13MII GUN MIINU MO 13
Compare MII GUN MIINU MO 13:16-50MII GUN MIINU MO 13:16-50