Menge Ininang 19:10-29

¹⁰lamig te dowa se omay. Yan netegahan te kedita te otaw kidoen te Asya se kagi te Pengolo. Netegahan iyan te menge otaw Judiyo aw menge otaw kenà Judiyo.

¹¹Egtabang se Timanem ki Pablo, aw ininang din se kepelahan,

¹²so pengkey kelobaw aw penenaktun din ipeg-ated dan doton te otaw doen mesakit, amon kegolian se otaw sìyan doen mesakit, aw amon mekelowà se bosaw lekat te doma otaw.

¹³Doen menge Judiyo lomelegeb eg-ikagi te doen tolos dan megpelowà te bosaw lekat te otaw. Minikagi dan diyà te bosaw, “Lowà ka pineokit ki Jesus, sìyan intoladà i Pablo.”

¹⁴Se migtelaman kenyan, yan se pito batà te ontò pengolo te simbahan te Judiyo si Esceva.

¹⁵Meneng minikagi se bosaw diyà kandan, “Netegahan ko si Jesus aw si Pablo. Meneng sikiyo, eked ko toloi.”

¹⁶Penga niyan, pinengayaw dan te otaw dinetengan te bosaw, aw dinaeg se kedita dan. Yan kimadas dan kidoen nelingkasan te penenaktun aw nepelian dan.

¹⁷Nedengeg iyan doton te Efeso, aw netegahan iyan te kedita te Judiyo aw otaw kenà Judiyo. Nepela se kedita dan, aw induyun dan se ngadan te Pengolo si Jesus.

¹⁸Migselsel heman se menge otaw kaling nemenal. Wedà dan boloni se medaet ininang dan.

¹⁹Doen heman menge otaw biyasa egdelikmata nemegay te libro dan te delikmata, aw migsonog dan kenyan kinità te kedita te otaw. Binilang dan se keelagà te kedita te libro sinonog, dagpò niyan keliman melalan se kwarta dan.

²⁰Nedengeg se kagi te Pengolo intoladà, aw medita se otaw nemenal.

²¹Penga niyan, ibeg i Pablo domoton te Jerusalem mokit te Masidonya aw Gresya. Minikagi sikandin, “Penga te peggemaw ko doton te Jerusalem, keilangan domeleg a doton te Roma.”

²²Insogò din se dowa otaw migtabang kandin si Timoteo aw si Erasto domoton te Masidonya, meneng nenamay-namay mig-ogpà pa si Pablo kidoen te probinsya te Asya.

²³Dalem te peg-ogpà din doton te Efeso, doen dakel samok tepad te pegtoladà din te kagi te Timanem.

²⁴Doen sebad otaw si Demetrio biyasa egtoang te selapì. Medita se otaw migterbaho kandin, so mig-inang dan te kekitaan iling te kedakel te kepolan impesopo te simbahan egtewal-tewalan dan diyà te sebad inotaw ngadan din si Diana. Yan se ipegpemeligyà dan, aw dakel se kwarta neabat dan.

²⁵Migtipon si Demetrio te otaw migterbaho kandin aw doma otaw egtoang kenyan. Minikagi si Demetrio diyà kandan, “Netegahan niyo te dakel se kwarta egkeabat tadon pineokit te eg-inangen tadon seini.

²⁶Meneng kinità niyo den besi si Pablo, aw dinineg niyo heman se inikagi din. Wedad son din kekemowan te inotaw eg-inangen te otaw, so kenà ekon timanem. Medita se otaw nenenalan kandin, pengkey dini te Efeso aw doton heman te kedita te doma lonsod te Asya.

²⁷Medaet iyan, so wedad nael otaw mayad te eg-inangen tadon. Medaet heman so wedad den megsagman te simbahan te melangkaw inotaw tadon si Diana. Sikandin se egsimbahen te kedita te otaw dini te Asya aw doton te kebelad te keneyonan. Ontò medaet aw eked dan pegtawal-tawal kandin.”

²⁸Pegdineg dan te kagi din, ontò dan neopal aw migbelobansag dan, kagi dan, “Iduyun si Diana te Efeso.”

²⁹Nesamok se kedita te otaw eg-ogpà kidoen. Inewidan dan se otaw timaking ki Pablo lekat te Masidonya si Gayo aw si Aristarco. Intolod dan doton te tiponanan te otaw.