Menge Ininang 21:1-40

¹Pegkesayo day lekat te Mileto, minantek kay doton te polò te Kos. Keeldawan niyan, dimateng kay doton te Rodas aw Mira. Pegkesayo day doton, dimeleg kay doton te Patara.

²Pegdateng day doton, netelaan day se doma belangay pesalo doton te Fenisya. Yan simakay kay aw nesayo.

³Kinità day se polò te Sipro, meneng limaklak kay kidoen digsel te lawod. Dimeleg kay doton te Sirya. Migdong kay doton te Tiro so doen in-awas kidoen.

⁴Netelaan day se menge doma otaw egpemenal kidoen, aw mig-ogpà kay kidoen kandan te sebad simana. Ingkeliwat dan ki Pablo se kagi te Espiritu Santo te eked sikandin kepakay domoton te Jerusalem.

⁵Pegdateng te aldaw te pegkesayo day, tinekingan kay te kedita dan meama aw bayi aw mengisù. Pegdateng day doton te enay, limongken se kedita day aw migtawal-tawal kay diyà te Timanem. Penga niyan, migsoway kay den.

⁶Migsiolì dan doton te balay dan, aw simakay kay te belangay.

⁷Pegsakay day lekat te Tiro, dimoton kay te Tolemay. Timenà kay kidoen, aw limaoy kay te menge otaw egpemenal. Minidegà kay kidoen te sebad se delem.

⁸Keeldawan niyan, nesayo kay pesalo doton te Sesarya. Pegtenà day, dimeleg kay doton te balay i Felipe aw mig-ogpà kay kidoen. Si Felipe se sebad diyà te pito otaw migtelaban te menge sogounun i Cristo doton te Jerusalem. Sikandin heman se menenoladà te kagi te Timanem.

⁹Doen epat batà din laga. Sikandan se telekeliwat te kagi te Timanem.

¹⁰Pegkenamay-namay day kidoen, dimateng lekat te Judiya se sebad telekeliwat te kagi te Timanem si Agabo.

¹¹Peglegeana din kenami, inabat din se elen i Pablo aw in-iket din diyà te kandin benis aw belad, aw minikagi sikandin, “Seini se inikagi te Espiritu Santo. Iling kani iketan te menge Judiyo kenà egpemenal se tig-apò te elen seini doton te Jerusalem. Ibegay dan sikandin diyà te belad te menge otaw kenà Judiyo.”

¹²Pegdineg day kenyan, nemoyò kay diyà ki Pablo te eked sikandin deleg doton te Jerusalem. Iling heman kenyan se inikagi te kedita te otaw egpemenal kidoen te Sesarya.

¹³Meneng minikagi si Pablo, “Ikà niyo egkelag. Ikà niyo egpemegay te lidò diyà te pedowan ko, so wedad beloyan aw iketan a doton te Jerusalem. Wedad heman beloyan aw imetayan a tandà te pegsalig ko diyà te Pengolo tadon si Jesus.”

¹⁴Wedà day kebatog se migtameng kandin. Penga niyan, minikagi kay, “Meinang se ibeg te Pengolo tadon.” Penga niyan, nepenek kay.

¹⁵Wedà kenamay, migtapid kay te pengibingen day, aw dimeleg kay doton te Jerusalem.

¹⁶Doen menge otaw egpemenal lekat te Sesarya timaking kenami. In-ated kay dan doton te balay te sebad otaw lekat te Sipro si Mason, nenamay den nemenal ki Cristo. Mig-ogpà kay kidoen kandin.

¹⁷Pegdateng day doton te Jerusalem, ontò kay sinagman te menge otaw egpemenal kidoen.

¹⁸Keeldawan niyan, miglegeana si Pablo ki Santiago. Timaking kay kandin. Netipon heman se kedita te egpengibing te simbahan.

¹⁹Pegkità i Pablo kandan, in-indan din se kedita te ininang te Timanem kidoen te menge otaw kenà Judiyo pineokit te pegtoladà din.

²⁰Pegdineg dan kenyan, induyun dan se Timanem. Penga niyan, minikagi dan diyà ki Pablo, “Mèpiya so nemenal den se menge otaw kenà Judiyo, meneng ikà egkelibel te minelalan heman se Judiyo nemenal ki Jesus. Measeb dan pa egtolò te punù ingkeliwat i Moises.

²¹Meneng dinineg dan te kolang se intoladà no diyà te kedita te Judiyo eg-ogpà doton te mediyò, so egtoladà ka ekon te mepakay aw eked dan tolò te punù ingkeliwat i Moises. Minikagi ka ekon te mepakay aw eked tolii se menge batà dan meama, aw eked dan heman tolò te ketanem tadon Judiyo.

²²Megmeno ka lebò aw metaga-taga dan kwani te dimateng ka den dini?

²³Mèpiya aw tomolò ka te punù day seini. Doen epat otaw dini migpakang den diyà te Timanem tepad te ketanem tadon.

²⁴Akop ka kandan aw pegpakang ka heman. Aw metagkas se impakang dan diyà te Timanem, pegbayad ka te kepulukan dan amon bolowen dan. Aw inangen no iyan, metaga-taga se kedita te otaw te kenà benal se dinineg dan, so egtolò ka pa se kamno te punù ingkeliwat i Moises.

²⁵Meneng tepad te menge otaw kenà Judiyo nemenal, simolat kay kandan kedengan te eked dan kaen te pengelapen tapay imbegay diyà te inotaw, aw dipanog, aw ayam-ayam pelengen, aw eked dan heman peg-inabut te kenà kandan esawa.”

²⁶Keeldawan niyan, minakop si Pablo diyà te epat otaw sìyan aw migpakang heman. Dimoton dan te dakel simbahan te Jerusalem, aw in-indan dan diyà te egpengibing te simbahan se aldaw aw metagkas se pakang dan, so yan se aldaw te peg-imatay dan te ayam-ayam amon ibegay diyà te Timanem.

²⁷Sagwa agpet den metagkas se pito se aldaw, doen menge Judiyo kenà egpemenal lekat te Asya kimità ki Pablo kidoen te dakel simbahan. Yan timawal dan diyà te menge doma otaw amon megtelaban dan megdakep ki Pablo.

²⁸Migbelobansag dan, kagi dan, “Menge kedomaan day bowad-bowad i Israel, telebani kay. Seini se otaw egtoladà diyà te kedita te otaw te lindoan kidon Judiyo, aw simbahan seini egpenimeneman, aw punù ingkeliwat i Moises. Labi pa medaet se ininang din seini, so inibing din se otaw kenà Judiyo dini didalem te dakel simbahan seini egpenimeneman, pengkey eked iyan kepakay.”

²⁹Yan se kagi dan so kinità dan se sebad tege Efeso kenà Judiyo si Trofimo timaking ki Pablo doton te Jerusalem. Meneng eden dan aw impetaking sikandin i Pablo doton te dakel simbahan.

³⁰Migsamok se kedita te otaw doton te Jerusalem. Medita dan netipon, aw inewidan dan si Pablo, aw ginoyod dan doton te lowà te dakel simbahan. Penga niyan, tinakep dan se simbahan.

³¹Ibeg dan, mengimatay ki Pablo. Meneng doen otaw mig-indan te kapitan te sondalo te migsamok den se kedita te otaw te Jerusalem.

³²Pegketà inibing te kapitan se menge serhinto aw sondalo, aw mig-ayas dan doton te otaw netipon. Pegkità te menge otaw te kapitan aw sondalo, limengà dan te pegsombag dan ki Pablo.

³³Pegdateng te kapitan doton, dinakep din si Pablo. Iniketan se belad din te dowa sengkalì. Penga niyan, mig-insà se kapitan aw sinu se ngadan din, aw eden se medaet ininang din.

³⁴Doen menge otaw timaba, meneng wedà peg-onawa se inikagi dan. Wedà kelebeti te kapitan aw eden se neinang, so medita se migbelobansag. Penga niyan, inibing din si Pablo pesalo doton te kotà te sondalo.

³⁵Pegdateng dan doton te lelebangan te kotà, kinelalang te menge sondalo si Pablo amon mekeokit dan, so ontò neopal se otaw netipon.

³⁶Migbelobansag se otaw timaking, kagi dan, “Imetayan tadon den sikandin.”

³⁷Sagwa agpet den dan mawop doton didalem te kotà, minikagi si Pablo diyà te kapitan te doen ikegiyen din kandin aw mepakay. Nepela se kapitan, aw yan minikagi sikandin, “Biyasa ka kedì te kagi te Griego.

³⁸Eden ko aw sikona se sebad tege Ehipto, sìyan minato te gobirno kedengan, aw nengibing te epat melalan se otaw doen kekamang doton te kebigtilan.”

³⁹Minikagi si Pablo, “Siaken se Judiyo. Sakop a te Tarso, sìyan dakel lonsod doton te Silisya. Ibeg ko mikagi a diyà te otaw netipon.”

⁴⁰Neibeg se kapitan, aw yan timindeg si Pablo doton te lelebangan. Intakyaw din se belad amon ketegahan dan te doen ikegiyen din kandan. Pegkepenek dan, minikagi si Pablo te kagi te Hebreo, so yan se kagi te menge Judiyo.