Menge Ininang 1:9-26

⁹Penga niyan te telobo dan pa timengteng ki Jesus, neengat sikandin doton te langit. Neselibengan sikandin te labon.

¹⁰Peglengag dan doton te langit, pegketà dimateng se didowa anghil nenaol te mepotì.

¹¹Minikagi se anghil, “Sikiyo tege Galiliya, ikà niyo eglengag. Neengat den si Jesus doton te langit, meneng todà sikandin lomikò dini te tanà onawa te pegkeengat din kinità niyo seini.”

¹²Penga niyan, nesayo se menge sogounun i Cristo lekat te bontod sìyan iningedanan Olibo. Minolì dan doton te Jerusalem. Sebad kilomitro se kediyò niyan lekat te bontod sìyan.

¹³Pegdateng dan doton te Jerusalem, netipon dan doton te gibelayan te balay inogpaan dan. Seini se otaw netipon. Si Pedro aw si Juan aw si Santiago aw si Andres, si Felipe aw si Tomas, si Bartolome aw si Mateo, si Santiago batà i Alfeo, si Simon meyseg, aw si Judas batà te kesangay i Santiago.

¹⁴Melikit dan netipon aw migsebad se pedowan te kedita dan migtawal-tawal diyà te Timanem. Netipon heman kidoen se menge bayi, aw menge kedowa i Jesus, aw inay din si Maria.

¹⁵Doen aldaw netipon se medita otaw egpemenal, dagpò dan menge sebad gatos kelowan. Timindeg si Pedro kidoen aw minikagi,

¹⁶“Menge kedowa ko, netoman den se kagi te Timanem impesolat te Espiritu Santo ki David tepad ki Judas. Sikandin se nengibing te menge otaw migdakep ki Jesus.

¹⁷Benal si Judas se doma day, so sikandin heman se pinemallì i Jesus amon megtelaban kandin.”

¹⁸(Doen kwarta imbegay ki Judas tandà te peg-inang din te medaet, aw yan se imbayad din te pawà. Penga niyan, nedagdag si Judas aw migbeto se getek din. Nelowà se tegaken din aw nematay.

¹⁹Netegahan iyan te kedita te otaw dini te Jerusalem. Iningedanan se pawà sìyan Akeldama. Se kelebadan niyan, “Pawà te Dipanog.”)

²⁰“Doen kagi tapay insolat diyà te libro te Delangan, ‘Kebàtan se inogpaan din. Wedad otaw meg-ogpà kidoen.’ Doen heman insolat, ‘Mèpiya aw isawol se doma otaw somelilin kandin.’ Yan se kagi impesolat te Timanem.

²¹Nayan, mèpiya aw pemellien day se doma otaw kimità ki Jesus neantay. Mepakay olò aw pemellien se otaw gayed egtaking kenami kedengan dalem te pegdoma i Jesus kenami, lekat te pegbonyag i Juan ki Jesus lamig te pegkeengat din doton te langit.”

²³Penga niyan, impesolat dan se ngadan te dowa otaw, si Matias aw si Jose iningedanan ki Justo, se doma ngadan din si Barsabas.

²⁴Penga niyan, migtawal-tawal dan diyà te Timanem, “Pengolo, netegahan no se pedowan te kedita te otaw. Yan petega-tegahi kenami aw sinu se otaw pinemallì no

²⁵somelilin ki Judas aw meinang sogounun megtelaban kenami, se terbaho tinenanan i Judas pesalo doton te temanan din.”

²⁶Penga te pegtawal-tawal dan, migbonot dan. Penga niyan, si Matias se nepallì. Impeakop sikandin doma te sempolò tegusà sogounun i Cristo.