MII GUN MIINU MO 10:5-36

⁵Dhali shwane/ dhuyi ’kwaniŋ gwas ’pen mo mmo/ii Pan Yaap̱a mo dhali susa Simaan jin yuḵu ki gwaya kamu/ ka Buṯerus mo.

⁶A’di c̱a’bki’d nyaḵka Simaan jin ta’da manḵucur yiṯ mo. Gu’b piti di’di yana gap̱ mo.

⁷Dhali ka man’doyu gwo jin ṯor a’di gwo yaki’d ’peni a’di mo tani a’di yuḵki imanmiiya ṯu’c gi gu’b piti isu/ mo dhala askara kamu/ ’peni uni jin ta’da gayiin mo jin c̱or a’di ki sule/ mo tani

⁸dhali mmorasha a’di gwo e ’baar mo gom uni mo tani a’di ki dhu uni ’pen mo mmo/ii Pan Yaap̱a mo be.

⁹Dhali ka cim jiŋ ’ko’d mo tani ki uni ’kon e mo/iim buni mo dhali ki uni ’dish pa is mo tani Buṯerus seki ’kuŋgu’b mo mmo’tho ki mo jin wana e ka tente/ ibwaŋ’kup̱ mo.

¹⁰Dhali a’di ’kosha ṯe/ mo dhali ŋap̱ to mo mmoshwa mo. Hili ki uni ’kon mmothoson to mo tani a’di biṯa is jwa mo.

¹¹Dhali a’di hilki momis ḵa’du mo dhali toŋ’kul bwaŋ kamu/ thulki mo jin wana e ka dhan burrinye/ jin dhaluwa ’cesh ki shem ’pena bi doŋon ap̱owa ’cesh mo

¹²kun ’kona ris to ’baar mo kun ’kona jamas ki she/ ki she/ nycine/ mo to/e kun ’kona sho’k do doŋon mo dhali tony’cesh kun paaran mo dhali ’dii kun p̱eni mis mo.

¹³Dhali ’twa/ p̱u’dki’di a’di ki: Cuyi mis mo ma, Buṯerus. ’Koshi ma dhali ’kayi mo.

¹⁴Hila Buṯerus ki o gwo mo ki: Yisa wakana, Tap̱a, haali/ aha/ dinaki ’ka toŋ kamu/ ṯal ’de/ ki sule/ jin ga/u mo walla jin ’konuki thoson me’d jin onu mmomii mo.

¹⁵Dhali ’twa/ p̱u’dki’di a’di doḵ/e me’di su/ ki: A’di jin thosonkin ma Arumgimis ki dhelel dhelel mo tani dhalku/ ki kar a’di ki to jin ga/u mo ma.

¹⁶Dhali yan miikunu me’di kwara mo. Dhali ise/ toŋ’kul bwa bu’thkunu e momis mo.

¹⁷Dhali ka Buṯerus dumpulki’d kagahara ki is piti mo gom tonyjan yan jin p̱ara a’di e mo tani dhali gom ’pemen piti midi ’taki ta ji gi wakata mo tani hili ’kwaniŋ gwas kun ṯu’c ma Karniliyuus ki iiku/ mo tani mmodoṯkina uni gu’b ma Simaan mo tani uni doshkin ibwambor ’twaŋkal gu’b mo,

¹⁸dhali yuḵkina yuḵ mo mmodoṯ gwo mo waḵka Simaan jin yuḵu ki gwaya kamu/ ka Buṯerus mo tani midi ’taki c̱a’bi mahan mo.

¹⁹Dhali ka Buṯerus di’d mmokulum gwon tonyjani bwa mo tani Shi/in o a’di gwo mo ki: Hili mo mo ma, ’kwaniŋ gwasi kwara ŋap̱i /e mo.

²⁰Hili cuyi mis mo dhali thuli /e mo ma dhali yayi nyaḵki uni mmodiki dhaŋ gwo i she/ mo, gom aha/ ṯuca uni mo be.

²¹Dhala Buṯerus thulki’d ka ’ceshi ’kwani mo dhali o gwo mo ki: Hili mo mo ma. Aha/ tana a’di jin ŋap̱a um ti. Um iiyin kata?

²²Dhali uni o gwo mo ki: Karniliyuus jin ta’da mancil ma askar iss ’kwanimpa mudhe’d jin ta wathi/ jin mii’d ka ḵar/e mo dhali ta a’di jin ḵo/ki’da Arumgimis si’da/ mo dhali jin maŋa ’kwani gi Bampa/ Yahuuda/ ’baar mo tani a’di c̱in ma Arumgimis gwo nṯwa/a/ ka man’doyu gwo jin dheleladhelel mo mmohashi /e e gu’b piti mo dhali mmociḵ gwo ’peni /e mo.

²³A’di yuḵkina a’di uni bway bwaŋ gu’b mo dhali dhu uni mmota yilkina/ mo be. Dhali ka cim jiŋ ’ko’d mo tani a’di cu mis mo dhali ya nyaḵki uni mo dhali kun tiya ’pena waḵ buni ’peni Pan Yaap̱a nyaḵ ii ki uni si’da/ mo.

²⁴Dhali ka cim jiŋ ’ko’d mo tani uni seki Paŋ Kaysariyya mo. Dhala Karniliyuus di’d mmoc̱or uni mo mmoyuḵkina a’di abas piti imonṯal ’de/ mo dhali imuguŋ ganam piti kun ena a’di ki en gana/ mo.

²⁵Dhali a’di warki’d ki mo jin sen ma Buṯerus mo tani aKarniliyuus gam a’di ’kup̱ mo dhali biṯki’da ’ceshi sho’k piti mo dhali luŋ a’di mo.

²⁶Hila Buṯerus ’de’kki a’di ki mis mo mmo/o gwo mo ki: Cuyi mis mo ma. Aha/ ki is pem si’da/ tana wathi/ mo.

²⁷Dhali ki a’di ṯorki’da ṯor ki a’di mo tani a’di seki bway bwaŋ gu’b mo dhali gamki ’kwani ka ris tulki isi monṯal ’de/ mo.

²⁸Dhali a’di ki o uni gwo mo ki: Um ki is bum mishkin ki a’di nonu mo ki gwoŋḵan jin c̱inu ki wathi/ jin ta Wathi/ Yahuuda/ midi mol is piti gam me’d mo walla midi diki ya e jaŋ kamu/ ’de/ e bampaŋ kamu/ mo. Dhali hili Arumgimis ṯorki aha/ ki aha/ mina diki ’taki yuḵ wathiŋ kamu/ ṯal ’de/ ki jin ga/u mo walla jin dinuki thoson me’d jin onu mmomii mo.

²⁹Haali/ a’di wakan mo tani aha/ si’da/ yayina um ki dar gi gwon dhaŋ mo haali/ aha/ hashkunu mo. A’di doṯka/ um ki gwonta ihashkina um aha/ mo.

³⁰Dhala Karniliyuus o gwo mo ki: Acim doŋon jin di’di ṯwa/a/ ntagi mo yan shwane/ mo tani aha/ dina mmobu’th mon’tho ka tente/ kwara e gu’b pem mo. Dhali hili mo mo ma. Wathi/ doshki’d ibwambori aha/ ki burrinye/i is ki ra/ ra/ mo

³¹dhali o gwo mo ki: Karniliyuus, mon’thom pini ciḵu mo dhali to kun c̱ina /e mo tani kakunu e mo eya Arumgimis mo.

³²Haali/ a’di wakan mo tani hashki gwo mo e Pan Yaap̱a mo dhali yuḵa Simaan jin yuḵu ki gwaya kamu/ ka Buṯerus mo. A’di ta yilkina/ e gu’b ma Simaan jin ta’da manḵucur yiṯ iyana gap̱ mo.

³³A’di hashka/ /e gwo mo ise/ dhali /e miin ki ’bore/ mmoyayina /e kan mo. Shwane/ haali/ a’di wakan mo tani aman ’baar mo imahan ’kona e buŋ’kus ma Arumgimis mo mmociḵa ris to ’baar mo kun ḵankina Tap̱a /e gwo mo.

³⁴Dhala Buṯerus ḵa’d ’twam piti mo dhali o gwo mo ki: Ka jiŋ gana/ aha/ nyiṯẖkina ka Arumgimis diki mii mii ka gwar ’de/ gom ’kwani mo.

³⁵Hili em bampany ’ceshi ’baar mo ki ’beles mo tani a’di jin ḵo/ a’di mo dhali mii miiŋḵar/e mo tani a’di misha a’di bu’th mo.

³⁶Gwo jin hashkina a’di uc̱i ma Israyiil mo mmoc̱i gwom ’boro’d ki moŋḵu’th is ma Yesus Ḵrisṯẖos mo (a’di jin ta Tap̱a gom ’kwani ’baar mo) –