Menge Ininang 8:18-34

¹⁸Pegkità i Simon te imbegay se Espiritu Santo pineokit te pegpemaed te sogounun i Cristo kandan, imbegay din se kwarta diyà kandan

¹⁹aw minikagi, “Begayi a heman te tolos sìyan amon kebegayan te Espiritu Santo se kedita te otaw pemàdan ko.”

²⁰Minikagi si Pedro, “Kebàtan ka aw kwarta no, so eden no aw kebeyadan se ibowang te Timanem.

²¹Wedad labut no te eg-inangen day, so wedà kelobos se pedowan no diyà te Timanem.

²²Pegselsel ka te salà seini. Pegtawal-tawal ka diyà te Pengolo aw mepakay din pegwedaden se medaet ibeg te pedowan nikaw.

²³Netegahan ko te ontò ka pa miningà, aw neallang ka pa te salà.”

²⁴Nemoyò si Simon kandan, kagi din, “Pegtawal-tawal kaw diyà te Pengolo amon wedad ketomanan te kagi niyo.”

²⁵Mig-indan si Pedro aw si Juan te kagi intoladà te Pengolo kandan aw ininang din kinità dan. Penga niyan, minolì dan doton te Jerusalem, meneng migtoladà dan heman te Mèpiya Indan doton te menge lonsod te Samarya inokitan dan.

²⁶Migpekità se anghil te Timanem diyà ki Felipe. Minikagi sikandin, “Doton ka te dalan lekat te Jerusalem pesalo doton te Gasa. Yan se dalan kidoen te kebigtilan.”

²⁷Nayan, timolò si Felipe aw dimoton te dalan intedò kandin. Na, doen sebad otaw tege Etyopya tapay dimoton te Jerusalem amon megsimba kidoen. Melangkaw se gulal din, so sikandin se tesorero te bayi eglowan doton te Etyopya, sìyan egtewalen Kandaki.

²⁸Minolì den se sìyan tege Etyopya lekat te Jerusalem. Pegsakay din te kelisa din, migbasa sikandin te libro insolat te telekeliwat te kagi te Timanem gebii si Isaias.

²⁹Simogò se Espiritu Santo ki Felipe, kagi din, “Egpangi aw tekingi se kelisa sìyan.”

³⁰Kimagnan si Felipe, aw dinineg din se tege Etyopya migbasa te libro insolat te telekeliwat te kagi te Timanem gebii si Isaias. Mig-insà si Felipe, “Nekelabet ka lay te binasa no?”

³¹Timaba se tege Etyopya, “Eked a pekelabet singed aw doen otaw megtoladà kanak.” Penga niyan, impesakay din si Felipe.

³²Nayan, seini se kagi te Timanem binasa te tege Etyopya. “Iling sikandin te karniro inibing amon iyawen. Iling heman sikandin te nati te karniro kenà eg-ikagi aw gontingan se bolbol, so pengkey kelimahan sikandin, meneng wedad palos kagi din.

³³Pengkey wedad salà din, meneng pegyèyaen sikandin aw ipelumun. Wedad bowad-bowad din, so imetayan sikandin.”

³⁴Mig-insà se tege Etyopya ki Felipe, kagi din, “Sinu lay se tinedoan te telekeliwat te kagi te Timanem simolat kani? Sikandin aw doma otaw? Indani a den.”