MII GUN MIINU MO 12:9-23

⁹Dhali a’di ya’d ka pije/ mo dhali baṯẖa’da baṯẖ mo dhali a’di molo’d ki a’di ta jiŋ gana/ jin miikin ma man’doyu gwo mo tani hili a’di ṯosh ki a’di p̱ar tonyjan e mo.

¹⁰Dhali ki uni pe uni mo kun ta imanji mo mo kun ’koni ṯwa/a/ dhali imanji mo mo kun ta kuŋ ’ko’d mo tani uni iiyini ’twaŋkal toŋḵuthu’d jin ḵa’du bway mo e ’peŋkuman bampa/ jin ḵa’da’d gom uni ki is piti mo. Dhali uni iin ka pije/ mo dhali iin mo naskina/ mmo’baar bwaya ’de/ mo dhali ise/ aman’doyu gwo yaki’d ’peni a’di mo.

¹¹Dhali ka Buṯerus yaki’d ki is piti mo tani a’di o gwo mo ki: Shwane/ aha/ misha ka jiŋ gana/ ki Tap̱a hashki’da man’doyu gwom piti mo dhali ’cuḵ aha/ ka pije/ mo ’peni me’d ma Hirodus mo dhali ’pena ris to kun c̱ora ’Kwani Yahuuda/ mo.

¹²Dhali ki a’di mishki to eya tente/ kan mo tani a’di yaki’d e gu’b ma Mariyam jin ta KoYohaan jin yuḵu ki gwaya kamu/ ka Markus mo i mo jin tula ’kwani is ka ris mmonṯal ’de/ mo dhali uni ’kon mmo’tho mo be.

¹³Dhali ki a’di dorki’da campur ’twaŋkal ki me’d mo tani ari nyara/ jin mii’da ṯu’c jin yuḵu gway ka Ruda mo tani a’di yayi’d mmociḵ ’twa/ naskina/ ’te/ mo.

¹⁴Dhali ki a’di nyiṯẖki’d ki a’di ta ’twa/ ma Buṯerus mo tani a’di diki ḵa’d ’twaŋkal mo hili gom mom’bor bwam piti mo tani a’di guski’d mo mmoṯor gwo ka Buṯerus doshki’d ibwambor ’twaŋkal mo.

¹⁵Dhali uni o a’di gwo mo ki: /E guskina du mo ba/. Hili a’di ṯor uni gwo doḵ/e ki ’bi’th ki a’di wakan mo be. Dhali uni o ki a’di ta’da man’doyu gwom piti ’te/ mo.

¹⁶Hila Buṯerus di’di modor ’twaŋkal naskina/ mo dhali ki uni ḵa’dkin mo tani uni p̱ar a’di e mo dhali merkin mo be.

¹⁷Hili a’di mmowuḵkina a’di uni e ki me’d mo mmo’ko ki shwam mo tani a’di c̱i uni gwo ’baar mo mmosusa Tap̱a a’di ka pije/ mo ’pena sijin mo. Dhali a’di o gwo mo ki: Ṯora ris to gwansan ka Yakuub mo dhala waḵ bana mo. Dhali a’di ya’d mo ’peni uni mo dhali ya’d mo e moŋkamu/ mo.

¹⁸Dhali mmosul ma tente/ mo tani mii ibwaman ma askar yisa miinu ka serec̱ yisa, aBuṯerus warki’d kata mo?

¹⁹Dhali ka Hirodus ŋap̱ki’da ŋap̱ kagahara mo tani dhali diki gam a’di mo tani a’di ŋap̱ki gwo mo gom imanji mo mo dhali a’di ḵanki gwo mo ki uni minu ’kosh mo. Dhali a’di yaki’d ka luŋgu’b mo ’peni Bampa/ Yahuudiyya mo ntagi Paŋ Kaysariyya mo dhali c̱a’bi mun mo be.

²⁰Dhali shwane/ Hirodus miiki’da nyor ki ’Kwani gi Pan Sur mo dhali Pan Saydaa/ mo dhali uni iiyin ki bwan ṯal ’de/ i a’di mo dhali mmomiina uni amugu aBalasṯus jin ta’da manmiiya ṯu’c gu’ba ci goma maliḵ tani uni ki doṯ moŋgwam mo haali/ bampam buni thip̱u ’peni bampa/ ma maliḵ mo be.

²¹Dhali ap̱owa cim jin karu mo tani Hirodus mmohidha a’di burrinye/ ma maliḵ mo tani dhali mmoc̱a’ba a’di eya ḵursi ma maliḵ mo tani dhali a’di ki c̱i uni gwo mo be.

²²Dhali ’kwani cuun kagahara mo mmo/o gwo mo ki: ’Twa/ ma rum ’te/ be yisa ’twa/ gi wathimpa mo.

²³Dhali ise/ aman’doyu gwo gi Tapa ’kosh a’di mo haali/ a’di diki kara Arumgimis ki ca mo dhali a’di shwan ma yish mo dhali c̱i shi/in piti mo be.