Menge Ininang 20:17-35

¹⁷Pegdateng day doton te Mileto, insogò i Pablo se otaw domoton te Efeso amon engayen se kedita te egpengibing te simbahan kidoen.

¹⁸Pegdateng dan doton te Mileto, minikagi si Pablo, “Netaga-taga kaw den te eg-inangen ko doton kenyo lekat te pegdateng ko doton te Asya.

¹⁹Measeb a timolò te Pengolo tadon. Migpedanà a te kanak pegkeotawun. Migkelag a so dakel se pedowan ko kenyo. Nelimahan a so ibeg te menge Judiyo kenà egpemenal mengimatay kanak.

²⁰Wedà a pegketalaw te pegtoladà ko kenyo te mèpiya, pengkey doton te simbahan aw doton heman te teg sebad-sebad balay.

²¹Mig-indan a te benal diyà te kedita niyo, pengkey Judiyo aw kenà Judiyo. Migpunù a kenyo te megselsel kaw diyà te Timanem aw memenal kaw diyà te Pengolo tadon si Jesu Cristo.

²²“Na, domoton a den te Jerusalem, so yan se ibeg te Espiritu Santo kanak. Wedà ko ketegahi aw eden se domateng kanak kidoen.

²³Meneng melikit a eg-indanan te Espiritu Santo te pemilangen a aw kelebosowen a kidoen.

²⁴Meneng aneng-aneng ko, wedad beloyan aw imetayan a, so ibeg ko ipengahen ko olò se eg-inangen ko. Meluba a aw mebatog ko tomanen se insogò i Jesus kanak, so insogò a din megtoladà te Mèpiya Indan tepad te tabang te Timanem kenitadon.

²⁵Lamig seini, miglegeb a amon megtoladà a kenyo tepad te peglowan te Timanem. Meneng mesayo a den, aw eked a den palos likò dini.

²⁶Yan eneng-enengi niyo ini. Aw doen pa otaw wedà pa pemenal, wedad salà ko kandin,

²⁷so ontò a migtoladà kenyo te kedita te ibeg te Timanem.

²⁸Pekeimanday kaw. Pegtonggò kaw te kedita te otaw egpemenal, so Espiritu Santo se miggulal kenyo egpengibing amon mengibing kaw kandan. Ininang kidon din sakop din pineokit te pegkematay i Jesus.

²⁹Netegahan ko te doen kwani otaw domateng dini kenyo amon meg-akal dan kenyo, aw kebàtan dan se pegsalig niyo diyà te Timanem.

³⁰Doen heman menge doma niyo megtoladà te kagi kenà benal amon tomaking se menge otaw diyà kandan.

³¹Yan peg-ahà kaw. Ikà niyo egkelibel kani. Gayed a migtoladà kenyo te aldaw aw delem dalem te telo se omay. Migkelag a heman so dakel se pedowan ko kenyo.

³²Ibeg ko, Timanem se megtonggò kenyo. Ibeg ko, tomolò kaw te kagi te Timanem, so mèpiya iyan aw meketabang kenyo. Aw tomolò kaw te kagi din, begayan kaw din heman te ibegay din diyà te kedita te sakop din.

³³“Wedà a palos ingà te kwarta aw penenaktun niyo.

³⁴Netegahan niyo te gayed a migterbaho amon doen ibayad ko te kepulukan ko aw kepulukan te menge doma otaw timaking kanak.

³⁵Yan se ininang ko amon ketegahan niyo te mèpiya aw measeb kidon megterbaho, amon meketabang kidon te menge doma otaw nelimahan. Ikà niyo egkelibel te inikagi te Pengolo si Jesus, ‘Pengkey meluba se otaw tebangan te doma, meneng labi pa meluba se otaw egpenabang te doma.’”