Menge Ininang 19:30-40

³⁰Ibeg peden i Pablo domeleg doton amon mikagi diyà te otaw netipon, meneng sinagda te menge otaw egpemenal.

³¹Doen menge doma otaw melangkaw sigalak din migpunù kandin te eked sikandin doton amon eked heman elegi.

³²Dalem niyan, dakel se samok te kedita te otaw netipon. Wedà peg-onawa se kagi imbelobansag dan. Pilabok se otaw netaga-taga te nengà netipon dan.

³³Impetindeg te menge Judiyo se doma dan si Alejandro doton te monà. Penga niyan, intakyaw din se belad din amon mepenek dan, so ibeg din mikagi diyà te otaw netipon.

³⁴Meneng pegketaga-taga dan te Judiyo sikandin, labi dan migbelobansag te dowa oras, kagi dan, “Mebohay si Diana te Efeso.”

³⁵Penga niyan, sinagda te konsiyal se otaw netipon. Pegkepenek dan, minikagi sikandin, “Menge sakop te Efeso, netaga-taga se kedita te otaw te sikitadon tege Efeso se egtonggò te simbahan te melangkaw timanem tadon si Diana nedagdag lekat te langit.

³⁶Wedad otaw mekeikagi te kebolalaw iyan. Yan kepenek kaw. Ikà niyo egkebook.

³⁷Wedad palos salà te didowa otaw sìyan inibing niyo dini, so wedad palos tinakaw dan lekat te simbahan. Wedà dan heman pegtompuyus te inotaw tadon.

³⁸Simpana doen salà dan ki Demetrio aw menge doma din, keilangan meg-indan dan diyà te howis te aldaw te peg-osay amon megpebelaw-belaway dan kidoen.

³⁹Meneng aw doen pa doma ibeg niyo, pegtagad kaw te aldaw te pegtipon, so yan se punù te gobirno.

⁴⁰Detengan kidon besi te keopal te gobirno tandà te pegsamok tadon te aldaw seini, so wedad itaba tadon kenyan.”