Mga Binuatan 2:3-22

³Dayon, may gapakita ki danen na daw lagen paryas mga derse na legleg ta apoy na gatugdon naan ta kada isya ki danen.

⁴Pagaeman danen an ta Dyos Ispiritu Santo daw gambal danen an ta lain-lain na mga linggwai na ula danen naistudyui sunod ta ipaambal ta Dyos Ispiritu Santo ki danen.

⁵Ta yon man na timpo, may dyusnon na mga Judio na gatinir naan ta Jerusalem na naan alin ta lain-lain na mga nasyon.

⁶Ta pagmati danen ta sinaba, tama gailing dya na gatipon. Gatingala gid danen an tak namatian ta kada isya ki danen naan ta iran na kaugalingen na linggwai paambal an ta mga gatuo.

⁷Gatingala gid danen an daw gambal, “Di' ba yi na mga gambal i taga-Galilea?

⁸Man-o tak namatian ta anduni danen an na gambal naan ta mga linggwai ta ate na mga lugar?

⁹Kiten i mga taga-Parto, taga-Medo, daw taga-Elam, daw duma man ki kiten naan alin ta Mesopotamia, Judea, Capadocia, Ponto, Asia,

¹⁰Frigia, Pamfilia, Egipto daw parti ta lugar na Libya na dani ta Cirene. Duma an ki kiten naan alin ta lugar na Roma,

¹¹mga Judio man daw mga dili-Judio na iran na pasimba Dyos an na pasimba ta mga Judio. Duma an a ki kiten naan alin ta pulo na Creta daw duma an naan alin ta lugar na Arabia. Piro, bisan lain-lain ate na mga linggwai, namatian ta danen an na gambal naan ta ate na inalinan na mga linggwai parti ta mga katingalaan na pabuat ta Dyos!”

¹²Iling tan ambal danen tenged ta iran na katingala daw gainsa-insaay danen an, “Ino taan liag ambalen ti?”

¹³Piro, duma an gasunlog na gambal, “Mga ingaw nyan!”

¹⁴Dayon, Pedro i duma ta unsi na mga apustulis gatindeg naan ta tubangan ta mga ittaw daw bakod iya na kagi na gambal kanen i, “Mga kasimanwa ko na mga Judio daw tanan kaw na gatinir naan ta Jerusalem, pamatian a nyo daw tugutan a ta pagsugid ki kyo daw ino beet ambalen ta yi na natabo.

¹⁵Dili kami i mga ingaw paryo ta paisip nyo. Sellem pa i! Tallo nang pa uras galambay alin ta pagsennang ta adlaw.

¹⁶Ta matuod, yi na natabo naambal en Joel na prupita na manugsugid ta kabebet-en ta Dyos anay pa sa. Ambal Joel,

¹⁷‘Dyos an gambal daw ino iya na imuon ta katapusan na mga inadlaw. Ambal din, “Ipadala ko Dyos Ispiritu Santo naan ta tanan na mga ittaw para gaeman din danen an. Inyo an na mga kabataan magsugid ta ake na mga ambal. Inyo an na mga miron makakita ta mga panan-awan. Inyo na mga manakem na mama makakita ta ake na mga plano naan ta iran na mga dagammo.

¹⁸Bisan naan ta ake na mga suguon, mga mama man daw mga bai, papadala ko ake na Ispiritu ta yon man na mga inadlaw daw magsugid man danen an ta ake na mga ambal.

¹⁹Ipakita ko naan ta mga ittaw mga katingalaan naan ta langit daw mga sinyalis naan ta kalibutan. Tama na mga lengngessa tenged ta pagpatay. May mga apoy man daw mga tumbuok na aso.

²⁰Adlaw an dili magpawa daw bulan an magminog na paryo ta lengngessa bag-o mabot andemen na adlaw na makatingala na Ginuo an mag-ukom ta tanan na mga ittaw.

²¹Piro, ta yon man na timpo, daw kino marani ta Ginuo Dyos malibri alin ta silot ta iya na mga sala.”’ ”

²²Ambal pa Pedro, “Mga paryo ko na linai Israel, matian nyo gid ambalen ko i ki kyo parti ki Jesus an na taga-Nazaret. Kanen an gabuat ta mga katingalaan na pamatuod na kanen an papadala ta Dyos. Tenged ta mga pabuat ta Dyos paagi ki Jesus pamatuuran din na Jesus an may bakod na gaem na alin ki kanen. Yi tanan nlaman nyo gid tak anen di natabo.