Menge Ininang 9:26-38

²⁶Pegdateng i Saulo doton te Jerusalem, ibeg din makop diyà te menge otaw egpemenal kidoen. Meneng nelemitan dan, so eden dan aw wedà sikandin pemenal ki Jesus.

²⁷Meneng inibing i Bernabe si Saulo doton te menge sogounun i Cristo. Mig-indan sikandin diyà kandan tepad te pegpekità aw peg-ikagi te Pengolo diyà kandin doton te dalan. In-indan din heman kandan te wedà pegketalaw si Saulo te peg-indan din tepad ki Jesus doton te Damasko.

²⁸Penga niyan, timaking si Saulo diyà te menge otaw egpemenal kidoen te Jerusalem. Wedà pegketalaw te pegtoladà din so insogò te Pengolo.

²⁹Migtoladà si Saulo te menge Judiyo eg-ikagi te kagi te Griego aw migpebelaw-belaway dan. Meneng ibeg dan imetayan sikandin.

³⁰Pegketaga-taga te menge doma din kenyan, inibing dan sikandin doton te Sesarya aw impesakay dan diyà te dakel belangay pesalo doton te Tarso.

³¹Penga niyan, wedad den migsamok te otaw egpemenal doton te kedita te lonsod te Judiya aw Galiliya aw Samarya. Nelobos se pedowan dan, aw timolò dan te Pengolo, aw migtabang se Espiritu Santo kandan.

³²Miglegeb si Pedro doton te medita lonsod aw doton heman te menge sakop te Timanem kidoen te Lida.

³³Doen otaw kinità din si Eneas kenà egpekeiwal te walo se omay.

³⁴Minikagi si Pedro kandin, “E Eneas, enaw ka, so pinegolì ka i Jesu Cristo. Loloni se inibatan nikaw.” Pegketà minenaw si Eneas.

³⁵Kinità iyan te kedita te otaw doton te Lida aw doma lonsod te Saron. Nemenal dan heman diyà te Pengolo.

³⁶Doen sebad bayi egpemenal doton te Jopa ngadan din si Tabita, doma ngadan din si Dorcas. Mèpiya otaw sikandin, so gayed egtabang te doma otaw.

³⁷Doen sebad aldaw netigdaan si Dorcas, aw penga niyan nematay. Dinigos dan se lawa din, aw insawol dan doton te gibelayan.

³⁸Pegketaga-taga te menge otaw egpemenal te kidoen si Pedro te Lida, insogò dan se dowa otaw amon mangay kandin, so kenà mediyò se Jopa kidoen te Lida. Minikagi dan ki Pedro, “Ayas ka doton te Jopa.”