Menge Ininang 17:2-27

²Migsimba si Pablo so yan se ketanem din. Migtoladà sikandin te kagi te Timanem kidoen te simbahan te kelikit te Sebado taman te telo simana.

³Miglebad-lebad heman sikandin te kagi te Timanem insolat amon ontò dan kelebetan te keilangan pemilangen aw imetayan se Misiyas isogò te Timanem, aw penga niyan meantay heman lekat te nematay. Minikagi sikandin, “Si Jesus se Misiyas insogò te Timanem, sìyan intoladà ko kenyo.”

⁴Doen menge Judiyo nemenal aw migpesakop diyà ki Pablo aw si Silas. Nemenal heman se medita otaw kenà Judiyo egsalig diyà te Timanem aw medita heman bayi melangkaw.

⁵Meneng miningà se menge Judiyo kenà egpemenal, aw pigtipon dan se menge doma medaet otaw wedad eg-inangen dan. Pegkedita dan, migsamok dan kidoen, aw dimoton dan te balay i Jason amon dekepen dan kidoen si Pablo aw si Silas aw ibingen dan doton te menge otaw netipon.

⁶Meneng kinità dan olò si Jason aw menge doma otaw egpemenal, aw yan se inibing dan doton te menge konsiyal. Minikagi dan, “Dimini den se otaw migsamok te kedita te otaw te keneyonan.

⁷Mig-ogpà den dan doton ki Jason. Limàpang dan te punù te selotan si Cesar, so doen son dan olò sebad se lomowan, aw yan si Jesus.”

⁸Nayan, ontò neopal se menge konsiyal aw kedita te doma otaw te pegdineg dan kenyan.

⁹Penga niyan, doen kwarta insawol i Jason aw menge doma otaw egpemenal, aw migpakang dan te eked pegsamok si Pablo aw si Silas. Penga niyan, nekelowà dan.

¹⁰Pegkedelem niyan, impekesayo te menge otaw egpemenal si Pablo aw si Silas, aw dimoton dan te Berya. Pegdateng dan doton, dimoton dan te simbahan te Judiyo.

¹¹Kenà iling te tege Tesalonika se menge otaw doton te Berya, so ontò measeb se tege Berya egpenenalan te kagi te Timanem. Kelikit te aldaw, migbasa dan te kagi te Timanem insolat amon ketegahan dan aw benal se intoladà i Pablo.

¹²Medita se Judiyo nemenal, aw doen heman menge Griego meama aw bayi melangkaw eleg nemenal.

¹³Sagwa netaga-taga se menge Judiyo kenà egpemenal doton te Tesalonika te migtoladà si Pablo te kagi te Timanem doton te Berya, dimoton dan heman amon megsamok dan.

¹⁴Yan impekesayo te menge otaw egpemenal si Pablo pesalo doton te dagat. Meneng si Silas aw si Timoteo mig-ogpà pa doton te Berya.

¹⁵Doen doma otaw timaking ki Pablo taman te Atenas. Peg-olì dan doton te Berya, inindanan dan si Silas aw si Timoteo te intogon dan i Pablo te ayas dan domoton te Atenas.

¹⁶Dalem te pegtagad i Pablo doton te Atenas, ontò nepuluk se pedowan din, so ontò medita se inotaw egdogsoan te otaw eg-ogpà kidoen.

¹⁷Migpebelaw-belaway si Pablo te menge Judiyo aw menge doma otaw egsalig diyà te Timanem doton te simbahan dan. Kelikit te aldaw, migpebelaw-belaway heman si Pablo te menge otaw netelaan din doton te pedyanan.

¹⁸Doen menge menenoladà sakop te menge Epicuriano aw Estoiko migdindil ki Pablo. Migtompuyus se sebad, kagi din, “Wedad besi ontong te intoladà te metibelisì sìyan.” Doen doma minikagi, “Egtoladà besi tepad te menge doma timanem egsimbahen doton te mediyò ogpeanan.” Minikagi dan kenyan so migtoladà si Pablo tepad ki Jesus aw keentayan.

¹⁹Inibing dan si Pablo doton te tiponanan te obanen aw pinemoyò dan sikandin, kagi dan, “Indani kay aw eden se kaling toladà nikaw.

²⁰Doen intoladà no wedà day palos dinegi. Lebadi iyan diyà kenami.”

²¹Yan se inikagi dan, so se ibeg te tege Atenas aw ibeg heman te menge doma otaw eggemaw kidoen, gayed dan eg-indan aw egpenenalan te kaling toladà, so yan se ketanem dan.

²²Penga niyan, timindeg si Pablo doton te monà te kedita te obanen netipon. Minikagi sikandin, “Penenalan kaw tege Atenas. Netegahan ko te ontò kaw measeb te pegsimba niyo,

²³so peglegeb ko dini te Atenas, kinità ko se medita dogsoanan niyo. Doen heman sebad sinolatan te kagi, ‘Dogsoanan te timanem wedà tadon ketegahi.’ Nayan, se Timanem egdogsoan niyo pengkey wedà niyo ketegahi, sikandin se itoladà ko den kenyo.

²⁴Eked sikandin peg-ogpà diyà te lowang te simbahan inangen te otaw, so sikandin se mig-inang te keneyonan aw kedita niyan, aw sikandin se Pengolo te kedita doton te langit aw dini heman te tanà.

²⁵Wedad palos puluk din itabang te otaw kandin, so sikandin se egpemegay te kedita diyà kenitadon, pengkey pedowan tadon aw omol.

²⁶Ininang te Timanem se sebad otaw si Adam, aw sikandin se kemonaan te kedita te otaw eg-ogpà dini te kebelad te keneyonan. Tapay piglalang te Timanem se kenamay aw temanan te ogpeanan dan.

²⁷Ininang te Pengolo se kedita niyan amon mengemahà se kedita tadon kandin aw kitaen tadon sikandin, so kenà mediyò se Timanem diyà te teg sebad-sebad kenitadon.